Isabulin 118
118
Akilip naka akiyalama kanuka akilanya
1Kiyalamikisi Lokapolon, naarai ejokuna nesi,
bobo amina keng' emam esial.
2Kinyek kotemasi itung'a luko Israel,
“Amina keng' emam esial.”
3Kinyekisi isaseredootin ka Akuju kotemasi,
“Amina keng' emam esial.”
4Kinyekisi ng'ulu kere lu imaete nesi kotemasi,
“Amina keng' emam esial.”
5Kocani kang' abu eong' keworou Lokapolon;
abu nesi kiira eong' kosodi alacakin eong'.
6Ejaasi Lokapolon ka eong', mam eong' kakurianaar;
inyena isomakini itwan eong'?
7Erait Lokapolon nesi ing'arakit eong',
bobo abuni eong' anyun ilanyo ipading'atin kang'.
8Ejokuna amunokite Lokapolon
adepar etung'anan.
9Ejokuna amunokite Lokapolon
adepar lukayaitok itung'a.
10Emanakiito eong' ipading'atin ipu;
konye abu eong' kamudia kesi kapedor ka Lokapolon!
11Emanakiito kesi eong' kang'olo wai;
konye abu eong' kamudia kesi kapedor ka Lokapolon!
12Emanakiito kesi eong' bala awo, kang'olo wai;
anokete bala akimi naka ikokwa;
abu eong' kamudia kesi kapedor ka Lokapolon!
13Apon kitijii eong' noi, kilanyete eong',
konye abu Lokapolon king'araki eong'.
14Erait Lokapolon agogong' kang';
nesi elope eyuuni eong'.
15Kopuput iporotoi luka alakara kanuka akilanya elomuuto kayemai kang'ulu kalu edolito ebalasi,
“Akani ka Lokapolon loka apedor kere, isoma ijo akiro nukapolok!
16Ayau akani naka agogong' naka Lokapolon loka apedor naka akilanya!
Esoma akani ka Akuju loka Apedor akiro nukapolok!”
17Mam eong' katwani; konye abuni eong' akijar
ka asiarasiara nu esoma Lokapolon.
18Esicana nesi eong' cut,
konye mam nesi kajalakiit eong' katwana.
19Kong'akine eong' ekeki ka Etogo ka Akuju;
alomi eong' toma ka akiyalamikin Lokapolon!
20Lo nes erute ka Lokapolon;
lu edolito bon kes ebeikinete akilom toma.
21Eturi eong' ijo Akuju, naarai ibu ijo kiira eong',
naarai iinaki ijo eong' apedor naka akilanya.
22Amoru na abutu lukadukok kong'eroto ebalasi ebe mam kejaasi ka adumunet
nes abu korau naka adumunet adepar kere.
23Lokapolon nes esoma nu;
ejokuna noi ka akonyen wok.
24Erait na apaaran na asubu Lokapolon;
kajaasi ka ailel ka alakara apaaran na.
25Koyuu siong', Lokapolon, koyuu siong'!
Koinaki siong' apedor naka asoma kojokan Okwai Lokapolon!
26Kisulwanyiki Akuju ng'ini ni ebuni kokiror ka Lokapolon!
Alomun ko Otogo ka Lokapolon kesulwanyinikinete siong' ijo.
27Erait Lokapolon Akuju; ejokuna nesi kama kosi;
Ageu epucit ka ateniek ka akanin kus.
Kirumata akwii nuka epucit, kouparosi osi korimokisi altari.
28Irait ijo Akuju kang', bobo keyalamikiit eong' ijo;
abuni eong' akisiarasiara kuju ka apolou kon.
29Kiyalamikisi Lokapolon, naarai ejokuna nesi,
bobo amina keng' emam esial.
Currently Selected:
Isabulin 118: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
