Isabulin 38
38
Akilip ka itwan kani icana
Ekiruke ka Daudi, kanuka edutat loka akiitunun
1Okwai Lokapolon, mam akitisilar eong' kanyunyura kon!
2Ikang'asa ijo eong' ka ikojoi kon;
ibiroki ijo eong' kwap.
3Kanuka anyunyura kon, eirarit eong' apipilu na epolo;
adekakin akwan kang' kere kanuka arokusio kang'.
4Alumi eong' kotoma akaale naka arokusio kang';
erait alang'iru na ekekes adakite.
5Kanu abang'anare eong',
esaete ajimi kang' bobo kebosata.
6Akudun eong', adaun akiriar eong';
amonyi eong' apaaran kere.
7Kabilibilarit eong' emusuja
bobo apiarit eong' atwanare.
8Kapas eong' noi bobo adaun akiriar eong';
icana etau kang', bobo agiro eong' kotoma apipilu.
9Okwai Lokapolon, ijeni ijo ibore ni akote eong';
ipupi ijo akimony kang' kere.
10Iposi etau kang', adauni agogong' kang',
etolikisi akonyen kang' acaus kes.
11Ekunyasi ipoupatin kang' nepepe ka ipadukotin kang' kama kang',
kanuka ajimi kang'; atikere luka ekale kang' ikunyarito kama kang'.
12Elokito eong' ng'ulu lu ekotosi akiyara eong',
bobo ng'ulu lu ekotosi akikang'as eong', itukurianete adaun eong'.
Mam kesi kinyekinete akitemeteme adaun eong'.
13Aputosi eong' ka ekiming' bobo mam kabeikini akipup,
bala ebang'ai bobo mam kabeikini ejori.
14Aputosi eong' ka ng'ulu lu mam kebong'okinete,
naarai mam kesi kebeikinete akipup.
15Konye amunokiit eong' ijo, Okwai Lokapolon;
bobo ijo, Lokapolon Akuju kang' nes ibong'okini eong'.
16Mam aisikin ipading'atin kang' kolelata kanuka akituur kang';
mam aisikin kesi ipogasi kanuka akibiror kang'!
17Aapu eong' akibiror,
bobo ajii eong' apipilu na mam kedaun.
18Esilari eong' arokusio kang',
kainakiito eong' akiyalolong'.
19Eng'aleete ipading'atin kang' bobo ejaasi ka agogong';
ipu lu ereito eong' emam atenikina.
20Ng'ulu lu etacete aronus kanuka ajokus
kareito eong' naarai atamakiit eong' esoma nukajokak.
21Mam akinyekin eong', Okwai Lokapolon;
mam aikar, Okwai Akuju!
22King'arakine eong' kipokona, Okwai Lokapolon lokalakunan kang'!
Currently Selected:
Isabulin 38: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
