Isabulin 51
51
Akilip naka arimakino
Nama kalo epolokiit ekiruke. Ekiruke ka Daudi, na abunia ekadwran Natan nama keng', kedau nesi apero ka Batseba.
1Korimak eong' Okwai Akuju,
kanuka amina kon na emam esial.
Kanuka akitimio kon na epolo komwata arokusio kang'!
2Kilong' eong' kojokan kotoma adiakareta kang' kere,
bobo kitalau eong' kotoma aronus kang'!
3Anyu eong' adiakanareta kang';
ejasi arokusio kang' king'aren kang' ng'in pak.
4Esomaki eong' ijo aronus — ijo bon —
bobo esomate nu itee ijo erait aronus.
5Arono eong' ape kidounere eong';
ape kalomia eong' akook, ajaasi eong' ka aronus.
6Amunokina ka abeite nes ikote ijo;
kileleb adama kang' ka acoa kon.
7Kolema aronus kang', kasodi eong' alaun;
kilong' eong', kasodi eong' acaun akilanya akako.
8Kileleb eong' ka ailele nepepe ka alakara;
kinyek akojo nu idau ijo abilibil kolelata.
9Kopalik akitere adiakar kang'
bobo komwata aronus kang' kere.
10Kosubak toma kang' etau lo elae, Okwai Akuju,
bobo kipiak toma kang' emoyo lokitetet kalo edolit.
11Mam akireng'iar eong' ka akonyen kon;
mam alemar Emoyo kon Lokalaunan kama kang'.
12Koinak eong' bobo ailele na ejii toma alakuno kon,
bobo koinak eong' amina ayong'ite ijo.
13Kasodi eong' akisisianakin lukarokusio ikisila kon,
kosodete kesi abong'un nama kon.
14Kideu akijar kang', Okwai Akuju, bobo kolaku eong',
kasodi eong' alimor adolite kon kalakara.
15Lokapolon, king'arak eong' ejori,
kasodi eong' akitur ijo.
16Mam isuban kitalakarito ijo,
nesi atenikina mam eong' kainakina ijo.
Ijo mam kikote isabani lukicwaa.
17Isubanit kang' erait emoyo lo iyapepera Okwai Akuju;
mam ijo king'eri emoyo lo iyapepera bobo kitoronikina.
18Okwai Akuju, kitodik Sayon asyanut kon bobo king'arak nesi;
koduk bobo arwatan nuko Yerusalem.
19Kosodi ijo alakar kanuka isuban kalu edolito, nepepe ka idutan kosi lu icueite;
bobo elemuno isuban luka imong'in kalutarin kon.
Currently Selected:
Isabulin 51: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
