Isabulin 55
55
Akilip naka Itwan kani Agwelarit Ipoupa
Nama kalo epolokiit ekiruke: Loka iboro luka aunoi. Amaskil ka Daudi.
1Kiira akilip kang', Okwai Akuju;
mam ang'oliar awai ka akimonyo kang'!
2Kopup eong', bobo kobong'ok eong';
adau eong' akiyalolong'.
3Esiceku eong' akitukurian ka ipading'atin kang',
kepirica eong' akisicanio ka itung'a kalukarokok.
Einunete kesi eong' icani; enyunyurasi kesi ka eong' bobo ereito eong'.
4Eceki eong', bobo ipiricarit eong' akitukurian naka atwanare.
5Ekamu eong' akurianu ka akicek; ekamu eong' akurianu.
6Kere kajaasi eong' ka abenokoka bala ajele.
Tia eong' aporori kadumun akiyeng'un.
7Tia eong' aporori nama elwana ka akiduk ere kang' moding'.
8Tia eong' eburuburari akouni amecat,
nama eluwana kamaka ekuwam ka ekatapiro.
9Kiguruok ejori ka ipading'atin kang', Okwai Lokapolon!
Etee eong' ejie ko ore lokapolon,
10irimokit ere lokapolon akware ka apaaran,
ilelebit adiakanareta nepepe ka ican.
11Ejii amudiaro ng'olo wai;
ileleba akisicanio ka akideme korotin.
12Kere kerait ipading'a nes ekwenar eong', tia eong' ekanyakini;
kere kerait ipading'a nes ipoga kuju kang', tia eong' ang'opikini nesi.
13Konye erait ijo, ipoupa kang' ni ijaasi ka eong' ng'in pak bobo ipoupa ni api.
14Enaminamito oni nenipe bobo elipienenete oni nenipe ko Otogo ka Akuju.
15Elipit eong' kotwakata ipading'atin kang' ering'a apaarasia kes kedolo;
elipit eong' kolototo kesi ejarete akwap ka lukatwak!
Ejii aronus oreria kes nepepe ka otawon kes.
16Konye eworote eong' Lokapolon Akuju king'arak eong',
bobo ebuni nesi ayuuni eong'.
17Taparacu, paran, kware, elosete apodo kang' ka apipilu kang' nama keng',
bobo ebuni nesi apupun eporoto kang'.
18Ebuni nesi akinyakun eong' kojokan alomun kojiye
kalo ajiosio eong' ka ipading'atin kang' lu ipu.
19Akuju lo ipugae ageun sek, epupuni eong' kosodi akilanya kesi;
naarai ang'eroto kesi akibelokin, bobo mam kesi kekuriakito nesi.
20Kolomik opoupa kang' loka sek ipoupatin keng';
abu nesi kobil akitumuneta keng'.
21Alelet akiro keng' adepar akinyet ka akiteng', konye kejii eding' toma otau keng';
etililimete akiro keng' bala akinyet, konye etubete bala ileng'ia lukaujak lu ekwaka.
22Kinyekina Lokapolon ican kon, ebuni nesi akidara ijo;
mam nesi kejalakini kilanyai itung'a lu edolito.
23Konye ijo Okwai Akuju iari lukaarak ng'ulu nepepe ka iliokoikis ng'ulu atesin kes
ering'a atutubet ka akijar kes kedauna.
Konye eong' amunokini ijo.
Currently Selected:
Isabulin 55: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
