Isabulin 119
119
Ekisil ka Lokapolon
1Erereng' ng'ulu lu emam aronus kejii toma akijar kes,
lu iboyete atupa ka ekisil ka Lokapolon.
2Erereng' ng'ulu lu igwapito acorasia keng',
lu eyong'ito nesi kitawon kes kere.
3Mam kesi kisomaete arokusio;
etupito kesi irotin ka Lokapolon.
4Akuju, iinaki ijo siong' ikisila kon
ka alimokin siong' ayong'ite kesi kamunokina.
5Kere kejii ekipone abeikinar eong' amunokin kotoma aricakite acorasia kon.
6Katamaa eong' arici acorasia kon kere,
mam kitisilikino eong'.
7Abuni eong' akiturite ijo ketau kalo ideere,
etolosit eong' akisisia ikisila kon lu edolito.
8Ayong'i eong' ikisila kon;
mam akinyekin eong'!
Ayong'ite ikisila ka Lokapolon
9Ikote lukatumunak idarete akijar kes kokipone ka Lokalaunan ai?
Erait kokipone kaloka ayong'ite acorasia kon.
10Atamakini eong' ayong'ite ijo ketau kang' kere;
mam akinyekin eong' anwang'i acorasia kon.
11Aricaki eong' akirot ko otau kang',
tetere mam eong' kesomakini ijo arokusio.
12Eturi eong' ijo Okwai Lokapolon;
kisisianakine eong' irotin kon.
13Abuni eong' akinyogonokin ikisila kon kere lu idau ijo ainakini eong'.
14Amina eong' atupite ikisila kon
adepar ajaus ka abara kana epolo noi.
15Esisiae eong' acorasia kon;
amoe eong' akisisianakino kon.
16Ketalakarit eong' ikisila kon;
mam kimuruokini eong' acorasia kon.
Alakara kotoma ekisil ka Akuju
17Kojokuna kama kang', lokejaanakinan kon,
tetere abeikini eong' akijar ka ayong'ite akisisianakino kon.
18Kong'aa akonyen kang' tetere abeikini eong' akitere
abeite naka akitim na ejii toma okisil kon.
19Ajei eong' akwap ne ka apak kana edit along'u;
mam akigwa acorasia kon kama kang'.
20Epipil etau kang' ejaasi ka aminanar na epolo noi
ekote eong' ajenuni acorasia kon.
21Iretanakini ijo luka epogi,
ilamama ng'ulu lu enwang'ito acorasia kon.
22Kolacune eong' alaomun kamaka araton nepepe ka anwang'ite kes eong',
naarai aricaki eong' ikisila kon.
23Lukepugak iriamanakinosi ka alokite eong',
konye abuni eong' akisisia akisisianakino kon.
24Akisisianakino kon erait alakara kang'; eraito kesi nukecorak kang'.
Akukunyanuut ayong'ite Ekisil ka Akuju
25Aperi eong' kapua ilanyite; kinyakakine eong' akijar nakitet,
kwape kisumunikitere ijo eong'.
26Abu eong' keyamo ng'unu kere nu esomat eong', kinyakakini ijo eong';
kisisianak eong' ikisila kon.
27King'araki eong' ajenun ikisila kon,
bobo abuni eong' awomowomo kuju ka akisisianakino kon nuka aumosit.
28Kelanyat eong' ican;
kisicata eong', kwape isulwanyikina ijo eong'.
29King'araki eong' mam apayaari eroto lokaronon,
kajokus kon kisisianak eong' ekisil kon.
30Aseu eong' ayong'ara;
aricaki eong' kuju ka atubokino kon.
31Ariciti eong' acorasia kon, Lokapolon;
mam akinyekin ketisilikino eong'.
32Abuni eong' akiyong' acorasia kon,
naarai ibuni ijo akiyatakin eong' acoa.
Akilip kanuka akote akijen
33Kisisianak eong', Lokapolon apolou naka ikisila kon,
bobo abuni eong' ayong'ite kesi apakio kere.
34Kisisianak eong' apolou naka ekisil kon, abuni eong' akiyong' ekisil;
abuni eong' akiyong' ekisil ketau kang' kere.
35King'arak eong' ayong'ite ikisila kon
naarai adumuni eong' alakara kotoma kes.
36Koinaki eong' amina naka ayong'ite ikisila kon
adepar adumun abara.
