1 MAKABAYO 13
13
Khuli Simoni Yimilila Vayahudi
1Simoni yahulila ndi Turifo umali khulaanga halala mukaanda kwa vasikali vanyishi, khandi ndi umali khuloshitsa khukwana shivala shia Yudeya nu khushitivitsa. 2Yalola khandi ndi makhuva kenako kalombi vandu vatechelanga nivaria. Yasimukha natsia Yerusalemi, nalaanga vandu khwitsa halala. 3Yavatinyilitsa, navoola, “Munyi vene mwamanya vindu viu khuchenyinya via inzi halala na vamwavo vaanje nende vandu vi inzu ya tata wanje khwakhola shichila malako nende Litempeli. Mwamanya khandi makhuva khulondokhana khu maahe nende matiinyu ka khwavirilamu. 4Khali vamwavo vaanje voosi vayiirwa, shichila khukwanila shivala shia Israeli, khandi ninzi wonyene warikala. 5Navutswa leshi kavuli khuvoolwa ndi inzi nachelitsa khuhonyinya vulamu vwanje mumatukhu ka matiinyu kakhukwila. Mwene shinyala khwivukula khuva mulahi muno khuvira vamwavo vaanje tawe. 6Navutswa nzitsanga khuvanzila kakholwa khu shivala shianje, khu Litempeli, khu vakhali veru nende vaana veru, shichila vandu vi tsimbia tsindi tsiosi vamali khwivunjelitsa halala khwitsa khukhutivitsa khurulana khu lishiendekha.”
7Makhuva kenako kachila vandu nivava ni tsingulu mu mwoyo, 8nivachipa nu mwoyo mukali, “Nivi uli mwimilili weru havukono ha vamwavo vovo Yudasi nende Yonatsani. 9Khukwanile mu maahe, na khutsi khuliitsa khukhola shia shindu shiosi shia uliitsa khukhuvoolela.” 10Nalwo lwa Simoni yalaanga halala vasikali voosi nakhola vwangu khutsia khumalila khulomba masisi ka Yerusalemi nu khutinyinya mu tsimbeka tsiosi tsimbinga tsia Yerusalemi. 11Yaruma Yonatsani mwana wa Abisolomu mu litaala lia Yopa, halala nu mukaanda kwa vasikali vanyishi. Yonatsani mwenoyo yilukhanyinyayo vandu vamenyanga mu shivala shienesho, khali natsililila khumenyayo.
Khuli Turifo Yaveha khandi Nakaata
12Nalwo lwa Turifo yarula mu litaala lia Putolemi, halala nu mukaanda kwa vasikali vanyishi natsia khukwana shivala shia Yudeya. Yali uvukule amwavo wewe Yonatsani khuli nu muvohe. 13Simoni yasimiikha liheemo lielie liu khumenyamu havundu halaangwangwa Adida khuluveka lundi lu mu lwomera. 14Lwa Turifo yahulila makhuva ndi Simoni umali khwamihitswa havukono ha amwavo wewe Yonatsani, khandi ndi umali khwiyavaala viuchi khumukwana mu liihe, yamurumila likhuva livoolanga, 15“Ngumili amwavo wowo Yonatsani khuva muvohe, shichila lwa yali nashili khu muhinzilu kwekwe, yali ni likoovi liu mu livishilu ya vandu vi inzu yu vwami. 16Nderelayo nunundi ifetsa tsikilo 3,000, halala na vaana veve vavili khuva khuli vavohe, khulu khumwikalila khuvula khukhukwana lwa khuliitsa khumuvoholola.”
17Simoni yamanya ndi vandu venavo vamukaatanga, navutswa yaruma mundu khutsia khulera tsisenti nende vaana, khwenya akhole vutsiku mu vandu valiitsa khuvoola, 18“Simoni ava niyamurumila tsisenti nende vaana veve, Yonatsani shiyali wiirwa tawe.” 19Simoni yakhola khuli Turifo yali niyavoola; nikhali Turifo yameneka lilaaka lielie, natsililila khuvoha Yonatsani.
