Isabulin 18
18
Ekiruke ka Daudi loka akilanya
(2 Sam 22:1-51)
Nama kalo epolokiit ekiruke. Ekiruke ka Daudi ekejaanakinan ka Lokapolon, lo kelimokini Lokapolon akiro ka ekiruke kalo apaaran na eyuuna Lokapolon nesi kakan ka ipading'atin keng' kere, bobo kakan ka Saulo. Kotemari nesi:
1Amina eong' ijo Lokapolon!
Ijo nes agogong' kang'.
2Lokapolon nes lokedaran kang';
nesi nes erait ebuku kang'.
Akuju kang' nes erait lokedaran kang',
bobo ajaasi eong' ka nesi akuit eong'.
Idari nesi eong' bala ebuku;
kigang'i nesi eong' ka akidara eong' kojokan.
3Anyarauni eong' Lokapolon,
kosodi nesi ayuuni eong' kamaka ipading'atin kang'.
Keturuoto Lokapolon!
4Kayenito eong' aunoi nuka atwanare;
abutu ikokoron luka atwanare kitoroto kuju kang'.
5Kayenit eong' atwanare,
kosodi ates akilok eong'.
6Kocani kang' anyarauni eong' Lokapolon;
abu eong' kanyarau Akuju kang' aking'arakin eong'.
Ejii nesi otogo keng', abu nesi kiira eporoto kang';
kiirari nesi akimonyo kang' naka akote aking'arasit.
7Kosodi akwap akicekun ka akijang'akin;
kosodete apeteta ka imoru akijang'ajang'a,
abu Akuju konyunyurar.
8Kobukun apuru kokumes keng',
kolomuni kakituk keng' atotol ka akimi nu enokete.
9Kocil nesi kuju kanuka ang'ar, kosodi adokun kwap
nepepe ka edou lokerionon kakejen keng'.
10Aporotoi nesi atipet kabenokoka keng';
alosi nesi ka abenokoka kekuwam.
11Emukuworo nesi elope ka akirionus;
abutu idowon lukapolok, lu ajaasi ka akipi kimanakisi nesi.
12Kolomunete akako nepepe ka akimilia naka akimi kotoma okipie koking'aren keng';
kosodi akitoro odowon lukeriokok.
13Kosodi Lokapolon agirokin kokuju;
kosodi eporoto kalo Eliliara noi apupun.
14Kogumari nesi ikoijoi keng' kosodi akisiarakin ipading'atin keng';
ka akimilia ka ekipie kitekeri nesi kesi.
15Na eretakina ijo ipading'atin kon, Okwai Lokapolon, ka akitukurian kesi ka adedeng'u kon,
abuni kong'aare icorin luka akare, apeteta nuka akwap apotu kotakanuutu.
16Korwauni Lokapolon akani keng' alomun kokuju kosodi akirum eong';
kiriuni nesi eong' alomun ka akipi kanu ipu noi.
17Abu nesi koyuu eong' alomun kamaka ipading'atin kang' luka agogong' noi
bobo kama ka ng'ulu kere lu kareito eong',
ecasito kesi noi kama kang'.
18Kolomokisi kesi eong' ajii eong' ocani,
konye abu Lokapolon kidara eong'.
19Kolemu nesi eong' ka kang'asi;
koyuuni nesi eong' naarai alakara nesi ka eong'.
20Eropenene Lokapolon eong' naarai esomae eong' nu edolito;
isulwanyinikini nesi eong' naarai emam eong' aronus.
21Aricaki eong' ekisil ka Lokapolon;
mam eong' kenyekiit Akuju kang'.
22Aricaki eong' ikisila keng' kere;
mam eong' kanwang'it acorasia keng'.
23Ejeni nesi ebe emam eong' aronus,
ebe edara eong' akwana kang' kamaka asoma arokusio.
24Kanuka ng'un, eropi nesi eong' naarai esomae eong' nu edolito,
naarai ejeni nesi ebe emam eong' aronus.
25Okwai Lokapolon, imunokina ijo kamaka ng'ulu kalu emunokiito ijo;
ijokuna ijo noi kamaka ng'ulu kalu edolito.
26Ilae ijo kamaka ng'ulu kere kalu elaete,
konye idedeng' ijo kamaka ng'ulu kalu eroko.
27Iyuuni ijo ng'ulu lu iyapeperasi,
konye iyapeperauni ijo ng'ulu lu ipogasi.
28Okwai Lokapolon, ijo iinanikini eong' acaus;
ijo ilemari akirionus kang'.
29Iinanikini ijo eong' agogong' naka alomikin ipading'atin kang' ka agogong' naka akilanya kesi.
30Akuju lo ikote asomisio keng' edolito ai!
Ikote akiro keng' emunokina ai!
Eputosi nesi ka ebuku kamaka ng'ulu kere kalu ekotosi akidaro keng'.
31Lokapolon bon nes erait Akuju;
Akuju bon nes ebuku wok.
32Nesi nes Akuju lo inakiit eong' agogong',
lo idari eroto kang'.
33Ainaki nesi akejen kang' agogong'u bala nuka amori;
idari nesi eong' komoru.
34Isisianakini nesi eong' ejie,
tetere abeikiit eong' akitosoma akabwa na icasit.
35Okwai Lokapolon, idari ijo eong' ka ayuuni eong';
ainaki akidara kon eong' apolou,
kedara eong' agogong' kon.
36Idara ijo eong' kamaka amudiaro,
bobo mam eong' apelem kebiroro.
37Egwapit eong' ipading'atin kang' ka akikama kesi;
mam eong' keyeng'uni akitodolo nama amudiara eong' kesi.
38Enomi eong' kesi kwap bobo mam kesi kenyounete;
eperete kesi idong'orite koking'aren kang'.
39Iinakini ijo eong' agogong'u naka akilanya kojie
ka apedor naka akilanya ipading'atin kang'.
40Iinakini ijo ipading'atin kang' emotarosi kama kang';
amudiari eong' ng'ulu lu kareito eong'.
41Emonyete kesi aking'arasit konye emam itwan ipede ni iyuuni kesi;
enyaraunete kesi Lokapolon konye mam nesi kebong'okini.
42Epiricaari eong' kesi, tetere kesi eraunete apua
nu ekutari ekuwam.
Epudae eong' kesi bala adwat korotin.
43Ibu ijo koyuu eong' kamaka itung'a kalu emam kepupete akiro, kitarauni ijo eong' lokepugan akwapin;
arautu itung'a lu sek amam eong' kajeni kesi lukejaanakinak kang'.
44Kaluronokinete eong' ilong'au;
kiirasi kesi eong', kayong'ito eong'.
45Abu komamu ilong'au agogong'u;
kolomunete kesi kama keng'opitere icekete.
46Ejari Lokapolon! Kiturwoi ebuku kang'!
Kiturwoi Akuju lokeyuunan kang'.
47Einakini nesi eong' akilanya ipading'atin kang';
ipiakini nesi akwapin akanin kang'
48ka ayuuni eong' kamaka ipading'atin kang'.
Okwai Lokapolon, iinakini ijo eong' akilanya ipading'atin kang'
ka akidara eong' kamaka itung'a kalu ededeng'.
49Kanuka ng'un, keturi eong' ijo ka akwapin;
erukokiit eong' ijo ikurukesnei luka akiturite.
50Einanikini Akuju ejakait keng' akilanya naka polon;
itodikit nesi amina na mam kedaun ng'ini ni aseu nesi,
Daudi nepepe ka auri keng' ikaru kere.
Currently Selected:
Isabulin 18: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
