1 VAKORINZO 15
15
Khwisimushitswa khwa Kristo mu Likhutsa
1Vasuuvili vashianje, nyenyanga khumwitsushitsa nunundi shindu khulondokhana khu Ivanjeli ya namwilwatsila, ya mwahulila khandi yi lisuuvila lienyu liumbakhwakhu. 2Nayo Ivanjeli yachila numuhonyinywa; niiva munyala khutsililila khuchilonda ni tsingulu -- nikakhavele lisuuvila lienyu liali lia vutswa.
3Ninzi wa mwilwatsila makhuva ka nechitswa, kali nu vukhonyi vunyishi muno: ndi Kristo yakhutsila khu musalaba shichila vwoni vweru, khuli kahandikwa mu Mahandiko Matakatifu; 4ndi yayeveelwa mu shilindwa khandi ndi matukhu kavaka nikakhavira, yisimushitswa khurula mu likhutsa, khuli kahandikwa mu Mahandiko Matakatifu; 5khandi ndi yalolekha khu Petro, khandi khu varumwa likhomi na vavili. 6Yesu yalolekha khandi khu vasuuvili vandi vaviri tsimia tsiranu khu isaa indala yeneyo. Vanyishi khuvo vashili mwoyo, khali niiva valala khuvo vakhutsa. 7Lulondakhu, yalolekha khu Yakobo, khandi khu varumwa vandi voosi.
8Lukhumalilikha lwene, yalolekha khwinzi khandi, khali niiva nali khuli mundu wali niyahululwa#15:8 wali niyahululwa: inoho wivulwa matukhu ku khwivulwa nikashili khutukha.. 9Ndi murumwa mutititi mwene mu mihinzilu chia varumwa vakholanga mu varumwa vandi voosi; khali shindushili khulaangwa murumwa tawe; shichila natambitsanga likanisa lia Nyasaye. 10Navutswa khuvirila khu tsimbavasi tsia Nyasaye ndi khuli lwa mulolanga; khandi tsimbavasi tsietsie tsia yandolela, shitsili tsi shikhaya tawe. Khuluveka lundi, nakhola muhinzilu ni tsingulu tsinyishi khuvira varumwa vandi voosi, khali niiva ni kilikali shiali ninzi wakhola mwene muhinzilu tawe; navutswa tsimbavasi tsia Nyasaye, natsio tsia kholanga muhinzilu mwinzi. 11Khali ndio, niiva yarula khuvo inoho khwinzi, yaka nako ka voosi khwilwatsanga; khandi nako ka mwasuuvila.
Khwisimushitswa khwa Vakhutsa
12Navutswa niiva khwilwatsanga ndi Kristo yisimushitswa khurula mu likhutsa, valala khu munyi vanyala khuvoola munjila shina khwisimushitswa khwa vandu vakhutsa khurula mu likhutsa khuvulaho? 13Niiva khwisimushitswa khwa vandu vakhutsa khurula mu likhutsa khuvulaho, khu khali Kristo shiyisimushitswa khurula mu likhutsa tawe. 14Niiva Kristo shiyisimushitswa khurula mu likhutsa, khwilwatsa khweru nu khwi shikhaya vutswa, khandi lisuuvila lienyu ni li shikhaya. 15Khumeeta khu kenako, khunyolekhanga khuva vashiahidi vu vuvehi khu Nyasaye, lwa khuvoolanga Nyasaye yisimushitsa Yesu khurula mu likhutsa. Navutswa shiyamwisimushitsa khurula mu likhutsa, niiva toto vandu vakhutsa shivanyala khwisimushitswa khurula mu likhutsa tawe. 16Niiva vandu vakhutsa, shivanyala khwisimushitswa khurula mu likhutsa, khali Kristo shiyisimushitswa khurula mu likhutsa tawe. 17Niiva Kristo shiyisimushitswa khurula mu likhutsa, lisuuvila lienyu ni li shikhaya; khandi mushitsilililanga khukhola vwoni vwenyu. 18Kanyala khuvoolwa khandi ndi vandu vakhutsa nivasuuvila mu Kristo, vamala khutivitswa. 19Niiva lwa khushili mwoyo khuli ni lisuuvilitswa mu Kristo, nu vulahi nu khuvelelwi tsimbavasi khuvira vandu vandi voosi mu shivala.
