Isabulin 33
33
Ekiruke loka akitur
1Osi kere lu idolito, kikareikisi kiporotoi kaluka ailel kanu esoma Lokapolon;
kiturwoto nesi osi kere lu iyong'ito nesi.
2Kiyalamikisi Lokapolon kaulerun,
kirukokisi nesi kiboro kaluka aunoi.
3Kirukokisi nesi ekiruke lokitetet,
kokutata auleru kojokan, bobo kikareikisi kotoma ailel!
4Akiro ka Lokapolon eraito abeite
bobo asomisio keng' kere ebeikino amunokin.
5Emina Lokapolon ibore ni ideere kani edolit;
amina keng' na emam esial ileleba akwap.
6Asubuni Lokapolon kuju ka akirot keng',
asubuni nesi akolong', elapa ka akanyer kakirot kana alimuni nesi.
7Abu nesi kotukoki akipi nuka akare kere alaro ape;
abu nesi kogoloki akonyen ka akare kodula.
8Kinyek kimaa akwap kere Lokapolon!
Kinyek koyong'ata itung'a kere luka akwap nesi!
9Na alimuna nesi, kosubuni akwap;
kotakanuuni ng'in ibore akitoro akicorasit keng'.
10Itamamuunene Lokapolon akitemitemisio nuka akwapin;
irebonokini nesi kesi asoma nu itemitemito kesi.
11Konye akitemitemisio keng' ejaasi ikaru kere;
akitemitemesio keng' ideunosi ikaru kere.
12Erereng' akwap na erait Akuju Lokapolon kes;
erereng' itung'a lu aseu nesi araun lu keng'!
13Itee Lokapolon kwap alomun kokuju
ka akitere oni etung'anane kere.
14Alomun kama ipugaa nesi, itee nesi kwap
ng'ulu kere lu iboete kokwap.
15Iteni nesi awomowomisio kes kere,
bobo ejeni ng'ini ibore ni isomaete kesi.
16Mam ejakait kilanyi kanuka ajore keng' kana ejaasi ka apedor;
mam loka ajore kilanyi kanuka agogong' keng'.
17Mam afarasit naka ejie keyauni apedor naka akilanya;
agogong' keng' na epolo mam kebeikini ayuuni.
18Kitee, iteete akonyen ka Lokapolon ng'ulu lu eyong'ito nesi,
ng'ulu lu emunokiito amina keng' na emam esial,
19tetere eyuuni nesi kesi katwanare;
ka akidar kesi ejarete ka apak kanaka akamu.
20Ipiakiito siong' akiyuun kosi namaka Lokapolon;
nesi nes ebuku kosi bobo aking'arasit kosi.
21Ilakara siong' kanu keng';
imunokiito siong' ekiror keng' lokalaunan.
22Kinyek kojii amina kon na emam esial ka siong', Lokapolon,
ipiakiito siong' amuno kosi nama kon.
Currently Selected:
Isabulin 33: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