37King'araki eong' tetere mam eong' ketee iboro luka along'u;
kojokuna kama kang', kwape kisumunikina ijo eong'.
38Kisomaki eong' nu ibu ijo kisumunik eong', lokejaanakinan kon —
asumunet na isumunikini ijo ng'ulu lu eyong'ito ijo.
39Koyuune eong' karaton kana akuriana eong';
naarai ejooka acorasia kon noi!
40Akote eong' ayong'ite acorasia kon;
koinaki eong' akijar nakitet, naarai idolit ijo.
Amunokiite Ekisil ka Akuju
41Kitodik eong' ekipone lo iminare ijo eong', Lokapolon,
bobo koyuu eong' atupa ka ekisil kon.
42Kanuka ng'un, abeikini eong' akinyakakin ng'ulu lu erasete eong'
naarai amunokiit eong' akirot kon.
43Koinaki eong' apedor naka ejori abeite ng'ini pak,
naarai amunokiit eong' ikisila kon.
44Abuni eong' ayong'ite ikisila kon ng'ini pak, ikaru kere.
45Abuni eong' akijar alakakina noi,
naarai atamakiit eong' ayong'ite akisisianakino kon.
46Abuni eong' alimor kuju ka acorasia kon kamaka ijakaa
bobo mam kesilikini eong'.
47Adumuut eong' alakara kayong'ite acorasia kon,
naarai amina eong' acorasia.
48Ayong'it eong' bobo amina eong' ikisila kon;
awomowomoe eong' kuju ka ikisila kon.
Akicasite kotoma okisil ka Akuju
49Kiitute nu isumunikiit ijo eong', lokejaanakinan kon;
koinaki eong' amuno.
50Atikere na ajaare eong' ocani kang' apon king'aing'ai eong'
naarai abu asumunet kon koinaki eong' akijar.
51Ng'ini pak akwenatatare luka epogi eong',
konye mam eong' kenyekiit ekisil kon.
52Eituuti eong' ikisila kon luka isek,
bobo kitililimito eong', Okwai Lokapolon.
53Na etoo eong' luka arokusio ebilibilete ekisil kon,
ilelebunun eong' anyunyura noi.
54Kapaki kang' kana euriana ka akwap
ajei eong' ikirukesinoi kuju ka acorasia kon.
55Kware eitunene eong' ijo, Lokapolon,
bobo eitunene eong' kuju ka ekisil kon.
56Adumunene eong' alakara kang' kotoma ayong'ite acorasia kon.
Ayong'ite Ekisil ka Akuju
57Irait ijo ng'ini ibore ni akote eong', Okwai Lokapolon;
esumuniki eong' akiyong' ikisila kon.
58Elipit eong' ijo ketau kang' kere
akisoni eong' kwape esumunikina ijo!
59Etee eong' iponesio kang',
kanuka ng'un esumuniki eong' akigwapa acorasia kon.
60Emam adaute akolong',
eburiburi eong' ayong'ite acorasia kon.
61Alokata luka arokusio eong',
konye mam kimuruokini eong' ekisil kon.
62Kiding' kakware anyouni eong'
akiturite ijo kanuka atubonokin kon kana edolit.
63Arait eong' aupasia ka ng'ulu kere lukijaanakinete ijo,
ka ng'ulu kere lu eyong'ito ikisila kon.
64Lokapolon, ileleba amina kon na emam esial toma akwap;
kisisianak eong' ikisila kon.
Ajokun naka Ekisil ka Akuju
65Iricaki ijo asumunet kon Lokapolon,
bobo ijokuna ijo kama kang', lokejaanakinan kon.
66Koinakine eong' acoa ka akijen,
naarai amunokiit eong' acorasia kon.
67Iring'a ijo kitisilara eong', apacanari eong',
konye kipokona ayong'it eong' akirot kon.
68Ijokuna ijo noi — bobo isomae ijo nukajokak!
Kisisianakine eong' acorasia kon.
69Enerata luka epogi aliokonu kuju kang',
konye ayong'it eong' acorasia kon ketau kang' kere.
70Mam kesi kejenete,
konye adumuut eong' alakara kotoma okisil kon.
71Ajokuna akitisilaro kon kama kang',
naarai abu king'araki eong' akisisia acorasia kon.
72Ekisil lo ibu ijo koinaki eong' ajokuna kama kang' noi
adepar abara kere naka akwap.
