Isabulin 116
116
Ituri itwan ni ayuun alomun ka atwanare Akuju
1Amina eong' Lokapolon naarai iiranari nesi eong';
epupenene nesi alipasia kang'.
2Epupenene nesi eong' ng'ini pak elipi eong' nesi.
3Kemanakiito eong' ican luka atwanare;
kemanakiit eong' akitukuriano naka atwanare;
abu akurianu nepepe ka apodo kikamutu eong' noi.
4Kasodi eong' eworo ekiror ka Lokapolon abala,
“Kemaimait eong' ijo Lokapolon, koyuu eong'!”
5Ejaasi Lokapolon ka akitim nepepe ka ajokun;
Ejaasi Akuju wok ka akisoni.
6Idari Lokapolon ng'ulu lu emam kejaasi ka apedor;
na ajaare eong' ocani, abu nesi koyuu eong'.
7Kicasite etau kang', naarai ajaikin Lokapolon ejokuna kama kang'.
8Abu Lokapolon koyuu eong' katwanare;
abu nesi kireboki akiyo kang', kosodi nesi ainakin eong' emam kilanyio.
9Kanuka ng'un, alosi eong' koking'aren ka Lokapolon
ka akwap kalu ejarete.
10Abu eong' karicaki akiyuun kang'
atikere apak na atemara eong', “Epiricaar eong' cut,”
11atikere na akurianare eong' ka atemar,
“Emam itwan ni emunokina.”
12Inyena ainakini eong' Lokapolon
kanuka ajokusio keng' kere kanu esomaki nesi eong'?
13Adusi eong' Lokapolon ebino,
kanuka akiyalamikin nesi kanuka ayuuni eong'.
14Katuket ka itung'a keng' kere
ainakini eong' nesi ibore ni esumuniki eong' nesi.
15Epipilikiit Lokapolon noi
na etwania ipe kamaka itung'a keng'!
16Arait eong' lokejaanakinan kon, Lokapolon;
ejaanakini eong' ijo kwape ejaanakina toto kang'.
Iyuu ijo eong' katwanare.
17Abuni eong' ainakin ijo isubanit nika akiyalama ka akilip ijo.
18Esomakini eong' nukesumunikiit eong' Lokapolon kang'
koking'aren ka itung'a keng' kere,
19kokalapatan ka Etogo ka Lokapolon,
kokiding' kon, Okwai Yerusalem.
Kiturwoi Lokapolon!
Currently Selected:
Isabulin 116: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
