1 MAKABAYO 14
14
Khuli Demeturio wa Khavili Yakumilwa
1Khumuhika kwi imia indala makhomi saba ni chivili, Mwami Demeturio wa Khavili yalaanga halala mukaanda kwa vasikali veve, manaroonjela khutsia khureeva vukhonyi mu litaala lia Media; nikanyalikha akwane Turifo. 2Lwa Mwami Arasake wa Perisia nende Media yahulila ndi Mwami Demeturio wa Khavili umali khwitsa khuseera shivala shieshie, yaruma mulala khu vimilili vi mikaanda chia vasikali veve khutsia khukumila Mwami Demeturio wa Khavili nashili mwoyo. 3Mwimilili wu mukaanda kwa vasikali venavo, yasimukha natsia khandi nakuura mukaanda kwa vasikali vu Mwami Demeturio wa Khavili, manivakumila Mwami Demeturio wa Khavili mwenoyo. Vavukula Mwami Demeturio wa Khavili, nivamuhila khu Mwami Arasake, wamanya namuvoha mucheela.
4Matukhu koosi ka Simoni yali nashili mwoyo, shivala shiali mu milembe.
Yakholela vandu vi shivala shieshie malahi;
liamiha lielie lia vayaanzitsa
khuli yali waheelwa luyali khumatukhu koosi ka yali nashili mwoyo.
5Khumeeta khu luyali lwelwe lwosi, yavukula litaala lia Yopa khuva havundu hi tsimeli khusinjila,
maniyikula injila yu khwinjila mu visuulu vi Inyanza ya Meditereniani.
6Yavambalitasa mipaka chi shivala shieshie,
niyamiha ni tsingulu tsiosi.
7Yalera mu shivala shienesho vandu vanyishi vali nivakumilwa mu liihe;
yamiha mataala ka Gazara nende Betsi zuri,
halala ni imbinga ya Yerusalemi.
Yatakasa imbinga yeneyo,
mundu avulakhuho wali wamuhinganyinya.
8Vayahudi valima milimi chiavo mu milembe;
lilova liameela viraakwa mu vunyishi,
khandi misala nichiama matunda mu vunyishi.
9Vasakhulu vikhala mu tsinjila,
voosi valomoloma makhuva khu vindu vilahi,
vayayi vavukha vifwala tsinguvu tsiu vutavala tsindahi tsiu khukwanila.
10Simoni yaheetsanga vandu vamenyanga mu mataala shiukhulia,
navashinga khurula khu liihe,
khutukha lwa yaheelwa luyali shia havundu hosi khulilova.
11Yachila milembe nichinyolekha mu shivala,
shivala shia Israeli nishikhoyela vuyaanzi muno.
12Vandu voosi vikhala mushiniikha shi misabibu
nende mikhuyu chiavo,
mundu avulakhuho wali unyala khuvarishitsa.
13Mundu avulakhuho warikala mu shivala shienesho
unyala khuvakwana,
khali vami vativitswa mumatukhu kenako.
14Simoni yakhonya vandu vichehitsanga voosi mu vandu veve;
yalondelela malako
khandi namulula vandu vatamanu.
15Yachila Litempeli niliheelwa vukhumi mu vunyishi muno,
khali nameeta vindu vindi
khu vindu viali niviavikhwa Havundu Hatakatifu.
