1 MAKABAYO 16
16
1Yohana yatikulukha narula mu litaala lia Gazara khutsia khuvoolela tata wewe vindu via mundu walaangwangwa Kendebehu yali nakholi. 2Khu, Simoni yalaanga vaana veve vahindila Yohana nende Yudasi, navavoolela, “Inzi nende vamwavo vaanje, halala na vandu vi inzu ya tata wanje khwakwanila shivala shia Israeli khuraanjila muvuvukha vweru khutukha nunundi; Khwanyola likuura mu shia shindu shiosi khandi khwahonyinya Israeli hali khanyishi. 3Navutswa inzi nasakhula nunundi, khandi munyi mwahindila mu mihika khuvirila khu tsimbavasi tsia Nyasaye. Vukuli vwiyangu vwanje, halala nu vwa vamwavo vaanje, ma mutsi khukwanila shivala shieru. Nyasaye ukhonyanga vandu alava na munyi.”
4Nalwo lwa Yohana yarovola vasikali vu khukwanila khu vilenje khandi vi tsifarasi tsiheelefu makhomi kavili; varoonjela nivatsia khukwana Kendebehu, manivasimiikha maheemo kavo ku khukonamu mu vutukhu Modehini. 5Nuvwakhashia mu mavwevwe, varoonjela nivatsia mu lwomera, ha vakana nu mukaanda kwa vasikali vanyishi vi tsifarasi, nivitsanga khwakana navo; nikhali muchela kwali hakari havo. 6Khu, ye halala nu mukaanda kwa vasikali veve virechekha, nivavakwana. Yalola ndi vasikali varili khwambukha muchela, naraanga khwambukha. Lwa mukaanda kwa vasikali veve vamulola, vambukha nivamulonda munyuma. 7Yohana yakavulamu vasikali veve, nu khura vasikali vakwanilanga khu tsifarasi hakari ha vasikali vakwanilanga hasi, shichila vasikali va vakwananga navo khu tsifarasi vali vanyishi muno. 8Nalwo lwa visiliva viakhuvwa, liihe niliraanga; Kendebehu nende mukaanda kwa vasikali veve vakuurwa, khali vasikali vanyishi khuvo nivakhutsa. Vasikali vali nivarikale vilushila mu imbinga yavo mu litaala lia Keduroni. 9Yuda yasalilitswa muliihe, navutswa amwavo wewe Yohana yatsilila khuhitsanyinya vatsiku venavo khali khutsia khutukha Keduroni, nilili litaala lia Kendebehu yali niyumbakha vuyia. 10Visikali venavo vilukha nivatsia khumenya mu minaara chiali nichiumbakhwa mu litaala lia Azota, ma Yohana nachisamba nu mulilu. Vandu tsiheelefu tsivili viirwa. Yakalukha mu shivala shia Yudeya mu vulindi vulahi.
Khuli Simoni nende Vaana veve Vavili Viirwa
11Mumatukhu kenako, Putolemi mwana wa Abubo yali warovolwa khuva gavana wu mu lwomera lwa Yeriko. Yali ni ifetsa nende itsahabu mu vunyishi, 12shichila yali mukuuka wu Mukali wa vasalisi voosi Simoni. 13Navutswa yali nu vwikombi muno, khali yali ni lienya liu khuvukula vwami vwi shivala shienesho. Khulwa yako, yaloshitsa khuli anyala khwiira Simoni nende vaana veve. 14Litukhu lindi, lwa Simoni nende vaana veve nivali Matatsia nende Yudasi, vasimukha nivatsia khucheniha mataala mu shivala shieshie, khwenya khumanya ka vandu venyanga khukholelwa. Vatukha mu litaala lia Yeriko khulitukhu li likhomi na lilala liu mweli kwa Shebati, khumuhika kwi imia indala makhomi saba na saba. 15Mwana wa Abubo yavinjilitsa ninganakani yu khwenya khwiira vandu venavo havundu hi imbinga indititi yali yali ni lira Doki, ya yali niyumbakha. Yavakholela mulukha mukali kwi lilia, khali naho ha yavisa vandu valala. 16Lwa Simoni nende vaana veve vali nivatandi, Putolemi nende vandu veve varulaho, nivavukula viuchi viavo. Valondelela Simoni wali nali mu inzu yu mulukha kwi lilia; viira Simoni nende vaana veve vavili, khali valala khu varumishi veve. 17Putolemi yakhola shikholwa shiu vulumindi, nikalolekha umali khuvanzila vutamanu khu vulahi.
18Nalwo lwa Putolemi yahandika makhuva ka yali nakholi, manahila khu Mwami Antioko. Yamureeva nayaanza amurumile mikaanda chia vasikali, khutsia khumukalushitsila mataala nende shivala. 19Yaruma mukaanda kwa vasikali vandi mu litaala lia Gazara khutsia khwiira Yohana; yaruma tsibarwa khu vimilili vi mikaanda chia vasikali navareevanga khwitsa khumulola, nu khuvaha ifetsa, itsahabu nende vihanwa vindi. 20Yaruma mikaanda chia vasikali vandi khutsia khuvukula litaala likali lia Yerusalemi nende shikulu shi Litempeli liu mbakhwakhu. 21Navutswa wundi mundu yilukhaka imbeli wavo natsia khuvoolela Yohana mu litaala lia Gazara ndi tata wewe nende vamwavo veve vamali khukhutsa, khandi ndi umali khuruma vandu khwitsa khumwiira. 22Lwa Yohana yahulila makhuva kenako, yakumila vandu vali nivitsi khumwiira mwene naviira, shichila yali umanyi ndi vakhavanga khuli vamwiira. 23Vindu vindi viosi via Yohana yakhola, maahe keke ka yakwana nende vikholwa viu vucheli via yakhola; khandi masisi ka yali niyalomba vuyia, nende mihinzilu chia yarweshitswa, 24viahandikwa mu Vitabu vi Tsinyinga lwa yakholanga muhinzilu kwekwe khuli Mukali wa vasalisi Voosi mumatukhu ka yamihanga, tata wewe niyakhutsa.
Currently Selected:
1 MAKABAYO 16: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013