20Matukhu mati nikakhavira, Turifo yitsa khuseera shivala nu khushitivitsa. Yavotokhana shivala shienesho khuluveka lundi lwi injila itsitsanga havundu halaangwangwa Adora. Navutswa Simoni halala nu mukaanda kwa vasikali veve vatsililila khuroonjela khuluveka lundi, shia havundu hosi lwa yali natsitsanga. 21Mumatukhu kenako, vandu vali nivali mu imbinga ya Yerusalemi varumanga vandu khu Turifo khumuvoolela nayaanza yitsi khuvalola khuvirila khuluveka lundi lwi shiangalangwi, nu khuvalerela shiukhulia. 22Turifo yanyola mukaanda kwa vasikali veve vi tsifarasi voosi khutsia khu luchendo, navutswa imparafu yi tsingulu muno yakwa mu vutukhu vwenevo; yalekha khutsia, shichila imparafu yeneyo. Yarulaho, natsia mu lusomo lwa Gileadi. 23Lwa yali niyakhatukha havundu halaangwangwa Basikama, yiira Yonatsani. Yonatsani yayeveelwayo mu shilindwa. 24Nalwo lwa Turifo yakalukha ingo wa yarulanga.
Shilindwa shia Yonatsani
25Simoni yaruma vandu khutsia khuvukula mmbili kwa Yonatsani, manayeveela amwavo wewe mu litaala lia Modehini, litaala lia vakuuka veve. 26Shia mundu wosi mu shivala shia Israeli yamulila mu vuveleli mu mwoyo, khandi namwikhula khumatukhu manyishi. 27Simoni yumbakha munaara ku khwitsushitsilakhu khu shilindwa shia kuuka wewe khandi amwavo wewe. Yashiraambihitsa khu shilolwi, navikha lichina liavekhwa ilaanji isasananga imbeli wi shilindwa shienesho nende inyuma. 28Yumbakha khandi tsipiramidi saba iyi neyo, shichila tata wewe, mama wewe nende vamwavo veve vane. 29Yavotokhana tsipiramidi tsienetso ni milondi miraambi muno chiu khusinjililakhu. Yavikha khu tsipiramidi tsienetso viuchi vinyishi lukanu, khu vive vindu viu khwitsushitsilakhu khumatukhu koosi. Yavikha khundulu khwi tsipiramidi tsienetso tsimeli tsiakhongwa. Shia mundu wosi yali khu luchendo mu inyanza, yali walola vindu viu khwitsushitsilakhu vienevo. 30Shilindwa shia Simoni yali niyayeeva mu litaala lia Modehini, shilolekhayo nunundi.
31Turifo yashendeshela Mwami Antioko wa Sita, wali nashili muvukha; khali namwiira, 32niyamiha havukono hehe, nava Mwami wa Asia. Mwami Turifo yachila matiinyu nikakwila shivala shienesho. 33Navutswa Simoni yumbakha tsimbinga tsia Yudeya, khali natsivotokhana ni lisisi, minaara miraambi, masisi ki tsingulu, vilivwa vikali nende tsiboloti; manavikha viukhulia mu tsimbinga tsialiyo. 34Simoni yarovola khandi varumwa navaruma khu Mwami Demeturio wa Khavili namusayanga avuli khutaaya shivala shieshie likoovi; shichila Mwami Turifo yatsililila khuvayaaya miandu chiavo. 35Mwami Demeturio yamuchipa lwa yamuhandichila ibarwa ilondakhu yiyi,
36“Inzi Mwami Demeturio, mbandikanga ibarwa iyi khu Mukali wa vasalisi voosi Simoni, mulina wa vami, vimilili nende Vayahudi. Nyoli milembe voosi. 37Mali khunyola itaachi yalombwa khu itsahabu nende lusia lu musala kwa mashindu via mwanderela; ninzi mali khwirechekha khukhola lilakano liu khulera milembe na munyi. Mbolele vakarani veru vu vushuru valeshe khumutaaya makoovi ka muli nako. 38Lilakano lieru lia khwakhola na munyi lishitsilililanga khurweshitswa, khandi tsimbinga tsia mumbakha, tsiliitsa khutsililila khuva miandu chienyu. 39Mali khumusemeha khurula mu vutamanu vwosi, nende vindu vitamanu via mwakhola khali khulitukhu linu, khandi ndulitsaho vushuru vwa muli navwo khulondokhana khu itaachi; khandi vushuru vundi vwa vasoololanga mu Yerusalemi, vuliitsa khulekhwa khusololwa. 40Vayahudi voosi vali nu luyali vatushili khuhandikwa khuva valindi, khutukha vihandichitsi. Milembe chive hakari heru na munyi.”
