Isabulin 44
44
Akilip naka akidario
Nama kalo epolokiit ekiruke. Amaskil loka Isapa ka Kora.
1Eirasi siong' kakii kosi, Okwai Akuju —
alimokisi luka asonya kosi siong' nu kibuu ijo kisoma,
kuju ka aumosia kanu kibuu ijo kisoma kapakio kes, kapakio kanuka sek:
2Ekipone lokireng'iara ijo elope itung'a lu kemam keminasi ijo ka akigwaakin itung'a kon akwap kes;
ekipone lo kisicania ijo akwapin nuce ka ainakin itung'a kon akitolot kojokan.
3Amam itung'a kon ayarete akwap ka ikileng'ia kes kalukaujak;
mam kesi elanyete ka agogong'u kes;
arait ka apedor kon ka agogong' kon,
arait kanuka ajaus kon ka kesi nes etodiari ebe ijaasi ijo ka kesi.
4Irait ijo ejakait kang' ka Akuju kang';
inanakini ijo itung'a kon apedor naka akilanya,
5bobo akitor apedor kon, nes elanyata siong' ipading'atin kosi.
Akitor okirori kon nes epudarata siong' lu arukitetere siong'.
6Mam eong' kamunokiit akabwa kang',
kere de ekileng' kang' lokaujan koyuu eong';
7konye iyuu ijo siong' kamaka ipading'atin kosi
ka akilanya ng'ulu lu ereito siong'.
8Namaka Akuju nes epogatatar siong' emam esial.
Bobo ainakinete siong' ekiror keng' akiyalama ikaru kere.
9Konye kipokona ing'ere ijo siong' ka akinyekin kilanyai siong';
mam bobo ijo kilosete nenipe ka luka ajore kosi.
10Ibu ijo king'araki siong' amotari kamaka ipading'atin kosi,
kosodete kesi ayaari iboro lu araito luokosi.
11Ibu ijo kojalak siong' etubiotubio bala amerekekin;
ibu ijo kisiarak siong' akwapin nu long'au.
12Ibu ijo kogwela itung'a kon kelope kikabel kidis
bala itung'a lu kedit etyae kes.
13Iteete ipadukotin kosi nu ibu ijo kisomak siong',
bobo ekwenatatare kesi siong'.
14Itarau ijo siong' lu ekwenar ka akwapin
imung'mung'ete itung'a akwes kes enwang'ito siong'.
15Mam keyong'ite eong' paran kere,
bobo arapak asilut akonyen kang'
16ka akiro nepepe ka anwang'it kalu karasete eong',
ko pone kaloka alomikinata ipading'atin kang' nepepe ka ng'ulu lu kenyang'ak.
17Esomakinosi nu kere kama kosi konye mam siong' kemuruokina ijo
atikere mam song' kabilito akitutuket na ibu ijo kiten ka siong'.
18Mam itauon kosi kebong'orito kau;
kere akejene kosi alomar koroto kon,
19Konye ibu ijo kinyek siong' kokiding' ka ityeng' luko moding' emam aking'arasit;
ibu ijo kinyek siong' kakirionus kana apolo noi.
20Kere kimuruokiit siong' ekiror ka Akuju kosi
kere aterar akanin kosi nama ka akuju kace,
21tia mam Akuju kanyuuti?
Naarai ejeni nesi nu eng'opito kotau.
22Konye erait kanu kon nes arenenere siong' ng'ini pak,
nes eyaritere siong' bala amerekekin nu etubio.
23Konyou, Lokapolon! Inyo ijotoo ijo?
Kokwenyu! Mam acakar siong' ikaru kere!
24Inyo ing'opikiitere ijo siong'?
Mam akimuruokin icani kosi!
25Edeunosi siong' ebirokina kwap;
eminaikina siong' kwap.
26Konyou, kobuu king'arak siong'!
Koyuune siong' kanuka amina kon na emam esial!
Currently Selected:
Isabulin 44: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