Abeite ka Ekisil ka Akuju
73Ibu ijo kosub eong', ka akidara eong' kojokan;
koinaki eong' akijen tetere esisiauni eong' ikisila kon.
74Ng'ulu lu eyong'ito ijo ebunete alakari kaanyutu eong',
naarai amunokiit eong' asumunet kon.
75Ajeni eong' Lokapolon ebe atubonokin kon edolit,
bobo kitisilari ijo eong' naarai imunokina ijo.
76Kinyek amina kon na emam esial king'aing'a eong',
kwape kisumunikina ijo eong', lokejaanakinan kon.
77Kitimoe eong', kajara eong'
kanu alakara eong' asoma ekisil kon.
78Kinyek kosilik luka epogi kanuka akiwosa eong' aliokonu;
konye eong' abuni awomowomo kuju ka acorasia kon.
79Kinyek ng'ulu lukiyong'ito ijo kobutu nama kang'
ng'ulu kere lu ejenete acorasia kon.
80Kinyek kayong' eong' ikisila kon kojokan
tetere mam kasilikini eong'.
Akilip kanuka alakunio
81Adaun eong', Lokapolon ederit koyuu ijo eong';
epiakit eong' amunokina kang' akirot kon.
82Apasata akonyen kang' akidarite nu ibu ijo kisumunik,
Eng'isit eong', “Iwori ing'arakina ijo eong'?”
83Arait eong' along'u bala ejamu lo edakitere ebino lokecakar;
konye mam eong' kemuruokiit acorasia kon.
84Ketolot eong' akidarite apak na etia ai?
Iwori itisilaara ijo ng'ulu lu isicanete eong'?
85Luka epogi, lu mam keyong'ito ekisil kon,
abokata aduyon akilok eong'.
86Ikisila kon kere eraito lu munokina;
kesicanete itung'a eong' ka aliokonu — king'araki eong'!
87Apu kesi akiyara eong', konye mam eong' kanwang'it acorasia kon.
88Kanuka amina kon na emam esial, kojokuna kama kang',
tetere abeikini eong' akiyong' ikisila kon.
Amunokiite Ikisila ka Akuju
89Ebuni akirot kon Okwai Lokapolon ajaikin kokaru kere;
erait naka ikaru kere kokuju.
90Amuno kon ideun kauri kere;
ipiaki ijo akwap alaro keng', bobo edeun.
91Edeunosi iboro kere akitodol lolo kanuka acorasia kon,
naarai eraito kesi kere lukejaanakinak kon.
92Kere komam koraite ebe toma okisil kon nes elomuuter ailel kang',
ati eong' kadau atwanare kanuka ican kang'.
93Mam eong' kanwang'i acorasia kon,
naarai akitor acorasia kon nes ajaria eong'.
94Arait eong' nikon — koyuu eong'!
Atamaki eong' ayong'ite acorasia kon.
95Idarito luka arokusio akiyara eong',
konye abuni eong' awomowomo kuju ka ikisila kon.
96Ajenu eong' ebe ng'ini ibore ejaasi ka esial;
konye ekisil kon ejokuna.
Amina Ekisil ka Akuju
97Amina eong' ekisil kon!
Eitunene eong' kuju keng' apaaran kere.
98Ajaasi eong' ka ekisil kon ng'in pak
Kainakiit ekisil kon eong' ajaus ka acoa adepar ipading'atin kang',
kainakit eong' acoa adepar ipading'atin kang'.
99Ajeni eong' noi adepar lukesisianakinak kang' kere,
naarai awomowomoe eong' kuju ka acorasia kon.
100Ajaasi eong' ka acoa adepar ng'ulu lu emojong'ito,
naarai ayong'it eong' acorasia kon.
101Ang'ere eong' asoma nukarokok kere,
naarai akote eong' ayong'ite akirot kon.
102Mam eong' kanwang'it acorasia kon,
naarai irait ijo elope lokesisianakinan kang'.
103Ejijimak acorasia kon kama kang';
ejijimak noi adepar esik!
104Adumunene eong' acoa kokisila kon,
kanuka ng'un, mam eong' kamin iponesio kere lukarokok.
Acaus na elomuut kokisil ka Akuju
105Erait akirot kon atara kang' na eyait eong'
ka acaus na ecae koroto kang'.