41Khumuhika kwi imia indala na makhomi saba, lichiochi lia vandu vi tsimbia tsindi vatambitsanga Israeli liarulitswaho. 42Vandu varaanga khuhandika makhuva kavo vene nende malakano kavo mu makhuva yaka, “Khumuhika ku khuraanga kwa Mukali wa vasalisi voosi, mwimilili khandi mwamihi wa Vayahudi.”
Khuli Simoni Yakumila Litaala lia Gazara
43Mumatukhu kenako, Simoni yasimiikha liheemo lielie liu khumenyamu mu litaala lia Gazara, nalivotokhana nu mukaanda kwa vasikali veve. Yumbakha mutaalimbo kwiliihe, nakusuunda himbi khu lisisi li litaala likali, khali naseera mulala khu minaara chialiyo, nu khulivukula ni tsingulu. 44Vandu vali nivali mu mutalimbo kwenoko vinjila mu litaala, khandi shileeche nishilanda mu litaala lienelo. 45Vandu vi litaala lienelo, vasatsa nende vakhali vavo, halala na vaana vanina khu lisisi ni tsinguvu tsiarandukha. Valila nu mwoyo mukali, nivareevanga Simoni khukhola navo lilakano li milembe. 46Vavoola, “Uvuli khukhukhola khulondokhana khuu vutamanu vweru; navutswa ukhulolele tsimbavasi tsiotsio.” 47Nalwo lwa Simoni yahulishitsana navo, nalekha khuvakwana. Navutswa ya vakhunganyinya mu litaala likali, khandi nanihitsa tsinzu tsi misambwa chiali ni chiavikhwamu. Simoni nende vandu veve vinjila mu tsinzu tsienetso, nivimbanga tsinyimbo tsiu khwitsominya. 48Yarulitsa shifwavi shiosi mu tsinzu tsienetso, navoolela vandu vali vasuuvilwa valondanga malako vamenye mutsio. Yatinyinya khandi tsimbinga mu litaala lienelo, niyumbakhayo inzu yeye mwene.
49Vandu vali nivali mu imbinga ya Yerusalemi vikalilwa khurula mu shivala shienesho khutsia khukuula nu khukuulitsa vindu. Khulwa yako, inzala yavaleka, khali vanyishi khuvo nivakhutsa shichila inzala. 50Nalwo lwa valila khu Simoni khukhola lilakano li milembe navo. Simoni yahuchilila khukhola ka vali nivavooli. Simoni ya vakhungayo, nanihitsa imbinga yeneyo mu vutamanu vwosi. 51Khulitukhu lia khavaka liu mweli kwa khavili, khumuhika kwi imia indala makhomi saba nu mulala, Vayahudi vinjila mulio nivitsominyanga, nivachinji tsisia tsia mashindu. Vakhuvanga vukhana, manyanga nende matungu; vimbanga tsinyimbo shichila mutsiku mukali yali umali khukuurwa nu khurulitswa mu Israeli. 52Simoni yahaana lilako ndi litukhu lienelo likhoyelwi nu vuyaanzi shia khumuhika kwosi. Yatsililila khutinyinya tsimbinga tsi Litempeli liumbakhwa khu shikulu khuluveka lundi lwi imbinga. Ye mwene nende vasikali veve vamenyayo. 53Lwa Simoni yalola ndi mwana wewe mwene walaangwangwa Yohana umali khukwa mundu musatsa, yamurovola khuva mwimilili wi mikaanda chia vasikali voosi, ma Yohana mwenoyo namenya mu litaala lia Gazara.
Currently Selected:
1 MAKABAYO 13: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013