1 VAKORINZO 16
16
Shihanwa khu Vakristayo Vali Yerusalemi
1Khulondokhana khuli lwa musololanga tsisenti tsiu khukhonya vandu va Nyasaye: Mukhole khandi ka navoolela makanisa ki litaala lia Galatia kakhole. 2Shia khulitukhu lia Jumapili, shia mulala khu munyi khutukha are haluveka tsisenti, khulondokhana khuli anyolanga, matsivishi munjila indahi, khu mulivula khunyakhana khusololakhu lwa mba ninakhitsayo. 3Lwa niitsa khuva nindiyo, niitsa khuhaana khu vandu va munyi vene muliitsa khurovola tsibarwa tsiu khwimanyinya, khandi niitsa khuvaruma khuhila vihanwa vienyu Yerusalemi. 4Niiva kaliitsa khwenyekhana khali inzi khutsia, niitsa khutsia navo.
Khuloshitsa khwa Paulu
5Niitsa khumuchendelela, ninakhavirila shia havundu hosi mu lusomo lwa Mekadonia, shichila niitsa khuva nikhalakanyilanga mu lusomo lwenolo. 6Nikanyalikha, niitsa khumenya na munyi khumatukhu mati, khali khutukha mumatukhu ku vushindu, khu mukhonye khu luchendo lwanje, shia havundu hosi ha niitsa khuva ninzitsanga. 7Shinyenyi khumulola nunundi vutswa lwa mbiranga tawe. Nyenyanga khumenyakhu khumatukhu mati na munyi, niiva Mwami aliitsa khuyaanza kikholeshe kario. 8Navutswa niitsa khumenyakhu mu litaala lia Efeso khumatukhu mati khutukha khulitukhu lia Pentekosti; 9shichila mali khwikulilwa shiliango shiu khukhola muhinzilu mulahi kwenyekhanga; khali niiva khuliho na vandu vanyishi vambinganyinyanga.
10Niiva Timoteo anyala khwitsa yaho, mumwinjilitsi munjila indahi, shichila akholanga muhinzilu ku Mwami khuli inzi kholanga. 11Mundu avuli khumwambakhanakhu, navutswa mumukhonye atsililile nu luchendo lwelwe mu milembe, khu akalushi khwinzi. Mulindililanga akalushi hanu na vasuuvili vashieru.
12Khulondokhana khu musuuvili washieru Apolo: ninzi wamutinyilitsa nimuvoolela amuchendelele na vasuuvili vandi; navutswa wambakhane khwitsa nunundi. Aliitsa khwitsa nanyoli vwiyangu.
Mivaalo Kukhumalilikha
13Muve vacheli. Mutsililile khusinjila ni tsingulu mu lisuuvila lienyu. Muve vandu vali ni ikholo khandi tsingulu. 14Mukhole shia shindu shiosi nu mwoyo ku vuyaanzi.
15Vasuuvili vashianje, mwamanya vulahi ndi vandu vi inzu ya Sitefano, navo vali Vakristayo vu khuraanga mu litaala lia Akaya; khandi vali vayirulitsa vene khukhola muhinzilu kwa vandu va Nyasaye. 16Mwenyekhanga mulonde mwiima mulahi kwa vimilili khuli venavo, khandi kwa shia mundu wosi wu kholanga muhinzilu khandi urumikhanga navo.
17Ndi nu vuyaanzi shichila Sitefano, Forutanata nende Akaika vamali khutukha hanu; lwa vavukuli vwiyangu vwenyu, lwa munyi vene muvulaho. 18Vandinyilitsi mu mwoyo khuli vatinyilitsa munyi khandi. Vandu khuli venavo vatushili khusanditswa.
19Makanisa kali mu lusomo lwa Asia kamuheele milembe chiavo. Akwila nende Prisila, halala ni likanisa liakanilanga mu inzu yavo, vamuheele milembe mu Mwami. 20Vasuuvili voosi vali hanu, vamuheele milembe chiavo.
Muheelelane vene milembe chiu vuyaanzi khandi chiu vutakatifu.
21Inzi Paulu, mbandikanga yaka nimuha milembe.
22Niiva mundu alikhuho wambakhana khuyaanza Mwami, nu vulahi mundu mwenoyo namali khulaamwa!
Maranatha -- Mwami weru, hamba!
23Tsimbavasi tsiu Mwami Yesu Kristo tsive na munyi.
24Vuyaanzi vwanje vuve na munyi voosi khuvirila mu Yesu Kristo. Amina.
Currently Selected:
1 VAKORINZO 16: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
