Isabulin 148
148
Alimokin Itung'a luka akwap Kiturwoto Akuju
1Kiturwoto Lokapolon!
Kiturwoto Lokapolon alomun kokuju
osi lu iboete kokuju.
2Kiturwoto nesi, osi imalaikan keng' kere,
osi ajoresinei keng' kere nu ejaasi kuju.
3Kiturwoto nesi, akolong' ka elapa;
kiturwoto nesi, osi akanyer nu ecaete.
4Kiturwoto nesi, osi kuju na euja ka akipi nu ejaasi kuju.
5Kinyek kesi kere kiturwoto ekiror ka Lokapolon!
Abu nesi kolim, kosodete kesi asubun;
6akitor acorasia keng' nes epiakiner kesi alarosinoi kes ikaru kere,
bobo mam kesi kenwang'ete.
7Kiturwoto Lokapolon alomun ka akwap,
osi imunuo luka akarin, kiturwoto;
8edou lo imiliae nepepe ka akako, ka apupuat ka idowon,
ikatapiroi lu eyong'ito acorasia keng'.
9Kiturwoto nesi, osi imukuran ka imoru,
ikito luka araito ka amagoroi;
10osi ityeng' kere, lupitat kaluko moding',
ityeng' lu eliaete ka ikwenyi.
11Kiturwoto nesi, ijakaa ka itung'a kere
aberu nuka ijakaa nepepe kaluka epugak luce;
12aberu nucik ka ikiliok lucik,
itung'a lumojong' nepepe ka idwe.
13Kinyek kesi kere kiturwoto ekiror ka Lokapolon!
Epolo ekiror keng' adepar luce kere;
akibusesu keng' ejii kuju ka akwap nepepe ka kuju.
14Abu nesi kisicata akwap keng',
tetere ituriete itung'a keng' kere nesi
itung'a luko Israel, lu emina nesi noi.
Kiturwoto Lokapolon!
Currently Selected:
Isabulin 148: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
