Isabulin 115
115
Akuju epe loka abeite
1Mere nama kosi, Okwai Lokapolon, mere nama kosi,
konye koinakine ekiror kon akibusesu,
mere ebe siong' kes itemokina ainakino akibusesu,
kanuka amina kon na emam esial nepepe ka amunokina.
2Inyo ing'isitetere akwapin siong',
“Wali ejei Akuju kus?”
3Ejei Akuju kosi kuju;
isomae nesi ng'unu kere nu ekote nesi.
4Akujun kes esubite ka epuesa ka esawabu,
esubite ka akanin ka itung'a.
5Ejaasi kesi ka akituke, konye mam kebeikinete ejori,
bobo ejaasi ka akonyen konye mam kebeikinete akitere.
6Ejaasi kesi ka akii konye mam kepupiete,
ejaasi kikumes konye mam kebeikiito aking'uun.
7Ejaasi kesi ka akanin konye mam kebeikinete akirum ibore
ejaasi ka akejen konye mam kebeikini alosite;
mam kebeikinete acelun atikere.
8Kinyek ng'ulu kere lukitenete kesi ka ng'ulu lu emunokiito kesi
korautu bala aputon nukesubata kesi.
9Komunokisi Lokapolon osi itung'a luko Israel.
Ing'aranakini nesi osi ka akidar osi.
10Komunokisi Lokapolon osi isaseredootin ka Akuju.
Ing'aranakini nesi osi ka akidar osi.
11Komunokisi Lokapolon osi lu imaaete nesi.
Ing'aranakini nesi osi ka akidar osi.
12Iituti Lokapolon oni bobo ebuni nesi akisulwanyikin oni:
Ebuni nesi akisulwanyikin itung'a luko Israel,
nepepe ka isaseredootin ka Akuju kere.
13Ebuni nesi akisulwanyikin itwan kere ni eyong'it nesi,
lukapolok kalucik kere.
14Koinaki Lokapolon osi idwe,
osi nepepe ka auri kus!
15Kisulwanyiki Lokapolon osi,
lo asubi kuju ka akwap!
16Erait kuju naka Lokapolon bon,
konye abu nesi koinaki etung'anan akwap.
17Mam lukatwak kitamaete Lokapolon,
ng'ini kere ni etwani.
18Konye oni, lu ijarete nes iyalamikinete nesi
kipokona ka ikaru kere.
Kiturwoi Lokapolon!
Currently Selected:
Isabulin 115: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