16Likhuva liahulilikhana mu litaala lia Roma, khandi shia havundu hosi khali khutsia khutukha mu shivala shia Spata ndi Yonatsani umali khukhutsa. Vandu vali nu vuveleli mu mioyo khulondokhana khu kenako. 17Navutswa lwa vandu venavo vahulila makhuva ndi Simoni umali khukwa Mukali wa vasalisi voosi havukono ha amwavo wewe; khandi ndi neye wali niyamihanga shivala shienesho nende mataala kali mushio, 18vamanya nivahandika vuyia khu machina kalombwa khu mukasa, kali nikakhongwakhu lilakano liu vulina lia vali nivakhola na vamwavo veve Yudasi nende Yonatsani; vavukula machina kakhongwa kenako, nivamuha. 19Vasoma makhuva kali nikahandikwa khuko imbeli wi shikhaalo shia vandu mu Yerusalemi. 20Ilondakhu iyi, neyo ibarwa yu lukanu lwenolo yahandikwa khu vandu vi litaala lia Spata,
“Khutsi vamihi nende vandu vi litaala lia Spata, vasalisi nende valala khu Vayahudi, nivali vashieru, khuhandikanga ibarwa iyi khu Mukali wa vasalisi voosi Simoni. Nyola milembe. 21Varumwa vamwaruma khwitsa khukhulola vakhuvoolele makhuva khulondokhana khuli mwaheelwa vukhumi, khandi khuli mwitsominywangwa. Khwitsa khwavo khwakhukhola khuva nu vuyaanzi. 22Khali khuhandichi makhuva ka vavoola mu vandu havulavu khulondokhana khu malako keru. Nako kalondakhu yaka, ‘Mundu walaangwangwa Numenia mwana wa Antioko nende Antipatera mwana wa Yasoni, nivali varumwa vatoto va Vayahudi vitsa khukhulola khukhola vuyia lilakano liavo liu vulina. 23Vandu veru vali nu vuyaanzi muno shichila vandu venavo. Vavinjilitsa nu luyali, nivavikha ibarwa indala yali na makhuva ka vavoola mu livishilu li vitabu viu mu shivala shiavo, khwenya vandu vi litaala lia Spata vavekhu ni shindu shiahandikwa khulondokhana khu makhuva kenako. Khali Mukali wa vasalisi voosi, umali khuheelwa ibarwa yahandikwamu makhuva kenako.’ ”
24Matukhu mati nikakhavira, Simoni yaruma Numenia khuhila mu litaala lia Roma ingavo ingali, yali niyalombwa khu itsahabu yali nu vulitoho tsikilo 500, khuhuchilila lilakano lia vali nivakholi na Varoma.
25Lwa Vayahudi vahulila makhuva khulondokhana khu vindu vienevo viosi, varaanga khwireevana, nivavoola, “Ninjila shina ya khunyala khusanditsilamu Simoni nende vaana veve? 26Ye mwene, vamwavo veve, halala na vandu vu mu inzu ya tata wewe vasinjila ni tsingulu shichila shivala shieru. Navo vakwana khandi nivakhunganyinya vatsiku va Israeli nu khukhola Vaisraeli khuva vavoholole.” 27Makhuva kalondakhu yaka nako kahandikwa mu ibarwa yeneyo,
“Khulitukhu li likhomi na munane liu mweli kwa Eluli, khumuhika kwi imia indala makhomi saba na kavili, nakhwo khuvoola, muhika kwa khavaka mu vwamihi vu Mukali wa vasalisi voosi Simoni, 28khwavoolelwa havulavu makhuva yaka mu shikhaalo shikali shia vasalisi, vandu, vamihi nende vimilili vandi va khwamihanga: 29Shia inyinga yosi yi shivala shieru shiakwananga, Simoni mwana wa Matatsia, mulala khu vasalisi vu lwivulu lwa Yehoharibu, halala na vamwavo veve, virulitsa ni shinani khwikalila vatsiku vi shivala shieru, khulu khulinda Litempeli lieru nende malako keru. Navo vachila shivala shieru nishiheelwa vukhumi vunyishi muno. 30Yonatsani yalera halala vandu veru, manakwa Mukali wa vasalisi voosi wavo nashili khukhutsa. 31Lwa vatsiku va Vayahudi vaviritsa khuseera shivala shieru nu khutivitsa Litempeli, 32Simoni yirulitsa khukwanila shivala shieshie. Yamalila tsisenti tsinyishi khukuulila vasikali vi shivala shieshie viuchi viu khukwanila, nu khuvarunga mirungu chiavo. 33Yumbakha ni tsimbinga mataala kali mu lusomo lwa Yudeya, khushila muno litaala lia Betsi zuri khu mpaka kwa Yudeya, wa viuchi viu mutsiku viali niviavikhwa. Yavikhayo mukaanda kwa vasikali va Vayahudi. 34Yumbakha khandi imbinga mu litaala lia Yopa, lili himbi khu inyanza, khandi mu litaala lia Gazara khu mupaka kwa Azota, wa mutsiku yali niyamenya. Yavoolela Vayahudi vamenyeyo, naha vandu vi litaala lienelo shia shindu shiosi shia vali nivenyi. 35Lwa vandu valola khuli Simoni ali musuuvilwa, khandi vukhumi vwa yali naviritsi khukwanila shivala shieshie, va mwamihitsa khuva mwimilili wavo, nivamukhola khuva Mukali wa vasalisi voosi, shichila yakhola vindu vienevo viosi mu vusuuvilwa khandi mu vwatoto. Yachelitsa ni tsingulu tsinyishi khulola ndi vandu veve vahindahala.
