Isabulin 145
145
Ekiruke loka Akiturite
1Abuni eong' alimonor kuju ka apolou kon Akuju kang' ka ejakait kang';
abuni eong' akiyalaminikin ijo ikaru kere.
2Abuni eong' akiyalamikin ijo ng'ini paaran;
abuni eong' akiturite ijo ikaru kere.
3Epolo Lokapolon, bobo itemokina akiturite nesi noi;
edeparit apolou keng' akijen.
4Ebuni aturi ape adolore aturi ace akitolosite akiturite akiro nu isoma ijo;
ebunete kesi alimonor kuju ka asoma kon nukapolok.
5Ebunete kesi ejori kuju ka akibusesu kon ka apolou,
bobo abuni eong' akiitunun kuju ka asoma kon nukapolok.
6Ebunete itung'a ejori kuju ka asoma kon nukapolok,
bobo abuni eong' ejori kuju ka apolou kon.
7Ebunete kesi ejori kuju ka ajokus kon kere
ka ekiruke kuju ka ajokus kon.
8Lokapolon ejaasi ka amina nepepe ka asianut,
mam nesi ketapana anyunyuraari,
bobo ileleba nesi amina na emam esial.
9Ejokuna nesi kamaka ng'ini itwan,
bobo isonienene nesi ng'ulu kere lu abu nesi kosub.
10Iboro kere lu kisubi ijo Lokapolon, ebunete akiturite ijo,
bobo itung'a kon kere ebunete akiyalamikin ijo.
11Ebunete kesi ejori kuju ka akibusesu naka apolou kon
ka ejori kuju ka agogong' kon,
12tetere ejenuni ng'ini itwan asoma kon
ka apolou naka akibusesu naka ajakaanut kon.
13Apugan kon mam kedaun,
bobo irait ijo ejakait ikaru kere.
Ericit Lokapolon asumuneta keng',
bobo esiana nesi ka asomisio keng' kere.
14Ing'aranakini nesi ng'ulu lu ejaasi ocan;
itonyounene nesi ng'ulu lu ibirorosi.
15Iboro kere lu ejarete iteete ijo ka amuno,
bobo iinanakini ijo kesi inyamen ekotosi kesi.
16Iinanakini ijo kesi inyamen lu ilesikina,
ka akisimonikin akiisite ka itung'a kere.
17Edolit Lokapolon kamaka nu isomae nesi kere,
ejaasi nesi ka asianut kasomisio keng' kere.
18Apie nesi kamaka ng'ulu kalu iworoete nesi,
ng'ulu lu iworoete nesi ka amunokina.
19Ekoranakini nesi ng'ulu lu eyong'ito nesi;
epupienene nesi akimonyo kes ka ayuuni kesi.
20Idari nesi ng'ini itwan ni emina nesi,
konye ebuni nesi amudiar lukarokok.
21Abuni eong' akiturite Lokapolon ng'ini pak;
kinyek iboro lukesubi nesi kere kiturwoto ekiror keng' lokalaunan ikaru kere.
Currently Selected:
Isabulin 145: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