20Navutswa ni katoto ndi Kristo wa yisimushitswa khurula mu likhutsa, khuli shimanyilu shiukhuraanga ndi vandu vakhutsa valiitsa khwisimushitswa khurula mu likhutsa. 21Lwa likhutsa lialolekha mu shivala khuvirila khu mundu mulala, nindio khandi khwisimushitswa khwa vandu vakhutsa khurula mu likhutsa khwalolekha khandi khuvirila khu mundu mulala. 22Khuli vandu voosi vakhutsanga mu Adamu, nindio khandi vandu voosi valiitsa khwisimushitswa khurula mu likhutsa khuvirila mu Kristo. 23Navutswa shia mulala, aliitsa khwisimushitswa khurula mu likhutsa khulwelwe mwene munjila yenyekhanga: Kristo neye uliitsa khuraanga khwisimushitswa khurula mu likhutsa, ma vandu vasuuvila mu Kristo valilondakhu khulitukhu lia aliitsa khwitsa. 24Nikamali khwikholekha kario, shiheeli shilitsa khutukha, lwa Kristo aliitsa khukuura shia mwamihi, shia vunyali khandi shia tsingulu tsiosi; khandi ahaane Vwami khu Nyasaye, uli Tata. 25Kristo aliitsa khwamiha khutukha lwa Nyasaye aliitsa khukuura vatsiku voosi nu khuvara ha vilenje hehe. 26Mutsiku uliitsa khuva wu khumalilikha khutivitswa ni likhutsa. 27Mahandiko Matakatifu kavoolanga, “Nyasaye wavikha viosi ha vilenje hehe.” Kalolekhanga havulavu khuva katoto, navutswa likhuva “Vindu viosi” shikalimu na Nyasaye, wavikha vindu viosi hasi ha Kristo tawe. 28Navutswa lwa aliitsa khuva niyakhavikha vindu viosi hasi wu vwamihi vwa Kristo, nalwo lwa Mwana aliitsa khuva hasi ha Nyasaye, wavikha vindu viosi hasi hehe; khu Nyasaye aliamiha vindu viosi.
29Niiva khwisimushitswa khwa vandu vakhutsa khuvulaho, khu ni kave ndina khu yavo vali mwoyo vabatiswa havukono ha vandu vakhutsa venavo? Niiva vandu vakhutsa shivanyala khwisimushitswa khurula mu likhutsa tawe, shichila shina vandu vabatiswangwa havukono havo? 30Shichila shina khutsi khuli mu maraava tsisaa tsiosi? 31Vasuuvili vashianje, shia litukhu liosi likhutsa lia nindilila! Vwiloli vwanje shichila munyi, mu limenya lieru mu Mwami weru Yesu Kristo, vuchilanga nimbola havulavu ndio. 32Niiva nakwanakana ni tsinyama tsiumbulimu, lwa nali nimenyanga mu litaala lia Efeso khurulana khu shivune shianje mwene lwandi mundu, vukhala shina vwa nanyola? Niiva vandu vakhutsa valiitsa khuvula khwisimushitswa khurula mu likhutsa,
“Chendi khulii nu khung'wa,
shichila khuliitsa khukhutsa mukamba.”
33Muvuli khwikaata vene. Vandu vi miima mitamanu vononyinyanga vandu vi miima milahi. 34Muchelihi khuli mwenyekhanga, khandi mulekhane nu vwoni; shichila valala vali mu munyi vavulakhu vucheli vwosi khulondokhana khu Nyasaye -- mbolanga ndio khumuha tsisoni.
Khwisimushitswa khu Mmbili ku Mukhutsu
35Navutswa mundu anyala khureeva, “Vandu vakhutsa valiitsa khwisimushitswa khurula mu likhutsa munjila shina? Valiitsa khuva nu mmbili lukanu shina?” 36Yivi mundu muyiingwa! Shindu shia uraakanga shishinyala khumeelakhu nishishili khukhutsa tawe. 37Shindu shia uraakanga, shikali uraakanga mmbili kwa nu kuve tawe, navutswa vukuutsa vukhaya vwonyene, haundi nu vwi inganu inoho vukuutsa vwi shindu shindi. 38Navutswa Nyasaye aheetsanga shindu shienesho mmbili khuli mwene arovole kakholeshe; khandi ahaananga khu shia vukuutsa mmbili kwenyekhanga.
39Mivili chi vindu viosi vili mwoyo, shichili chiosi ni milala tawe. Vandu vali nu mmbili kusasananga; tsinyama tsili nu mmbili kundi; manyonyi kali nu mmbili kundi; khandi tsisutsi tsili nu kundi.
40Khuliho ni mivili chiu mwikulu nende chiu khulilova; navutswa vukhumi vwi mivili chiu mwikulu nende chiu khulilova vwa yavukhana. 41Liuva lili nu vukhumi vwalio liene, mweli nu vukhumi vundi, khandi tsinyining'ini vukhumi vundi. Vukhumi vwi inyining'ini indala vwa yavukhana nu vukhumi vwi inyining'ini yindi.
