Isabulin 90
90
Ekitabo Lokiwong'onet
(Isab 90—106)
Loka Akuju ka etung'anan
Akilip ka Musa, etwan ka Akuju.
1Okwai Lokapolon, irait ijo ng'in pak nama ing'opiteter siong',
kauri kere.
2Ering'a imoru kejaikina, kere de ering'a kisubuna akwap,
irait ijo Akuju ikaru kere,
3Inyakanari ijo etung'anan alipo,
ka atemar, “Kobong'o alipo!”
4Ikaru aritat kama kon eraito bala apaaran ape;
eraito bala idian, na adau atubor, bala apaki na euriana kware.
5Icakanari ijo itung'a nama elwana bala eruja!
Bala inya lu iteteuno taparacu.
6Elibete taparacu ka akiteteun,
erinyete ka awokore ebong'.
7Amudia siong' anyunyura kon;
etukuriana siong' anyunyura kon.
8Igwaaki ijo arokusio kosi king'aren kon,
igwaaki ijo arokusio kosi nu ing'adaara nama ibeikiitere ijo aanyun kesi.
9Kanyunyura kon ewolie akijar kosi;
etuborosi bala akiweiwea.
10Ikaru akaisakanykaare kes luka akijar wok kere ikaru akaisakanykauni, kicasito oni;
konye ikaru ng'ulu kijokin eraito icani ka akituur;
etuborosi atipet, kasodete oni awol atipet.
11Ng'ai ejeni agogong' naka anyunyura kon?
Ng'ai ejeni nu eyauni anyunyura kon?
12Kisisianaki siong' ekipone lo eurianare akijar kosi,
tetere ijaikinosi siong' ka acoa.
13Akitodolo iwori itolosit anyunyura kon?
Kisoni, Okwai Lokapolon lukejaanakinak kon!
14Kisimonik siong' taparacu ka amina kon kana emam esial,
tetere ibeikinete siong' ekiruke ka ajaus ka ailel kakijar kosi kere.
15Koinaki siong' alakara kapaarasia kanu ipu,
kwape inakina ijo siong' ikaru lu ipu luka akicana.
16Kinyek siong', lukejaanakinak kon kaanyutu asoma kon;
ka agogong' kon naka akibusesu.
17Lokapolon Akuju kosi, kinyek kojaikinosi akibusesu kon ka siong',
Koinaki siong' apedor naka asoma kojokan kang'in ibore kani isomaete siong'.
Currently Selected:
Isabulin 90: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