36“Mumatukhu ka yamihanga, khwali nu vuhinda, khali vandu vi tsimbia tsindi nivakhungwa khurula mu shivala shia yamihanga; khuli vali nivakhungwa khurula mu litaala likali lia Daudi mu Yerusalemi, mwa vali nivumbakha vene imbinga yavo. Vasikali venavo vali vamenya nivatsitsanga Havundu Hatakatifu, khwononyinywa vutakatifu vwa hawenaho. 37Simoni yavoolela Vayahudi vamenye mu litaala lienelo. Yaliumbakha ni imbinga khuva nu vulindi vulahi khushinga shivala shienesho khurula khu vatsiku. Yaraambihitsa masisi ka Yerusalemi.
38“Khulondokhana na kenako koosi, Mwami Demeturio yamurovola namuha vunyali vu khuva Mukali wa vasalisi voosi. 39Yamuvukula khuva mulala khu valina veve namuha luyali mu vunyishi muno. 40Mwami Demeturio yakhola ndio, shichila yali uvoolelwi ndi Varoma valaanganga Vayahudi valina vavo, vandu vu khuvakhonya khandi vamwavo vavo; khandi ndi vinjilitsa varumwa va Simoni yaruma nu luyali.
41“Khulwa yako, Vayahudi nende vasalisi vavo vamali khuviritsa ndi muprofeti musuuvilwa nashili khulolekha, Simoni aliitsa khutsililila khuva mwimilili wavo, khandi aliitsa khuva Mukali wa vasalisi voosi mihika ni mihika. 42Simoni aliitsa khuva gavana wi shivala shiavo, khusinjilila Litempeli, khandi aliitsa khuva mwimilili wu mukaanda kwa vasikali. Neye uliitsa khusinjilila vindu viu khukwanila mu liihe, tsimbinga nende mihinzilu chindi chiosi. 43Khutukha vandu valiitsa khulonda malako keke. Mihinzilu chi shivala shieshie shia yamihanga chiliitsa khuhandikwangwa khuvirila mu lira lielie, khandi aliitsa khuva nu vunyali vu khwifwalanga tsinguvu tsia sambarau, khandi tsinguvu tsindi tsialombwa khu itsahabu.
44“Mundu avulakhuho, ave musalisi inoho ni viina mu vandu, uliitsa khuva nu vunyali khulondokhana khu malako khusisulula khali shindu shilala khu kaviritswa inoho khuhinganyinya kavoolwa, khwikhalitsa shikhaalo mu shivala shinu vuchila khuheelwa lilako, inoho khwifwala tsinguvu tsia sambarau inoho khwifwala viuma vialombwa khu itsahabu. 45Mundu uliitsa khwambakhana khulonda kenako inoho khuchayakhu khali lilala khu mechitso yaka aliitsa khusalilitswa.” 46Vandu voosi vahuchilila nu mwoyo mulala khuha Simoni vunyali vu khwivaalila vandu khulondokhana khu mivaalo kavo.
47Simoni yahuchilila khuva Mukali wa vasalisi voosi, khuva mwimilili wu mukaanda kwa vasikali, khandi gavana wa Vayahudi nende vasalisi, nu khuvalinda voosi.
48Lilako liahaanwa ndi malako kenako kahandichi khu machina kakhongwa khurula khu mukasa, nu khuvikhwa havundu halahi hene mu Litempeli, 49khandi ikaratasi yindi khuvikhwa mu livishilu li Litempeli, ha Simoni nende vaana veve vanyala khuyisomelanga.
Currently Selected:
1 MAKABAYO 14: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013