42Nindio khandi kaliitsa khwikholekha, lwa vandu vakhutsa valiitsa khwisimushitswa khurula mu likhutsa. Mmbili kuyeveelwangwa mu shilindwa kuvetsanga kwakhutsa; navutswa nu kwa khisimushitswa khurula mu likhutsa, shiukuli kwakhutsa tawe. 43Kuyeveelwangwa mu shilindwa, vuchila luyali lwosi; navutswa kuheelwa vukhumi nu kwa khisimushitswa khurula mu likhutsa. Kuyeveelwangwa mu shilindwa nu vuteteshele, navutswa kuli ni tsingulu nu kwa khwisimushitswa khurula mu likhutsa. 44Kuyeveelwangwa mu shilindwa, khuli mmbili ku mu shivala; navutswa kwisimushitswangwa khurula mu likhutsa, khuli mmbili kwa Roho yimililanga. Niiva ni kilikali, khuliho nu mmbili ku mu shivala, khuliho khandi nu mmbili kwa Roho yimililanga. 45Khulwa yako, Mahandiko Matakatifu kavoolanga, “Mundu wali wukhuraanga walaangwangwa Adamu yaloongwa khuva mwoyo”; navutswa Adamu wu khumalilikha, neye Roho uhaananga vulamu. 46Shikanyala khuva mmbili kwa Roho yimililanga, nakwo kwali ku khuraanga khwitsa tawe, navutswa mmbili ku mu shivala nakwo kwaraanga; mmbili kwa Roho yimililanga nu kulondakhu. 47Mundu wali wukhuraanga yaloongwa khurula khu malova; navutswa mundu wa khavili neye warula mwikulu. 48Vandu vamenyanga khulilova, vali khuli mundu waloongwa khurula khu malova. Yavo vu mwikulu vali khuli woyo warula mwikulu. 49Lwa khuli ni likoondo khuli liu mundu waloongwa khurula khu malova, nindio khandi khuliitsa khuva ni likoondo khuli lia woyo warula mwikulu.
50Vasuuvili vashianje, nyenyanga khumuvoolela ndi shindu shialombwa khuva nu mmbili nende masahi, shilitsa khuvula khunyola Vwami vwa Nyasaye; khandi shindu shitushili khukhutsa, shilitsa khuvula khuva khuli shindu shikhatushili khukhutsa.
51Hulishitsikhu muvoolele katoto kaviswa: Khutsi voosi shiukhuliitsa khukhutsa tawe, navutswa khuliitsa khukalukhanyinywa 52vwangu muno, khuli imoni itemula temulanga, shisiliva shiu khumalilikha nishiakhakhuvwa. Lwa shisiliva shilitsa khukhuvwa, vandu vakhutsa valiitsa khwisimushitswa khurula mu likhutsa ni mivili chiliitsa khuvula khukhutsa; ma voosi khulikalukhanyinywa. 53Khutukha shindu shilitsa khutivitswa shiliitsa khuva khuli shindu shilitsa khuvula khutivitswa; khandi shitushili khukhutsa shiliitsa khuva khuli shindu shikhatushili khukhutsa tawe. 54Lwa mmbili kutushili khutivitswa kuliva nu mmbili kukhatushili khutivitswa, khandi shindu shitushili khukhutsa shiliva nu mmbili kukhatushili khukhutsa tawe; nalwo lwa Mahandiko Matakatifu kaliitsa khuva karweshitswi: “Likhutsa limali khutivitswa; likuura linyoleshe!” 55“Yivi likhutsa, ni hena ha likuura liolio lili?
Yivi likhutsa, ni hena ha tsingulu tsiotsio tsiu khusalilitsa tsili?”
56Likhutsa linyolanga tsingulu tsiu khusalilitsa khurula khu vwoni; khandi vwoni vunyolanga tsingulu khurula khu Malako. 57Navutswa khusanditsanga Nyasaye uchilanga nu khunyola likuura khuvirila mu Mwami weru Yesu Kristo!
58Khulwa yako, vasuuvili vashianje va nayaanza, mutsililile khusinjila ni tsingulu nu khulekha khuhaya haya. Muvuli khukoyanyinywa! Shia khase khosi mutsililile khukhola ni tsingulu muhinzilu ku Mwami, shichila mwamanya vulahi ndi muhinzilu kwosi kwa mukholanga mu Mwami, shiukuliitsa khuva kwi shikhaya tawe.
Currently Selected:
1 VAKORINZO 15: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
