Isabulin 37
37
Esial kalukarokok nepepe kalukajokak
Ekiruke ka Daudi
1Mam akiyalolong' kuju kalukarokok;
mam alilite kuju kalu isomaete nukarokok.
2Aaput kes awoli bala anya nu ewokito;
etwakete kesi bala iraan lu erinyete.
3Komunok Lokapolon, bobo kisoma nukajokak;
kiboi ka akwap kojokan.
4Kokou alakara kon kamaka Lokapolon,
bobo einakini nesi ijo nu ekote etau kon.
5Kipiak akijar kon namaka Lokapolon
komunoki nesi, bobo king'arakini nesi ijo;
6einakini nesi adolite kon acaun bala akolong' na ecae kiding' kaparan.
7Kojaasi ka atitinyu bobo kidarau Lokapolon kisomak;
mam akiyalong'ong'o kuju kang'ulu kalu ebarete
kere ng'ulu lu itelekarete kakitemetemesio kes kanukarokok.
8Mam acamun akiyalonong'o kere anyunyura; eyaunete ng'unu ican.
9Ng'ulu lu emunokiito Lokapolon, erauni akwap nakes
konye lukarokok ireng'iario king'a.
10Apak na edit ageun kipokona ewoliete lukarokok;
ibeikinete osi akote kesi konye mam osi kidumunete kesi;
11konye eyarete lu iyapeperasi akwap
kosodete alelikin abara nepepe ka aipuc.
12Itemetemete itung'a lukarokok nukarokok kuju
ka itung'a kalu ejoka ka akitere kesi ka areit.
13Konye ekwenare Lokapolon itung'a lukarokok,
naarai ejeni nesi ebe apuut kesi amudiaro.
14Elemunete lukarokok ileng'ia kes lukaujak
ka akudonokin imalia kes kanuka akiyara itung'a lukapalapalak,
atubutubu ng'ulu lu isomaete nukajokak;
15konye ebunio akiyara kesi kileng'ia kes kalukauja, ka kikulopek,
bobo ebunio amunaun imalia kes.
16Ejooka iboro lu edisiaka lu ejaasi ka itwan ni edolit
akilanya iboro lu ipu lu ejaasi ka itwan ni isomae nakarokok.
17Naarai elemari Lokapolon agogong' kalukarokok konye idari ng'ulu lu ejoka.
18Idari Lokapolon ng'ulu lu eyong'ito nesi,
bobo erauni akwap nakes ikaru kere.
19Mam kesi kedumunete icani eroko apaarasia;
ejaikinosi kesi kalu ilesikina kapakio kanuka akamu.
20Konye lukarokok etwakete;
ewoliete ipading'atin ka Lokapolon bala aturo nuko moding';
ewoliete kesi bala apuru.
21Ikopaete lukarok
konye mam ketacete,
konye itung'a lukajokak edutaka.
22Ng'ulu lu isulwanyikiit Lokapolon eyarete akwap,
konye ng'ulu lu ilamit nesi ireng'iaro.
23Eyait Lokapolon oni koroto kalo itemokina oni alosite
kosodi idari ng'ulu lu italakarito nesi.
24Kibirorosi kesi, mam kesi kideunosi kokwap,
naarai itonyouni Lokapolon kesi.
25Adit eong' sek, amojong' eong' kipokona,
konye mam eong' kaanyut Lokapolon inyekiit itung'a lukajokak
kere ilipanarosi idwe kes inyamen.
26Ng'ini pak einanakinete kesi itung'a luce kotoma alakara bobo ikopanakinete,
bobo idwe kes erait asulwanyi.
27Kinyekisi arokusio, kisomata nukajokak,
ebuni auri kus akiboi ng'ini pak ka akwap.
28Naarai emina Lokapolon nu edolito,
bobo mam kinyekini itung'a keng' lu emunokina.
Idari nesi ikaru kere, konye idwe ka itung'a kalukarokok ireng'iaro.
29Eyarete lu edolito akwap
ka akiboi kaneni ikaru kere.
30Akiro ka itung'a kalukajokak ejaasi ka acoa,
bobo akitukes kes inerasi nu edolito.
31Ipiakito kesi ekisil ka Akuju toma otawon kes
bobo mam kesi kinyekinete.
32Itung'a lukarokok iteete itung'a lukajokak
kosodete atamakin akiyara kesi;
33konye mam Lokapolon kebuni akinyekin kesi ka akanin ka ipading'atin kes
kere de akinyekin kesi etubokino kapak naka ekesi kes.
34Kipiak amuno kon akainin ka Lokapolon bobo koyong' ikisila keng';
ebuni nesi akiyong' ijo kokipone kaloka ainakin ijo akwap
kosodi ijo anyun itung'a lukarokok ireng'iaro.
35Apak ape ajeni eong' itwan nikaronon ni etosomae aturub noi;
auja nesi akilanya ng'ini itwan bala esida loko Lebanon;
36konye kokau katubor eong' kaneni, bobo mam nesi ajii;
abu eong' kakoo nesi konye mam eong' adumun nesi.
37Kwanyu itung'a lukajokak, kitee kojokan itung'a lu edolito;
ejaasi itung'a eminasi aipuc ka auri kes,
38konye luka arokusio emudiaro cut,
bobo emwataro cut auri kes.
39Eyuuni Lokapolon itung'a lu edolito
ka akidar kesi kapakio kanuka ican.
40Ing'arakit nesi kesi ka akitukuu kesi;
eyuuni nesi kesi kamaka lukarokok,
naarai elosete kesi nama keng' kanuka akidar kesi.
Currently Selected:
Isabulin 37: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