106Abuni eong' aricakin asumunet kang'
naka ayong'ite acorasia kon nuka abeite.
107Okwai Lokapolon Akuju, ecana eong' noi;
koinaki eong' akijar kwape isumunikina ijo.
108Kocamu akilip kang' naka akiyalama, Okwai Lokapolon,
bobo kisisianak eong' ikisila kon.
109Ejii akijar kang' akang'as ng'ini pak,
konye mam eong' kenyekini ikisila kon.
110Elokito lukarokusio eong',
konye mam eong' kenyekini ikisila kon.
111Ikisila kon eraito iboro lukang' ikaru kere;
italakaarito kesi etau kang'.
112Atiaku eong' ayong'ite ikisila kon
akitodol apaaran na atwania eong'.
Akidaro na ejii toma Okisil ka Akuju
113Mam eong' kamina ng'ulu lu imoleete mam keyong'ito ijo,
konye amina eong' ekisil kon.
114Ijo nes ebuku kang' bobo lokedaran kang';
epiakiit eong' akiyuun kang' toma asumunet kon.
115Koikasi kama kang', osi itung'a lukarokok.
Abuni eong' akiyong' acorasia ka Akuju kang'.
116Koinaki eong' agogong', kwape kisumunikiitere ijo, kajara eong';
mam akinyekin eong' asilikin kotoma amuno kang'!
117Kirum eong', kajara eong',
bobo abuni eong' ng'in pak akipup acorasia kon.
118Ing'eri ijo ng'in itwan ni enwang'it ikisila kon;
akitemetemesio kes eroko emam adumunet apede.
119Iyait ijo itung'a kere lu isomaete nukarokok bala iboro lukarokok,
kanuka ng'un amina eong' acorasia kon.
120Akuriana eong' kanu kon;
ileleba eong' akurianu kanuka atubonokin kon.
Ayong'ite Ekisil ka Akuju
121Esoma eong' nu edolito kanu ejooka;
mam akinyekin eong' kamaka ipading'atin kang'!
122Kisumunik ebe ing'arakini ijo ekejaanakinan kon;
mam akinyekin luka epogi konwang'ata eong'!
123Apasata akonyen kang' akidarite aking'arasit kon na iyuuni eong',
naarai ibu ijo kisumunik eong'.
124Kisomaki eong' atupa ka amina kon na emam esial,
bobo kisisianak eong' acorasia kon.
125Arait eong' lokejaanakinan kon; koinaki eong' akijen
tetere abeikini eong' ajenun akisisianakino kon.
126Lokapolon, na nes apak kon naka akisomakin,
naarai mam itung'a keyong'ito ekisil kon.
127Amina eong' ikisila kon adepar esawabu,
adepar esawabu lo isidonyonyo.
128Kanuka ng'un, atupitt eong' ikisila kon kere;
mam eong' kamina irotin kere lukarokok.
Akote ayong'ite Ekisil ka Akuju
129Ejooka ikisila kon;
ayong'it eong' kesi ketau kang' kere.
130Akiro nu inerasi akisisianakino kon eyaunete acaus;
einakinete lu ebang'aaka acoa.
131Ang'aarit eong' akituk kang' akote eong',
naarai akote eong' noi acorasia kon.
132Kobong'okine eong', kitimoe eong'
kwape isomakina ijo ng'ulu lu eminasi ijo.
133Kwape isumunikina ijo, kidar eong' komam eong' kebiror;
mam akinyekin aronus kilanyat eong'.
134Koyuune eong' kamaka ng'ulu kalu iyimakito eong',
tetere abeikini eong' ayong'ite ikisila kon.
135Kocaki akonyen kang' kajokun kon,
kisisianakine eong' ikisila kon.
136Eleleete akiyo kang' bala ang'olol,
naarai mam itung'a keyong'ito ekisil kon.
Abeite ka Ekisil ka Akuju
137Idolit ijo, Lokapolon bobo ikisila kon eraito luka abeite.
138Ikisila lu ilemu ijo ejooka cut bobo edolito.
139Inepi anyunyura kotoma kang' bala akimi,
naarai enwang'ito ipading'atin kang' acorasia kon.
140Erait asumunet kon naka abeite!
Amina eong' noi!
141Arait eong' itwan ni emenite bobo enwang'ite eong',
konye mam eong' kanwang'it akisisianakino kon.
