Isabulin 89
89
Ekiruke kapak kanaka ican ka akwap
Amaskil ka Etan ajena ka Esra.
1Okwai Lokapolon abuni eong' ekiruke ng'in pak kuju ka amina kon kana emam esial;
abuni eong' alimonor kuju ka amuno kon ikaru kere.
2Ajeni eong' ebe amina kon na emam esial ebuni akitoloto apakio kere,
bobo ebe amuno kon ideun ejii bala kuju.
3Ibu ijo kotema, “Etene eong' akitutuket nepepe ka etwan kalo abu eong' kaseu;
esumuniki eong' lokejaanakinan kang' Daudi,
4‘Ipe kamaka auri kon nes ebuni araun ejakait;
abuni eong' akidara apugan naka auri kon ikaru kere.’ ”
5Kirukok kuju iboro lu isomae ijo;
lukalaunak irukosi kuju ka amuno kon, Lokapolon.
6Emam itwan ipede kokuju erait bala ijo, Lokapolon;
emam imalaikat ipede iiriaka ka ijo.
7Kikurianite ijo kobarasa ka lukalaunak;
bobo kesi kere lukimanakiito ijo ejaasi ka akurianu.
8Okwai Lokapolon Akuju loka agogong' kere,
emam itwan ipede ejaasi ka agogong' bala ijo;
koboro kere imunokina ijo, Okwai Lokapolon.
9Ipugae ijo akare naka agogong';
itataunene ijo tii ikokoron keng' lukadedeng'ak.
10Ibu ijo kipirica emun Raab ka akiyara;
ibu ijo kisiarak ipading'atin kon ka agogong' kon.
11Kuju eraito nakon, akwap de erait nakon;
ijo nes ijeuni akwap nepepe ka iboro kere lu ejaasi toma akwap.
12Ibu ijo kosub agolitomei ka ng'alakimak;
Emoru loko Tabor nepepe ka Emoru loko Amon kirukokiito ijo kalakara.
13Ijaasi ijo ka agogong' noi!
Ikoni agogong' kon epolo ai!
14Agwoetait naka ajakaanut kon erait adolite ka asoma nu itemokina;
amina nepepe ka amuno itodiara kamaka nu isomae ijo kere.
15Ejaasi ka asulwany itung'a lu ejenete akimaa ijo ka ikirukesinoi elakara,
lu iboete kotoma acaus naka ajokus kon, Okwai Akuju Lokapolon.
16Elakara kesi apaaran kere kanu kon,
ka akiturite ijo kanuka adolite kon.
17Iinaki ijo siong' agogong' kon naka akilanya;
kamina kon idumunete siong' apedor naka akilanya.
18Okwai, Akuju Lokapolon, ijo nes ebuku kosi,
elomuut ejakait kosi kama kon, Okwai Lokalaunan loko Israel.
Asumunikinete ka Akuju namaka Daudi
19Koruja sek, ibu ijo kolimok lokejaanakinan kon loka amuno,
“Egwaaki eong' apugan namaka epe kalo ejaasi ka agogong',
ainaki eong' apugan epe lo aseun alomun ko otung'a.
20Adau eong' adumun Daudi, lokejaanakinan kang';
enyonyoiki eong' nesi kakinyet kang' nakalaunan.
21Ejaikinosi agogong' kang' ka nesi ng'ini pak,
ebuni apedor kang' akisicata nesi.
22Mam cut ipading'atin keng' kilanyete nesi;
luka arokusio mam kisicanete nesi.
23Abuni eong' akipiricar ipading'atin keng';
ka akiyara ng'ulu kere lu mam keminasi nesi.
24Abuni eong' amina nesi ka ayong'ite nesi;
ng'ini paki abuni eong' ainakin nesi apedor naka akilanya.
25Abuni eong' akiyatakin ajakaanut keng'
ageun ka akare kanako Mediterenian adolore Ang'olol nako Yufrets.
26Ebuni nesi alimokin eong', ‘Irait ijo papa kang' ka Akuju kang';
irait ijo lokedaran kang' ka lokeyuunan kang'.’
27Etarauni eong' nesi esapat kang' losodit,
lo epolo kamaka ijakaa kere.
28Abuni eong' ng'ini paki asoma nu esumuniki eong' nesi,
bobo akitutuket kang' ka nesi ebuni akideun ikaru kere.
29Enyekini eong' auri keng' naka lukepugak kitoloto ikaru kere;
nepepe ka apugan keng' bala kuju.”
30“Konye kenwang'ata luka auri keng' ekisil kang',
keng'eroto kesi akigwapite acorasia kang',
31keng'eroto kesi akitup acorasia kang'
ka aking'ere ayong'ite ikisila kang',
32abuni eong' akitisilaar kesi kanuka arokusio kes;
abuni eong' akisicana kesi kanuka arokusio kes.
33Konye mam eong' kenyekini amina Daudi
kere de aking'er asoma nu esumuniki eong' nesi.
34Mam eong' kabili akitutuket kang' ka nesi,
kere de akibelokin akirot apede na abu eong' ketumunik nesi.”
35“Eyapoki eong' katipe bon kalaus kang';
mam eong' keng'alakini Daudi.
36Ebuni ajena keng' akideun ikaru kere;
ebuni apugan keng' akideun bala akolong'.
37Ebuni akideun ikaru kere bala elapa, elomuni kokuju.”
Akimonyo kanuka Akilanyo ka Ejakait
38Konye icakaa ijo bobo ing'ere ijo,
inyunyuraki ijo ejakait kon lo inyonyoikiite.
39Ibili ijo akitutuket kon na ibu ijo kipiak ka lokejaanakinan kon;
icakaki ijo abokoki keng' toma apua.
40Itijaki ijo kwap arwatan nuka ere keng' lokapolon,
ibilibili ijo ang'opesia keng'.
41Ekokoete ng'ulu kere lu etubitosi kaneni iboro keng';
ekwenatatare ipadukotin keng' kere nesi.
42Iinaki ijo ipading'atin keng' apedor naka akilanya;
italaka ijo ipading'atin keng' kere.
43Iinaki ijo ijiito keng' abutung'ung';
inaki ijo ilanyo nesi kojie.
44Idema ijo nesi apolou keng' naka araus ejakait,
kosodi ijo akibirokin kwap apugan keng'.
45Ituriana ijo apaarasia keng' nuka araus nikatumunan,
kosodi ijo akirapa nesi ka asilutu.
Alipasit naka akote Alakunio
46Lokapolon, ibuni ijo ang'opite ikaru kere?
Ebuni anyunyura kon akinepe bala akimi ka apak kana etia ai?
47Kiitute kwape eurianare akijar kang';
kiitute ebe ibu ijo kosub siong' kere iraito lu itwakete!
48Ng'ai ebeikiit akijar komam ketwani?
Ng'ai ebeikini ayuun akwana keng' katwanare?
49Lokapolon, ani amina kon nakisek na emam esial,
na ibu ijo kisumunik Daudi kamunokina kon?
50Kiitute Okwai Lokapolon ekipone lo erasiere lokejaanakinan kon;
ekipone lo ekanyia eong' araton alomun kotung'a kalu mam kiminasi ijo.
51Erasiete ipading'atin kon ejakait kon lo eseute, Okwai Lokapolon!
Erasiete kesi nesi kang'in alaro kana elosi nesi.
52Kiturwoi Lokapolon ikaru kere!
Ikote nepeneni! Ikote nepeneni!
Currently Selected:
Isabulin 89: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
