Isabulin 27
27
Akilip naka akitur
Ekiruke ka Daudi.
1Erait Lokapolon acaus kang' ka lokeyuunan kang'; mam eong' kabuni akurianaar itwan ipede.
Kedari eong' Akuju kamaka ng'in akang'as; mam cut eong' kabuni akurianu.
2Na itijiyata eong' itung'a lukarokok ekotosi akiyara eong',
ebunete kesi akigukin ka akibiror kwap.
3Atikere kirimokit ajore kere eong', mam eong' kakurianaar;
atikere kelomikisi eong' ipading'atin, abuni eong' akitolosit amunokiite Akuju.
4Elipi eong' Lokapolon ibore ipe;
ibore ipe bon nes akote eong':
Akiboi ko Otogo ka Lokapolon apaarasia nuka akijar kang' kere,
akitere ajokus keng' ka akilipite nesi kitodik eong' nu itemokina asoma.
5Kapaarasia kanuka icani ebuni nesi akidara eong';
ebuni nesi akidara eong' kojokan ko Otogo keng' ka ainakin eong' akuite ka amoru kana ikiara.
6Kanuka ng'un abuni eong' akilanya ipading'atin kang' lu imanakiito eong'.
Abuni eong' akileme isuban ko Otogo keng' ajaasi eong' ka ailel;
abuni eong' ekiruke, abuni eong' akiturite Lokapolon.
7Kiira eong' Lokapolon anyarit eong' ijo!
Kisoni eong' bobo kobong'okine eong'!
8Na itemara ijo, “Kobuu kimaa eong',”
Abu eong' kenyaku, “Abuni eong', Lokapolon.”
9Mam ang'opikin eong'! Mam anyunyurakin eong';
mam aking'ere lokejaanakin kon.
Ijaikin ijo irait lokeng'aranakinan eong'; mam akinyekin eong',
mam aking'er eong' Okwai Akuju, lokeyuunan kang'.
10Ebeikinete papa kang' ka toto kang' aking'er eong',
konye ebuni Lokapolon akidar eong'.
11Lokapolon, kisisianak eong' nu ikote ijo kesoma eong',
kitoodik eong' eroto lo ejokuna naarai ajaasi eong' ka ipading'atin lu ipu noi.
12Mam akinyekin eong' ka akanin ka ipading'atin kang',
lu kalomikiito eong' kaliokonu nepepe ka akitukurian.
13Amunokiit eong' ebe abuni eong' akijar ka anyun
ajokus ka Lokapolon kakwap kalu ejarete.
14Komunoki Lokapolon.
Kojaasi ka akiyuun, mam akipasa.
Komunoki Lokapolon.
Currently Selected:
Isabulin 27: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