142Adolite kon iboye ikaru kere,
bobo ekisil kon erait loka abeite ng'in pak.
143Ileleba eong' ican ka apodo,
konye kainuto eong' ikisila kon ailel.
144Eraito acorasia kon nuka abeite ng'in pak;
koinaki eong' akijen kasodi eong' akijar.
Akilip kanuka alakunio
145eworoe eong' ijo ketau kang' kere;
kobong'okine eong' Lokapolon, kasodi eong' akiyong' acorasia kon!
146Eworoe eong' ijo; koyuu eong', aricakini eong' ikisila kon.
147Ering'a akolong' kelomuna eworoe eong' aking'arasit kon;
epiaki eong' amunokina kang' asumunet kon.
148Akwaare kere, ekolerit eong',
awomowomoe kuju ka ikisila kon.
149Kanu eraitere amina kon na emam esial, kiira eong' Lokapolon;
kisoni eong', kidara akijar kang'.
150Apuutu lukesicanak kang',
itung'a lu mam kericakiito ekisil kon.
151Konye apie ijo kama kang', Lokapolon,
bobo ikisila kon kere eraito luka ikaru kere.
152Abu eong' sek kesisiau ikisila kon;
ibu ijo koinaki kesi ideunosi ikaru kere.
Akilip aking'arasit
153Kong'olek akicana kang', koyuu eong',
naarai mam eong' kanwang'it ekisil kon.
154Kigang'a eong', bobo koyuu eong';
koinaki eong' akijar kwape sek isulwanyikina ijo eong'.
155Mam kiyuuno lukarokok,
naarai mam kesi keyong'ito ikisila kon.
156Konye akisoni kon Lokapolon, epolo noi;
kisoni eong' bobo koyuu eong'!
157Ajaasi eong' ka ipading'atin nepepe kalu eyimakito eong' ipu noi,
konye mam eong' kang'eri ayong'ite ikisila kon.
158Kaanyu eong' lukagwelanarak ng'ulu, ekadakin etau kang',
naarai mam kesi kericakito acorasia kon.
159Kong'olek kwape aminare eong' acorasi kon, Akuju.
Mam amina kon na emam esial kibelonokin, kanuka ng'un koyuu eong'!
160Etau ka ekisil kon erait abeite;
bobo ikisila kon kere lu edolito eraito luka ikaru kere.
Alemikina kamaka ekisil ka Akuju
161Kalomikito eong' itung'a luka agogong' along'u,
konye ayong'it eong' ekisil kon.
162Alakara eong' noi kanuka asumunikinete kon
bala itwan ni edumuni iboro lukajokak.
163Mam eong' aliokonu,
konye amina eong' ikisila kon.
164Keturi eong' ijo ng'ini paaran irwana kakanykaare
kanuka atubokino kon kana edolit.
165Ng'ulu lu eminasi ekisil kon ejaasi ka aipuc na ejokuna noi;
bobo emam ibore ni ebeikini akibiror kesi.
166Edarit eong' koyuu eong' Lokapolon,
bobo esomae eong' nu icori ijo.
167Ayong'it eong' akisisianakino kon;
amina eong' kesi ketau kang' kere.
168Ayong'it eong' acorasia kon ka ikisila kon;
itee ijo ng'ini ibore ni esomae eong'.
Akilip kanuka aking'arasit
169Kodoloki ijo akimonyo kang', Okwai Lokapolon;
koinaki eong' akijen atupa ka asumunikinete kon!
170Kiira akilip kang', bobo koyuu eong' atupa ka asumunet kon!
171Abuni eong' akiturite ijo ng'in pak,
naarai isisianakini ijo eong' ikisila kon.
172Abuni eong' ekiruke kuju ka ekisil kon,
naarai acorasia kon edolito.
173Kolokokina ng'in pak aking'arakin eong',
naarai egwapit eong' acorasia kon.
174Ederit eong' koyuu ijo eong', Okwai Lokapolon!
Bobo alakara eong' asoma ekisil kon.
175Koinaki eong' akijar, tetere keturi eong' ijo;
kigang'ata ikisila kon eong'.
176Erimi eong' kwape ka amerekek kana ewolit;
kanuka ng'un, kobuu kokoo eong', lokejaanakinan kon,
naarai mam eong' kenyekiit ikisila kon.
Currently Selected:
Isabulin 119: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
