Isabulin 31
31
Akilip naka amunokiite Akuju
Nama kalo eplolokiit ekiruke. Ekiruke ka Daudi.
1Abuni eong' nama kon, Lokapolon akidario;
mam akinyekin ilanyo eong'.
Irait ijo Akuju na edolit; koyuune eong', elipit eong'!
2Kiirare eong'! Koyuune eong' kipokona!
Korau nama akeri eong' aking'op kanuka akidar eong'; ebuku kang' lokayuuni eong'.
3Irait ijo ataaba kang' ka ebuku kang';
kanuka ekiror kon koyaite eong' bobo kitoodik eong' eroto,
4Kidara eong' kaloketa kanu elokitere eong'
naarai ijo nes ebuku kang'.
5Akanin kon nes egwaaki eong' emoyo kang'.
Iyuu ijo eong' Okwai Lokapolon, Akuju lo emunokina.
6Ireit ijo ng'ulu lu eyong'ito aputon,
konye eong' amuno kit Lokapolon.
7Abuni eong' ajaus ka ailel ka alakara
kanuka amina kon na emam esial.
Iira ijo ican kang',
8bobo mam ijo akigwaakin eong' akanin ka ipading'a kang',
icamaki ijo eong' kaloto nama akote eong'.
9Kisoni eong', Okwai Lokapolon, naarai ajii eong' ocan,
apasata akonyen kang' akimonyo; apasa emoyo kang' ka akwana de.
10Kapasa eong' akituur, bobo etuurian akimony akijar kang'.
Ketapasata eong' icani kang' kere;
atikere akojo kang' de amamuutu agogong'.
11Ipading'atin kang' kere kacut ipadukotin kang', kanwang'ito eong';
ng'ulu lu ejenete eong' ekurianito eong';
na anyunata eong' koroto, emotarosi.
12Ng'ini itwan emuruoki eong' bala katwana eong';
aputosi eong' ka ibore kani acakar.
13Apupi eong' ipading'atin lu ipu iweiwaasi; imanakiit eong' akurianu.
Itemetemete kesi irotin luka akiyara eong'.
14Konye amunokiit eong' ijo, Okwai Lokapolon;
abala eong', “Irait ijo Akuju kang'.”
15Ejii akijar kang' akanin kon;
koyuune eong' ka akanin ka ipading'atin kang',
ka ng'ulu kalu kesicanete eong'.
16Kitee lokejaanakinan kon ka asianut;
koyuune eong' ka amina kon na emam esial.
17Mam akinyekin eong' ketisilikino, Okwai Lokapolon, naarai eworoe eong' ijo,
Kinyek kitisilikine luka arokusio, kinyek kesi koikasi etiiti nama ka lukatwak.
18Kinyek akituke nukeng'alak kikarikisi ejori, nu inerasi kepogi itepegete lu edolito,
lu inerasi kepogi ka anwang'ite.
19Okwai ikoni ajokun kon epolo ai, ajokun na itoodiki ijo ng'ulu lu eyong'ito ijo,
bobo ng'ini na iinu ijo ng'ulu lu ekuriakito ijo,
koking'aren ka isapa ka ikiliok.
20Itong'opi ijo kesi kotolim kon, itong'opi ijo kesi kaloketa ka itung'a;
itogopit ijo kesi kotolim kon, karaton ka ang'ajepa.
21Kiturwoi Lokapolon!
Naarai etodiki nesi eong' amina keng' kokipone kaloka aumokin
na erimokitere eong' ka alomikin!
22Kakitim kang' abu eong' katema, “Kereng'iar eong' koking'aren kon”.
Konye ibu ijo kiira akimonyo kang' apak na amonyakina eong' ijo king'araki eong'.
23Kominasi Lokapolon, osi kere itung'a keng'!
Idari Lokapolon lu emunokina, konye itisilaari luka epogi.
24Kicasitete, mam akurianu,
osi kere lu imunokiito Lokapolon.
Currently Selected:
Isabulin 31: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
