Isabulin 106
106
Ajokus ka Akuju namaka itung'a keng'
1Kiturwoto Lokapolon!
Kiyalamikisi Lokapolon, naarai ejokuna nesi;
erait amina keng' naka ikaru kere.
2Ing'ai ebeikiit alimor iboro kere lukapolok lu esoma Lokapolon?
Ing'ai ebeikiit akiturite nesi nama ilesikina?
3Erereng' ng'ulu lu eyong'ito acorasia keng',
lu isomaete ng'ini pak iboro lu ideerete.
4Kiitute eong' Lokapolon apak na ing'arakina ijo itung'a kon;
kimarakiite eong' de na iyuuna ijo kesi.
5Kinyek kaanyu eong' akitolosite kojokan naka itung'a kon
ka akimoro alakara naka akwap kon,
alakara naka epogi naka ng'ulu kalu eraito lukon.
6Esomata siong' arokusio kwape esomaata luka asonya kosi;
ajaikinosi siong' isomaete arokusio.
7Mam luka asonya kosi ko Misiri abutu kojenutu asoma nuka aumosia ka Akuju;
abutu kesi kimuruosi irwana ipu nu abu Akuju kitodiki kesi amina keng',
kosodete kesi akinwang'a Akuju loka Apedor kere ka Akare kanaka Reng'an.
8Konye abu nesi koyuu kesi, kwape kisumunikiitere nesi kesi,
tetere itodiari nesi apedor keng'.
9Kiretakini nesi Akare naka Reng'an, kowonikini;
king'arenikini nesi itung'a keng' atubor akare itorito kesi moding'.
10Abu nesi koyuu kesi kamaka ng'ulu kalu eng'erito nesi;
abu nesi koyuu kesi kamaka ipading'atin kes.
11Konye abutu akipi kilikosi ipading'atin kes;
emam ipede abu kideun.
12Kosodete itung'a keng' amunokin asumuneta keng' ka akiturite nesi.
13Konye abutu kesi kimuruokisi atipet nu kisomakiit Akuju kesi
kosodete asoma emam akidarakin acorasia keng'.
14Kosodi aminanari apoloori noi komoding' kotamete kesi Akuju;
15kanuka ng'un koinakini nesi kesi ibore niking'isito kesi,
bobo kijukakini nesi kesi adeka nakapolon noi.
16Ejaasi kesi moding', kojaikinos kesi ka akadakina ka Musa,
ka Aron, lokejaanakinan ka Lokapolon lokalaunan.
17Kosodi akwap ang'aari ka akilikor Datan
ka arapakin Abiram ka etogo keng';
18kobuni akimi otung'a keng' lukigwapito nesi
ka akicweikin itung'a ng'ulu luka arokusio.
19Kosodete kesi akiten itako emong' nika esawabu ko Sinai
kosodete kesi akimaa aputo ng'in;
20Abutu kesi kibelokisi aibusesu ka Akuju
ka akitaraun aputo naka emong' kalo enyemi inya.
21Kosodete kesi akimurwokini Akuju lo ayiuni kesi
ka asoma keng' nuka agogong' keng' ko Misiri
22Abu nesi kisoma aumosia kang'ina!
Abu nesi kisoma iboro luka akitim ka Akare kanaka Reng'an.
23Na atemara Akuju ebe emudiari nesi itung'a keng',
abu lokejaanakinan keng' loseuna Musa kitepege Akuju
ka akirebokin anyunyura ka Akuju amudiar kesi.
24Kanuka ng'un kosodete kesi aking'ere akwap nakajokan,
naarai amam kesi abutu komunokisi asumunet ka Akuju.
25Abutu kesi kibooto kayemai kes ka aking'urung'ura
kong'erete akiirar Lokapolon.
26Kosodi nesi akikwenyar kesi
ebe ebeikiit nesi akinyekin kesi komoding'
27ka akisiarakin auri kes akwapin ka itung'a kalu eng'erito Akuju,
ka akinyekin kesi kotwakata ka akwapin kilong'au.
28Kosodete itung'a ka Akuju ageun akilip Bal ko Peori
ka akinyam isuban lukedusite akujun nu etwakito.
29Abutu kesi kiguruokis anyunyura ka Lokapolon kanuka asoma kes,
kosodi adeka nakaronon noi akikamun kesi.
30Konye abu Fineas kogwo ka akitisilar ng'ulu lukarokok, kirebokinete adeka.
31Emarakin nesi nu eraito adolite
ageun kamaka auri kape adolore nama kanace ikaru kere.
32Abutu kesi koinakisi Akuju anyunyura ko ocorin kaluko Meriba,
kosodi Musa adumun kocan kanu kes.
33Abutu kesi koinakisi Musa anyunyuraari
akitodol na enerare nesi komam atauni ti.
34Mam kesi abutu kwarata ilong'au,
kwape kicorakiitere Lokapolon kesi,
35konye abutu kesi komanyanakinosi ka kesi
ka ageun atupite irotin kes luka itung'a kalu eng'erito Akuju.
36Abutu itung'a ka Akuju kimaata aputon,
kosodi akimaa kes ng'ini ainakin kesi etwakete.
37Abutu kesi kolemikisi aputon nuko Kanan,
isapa kes ka apesur kes bala isuban.
38Abutu kesi kobukoto awokot nu amam ajaasi ka akirot,
awokot nuka isapa kes ka apesur kes,
lu apotu kesi koleminikisi aputon nuko Kanan eraito isuban,
kosodete akitoron akwap ka awokot.
39Abutu kesi ikulopek kitoronarosi kasoma kes
bobo amam kesi amunokiito Akuju.
40Kanuka ng'un, abu Lokapolon konyunyuraki itung'a keng',
bobo abu kokadaki nesi kesi.
41Abu Akuju kinyekina kesi itung'a lu eng'erito nesi kipugata kesi,
kipugaete ipading'atin kes kesi.
42Abutu ipading'atin kes kiimakis kesi
kajaikin kesi kwap ka apugan kes cut.
43Irwana ipu abu Akuju koyuu itung'a keng',
konye koseunete kesi anwang'ite nesi ka akilumokin noi toma arokusio.
44Konye abu Akuju kopupoki kesi na amonyakinata nesi,
kiirari nesi akimonyo kes.
45Kanu kes abu nesi kiitu aitutuket keng' nakipiakit nesi ka kesi,
bobo kanuka amina keng' kana epolo, kisonie nesi kesi.
46Abu nesi koinaki ng'ulu kere lukisicanete kesi kisonioto kesi.
47Koyuune siong', Okwai Lokapolon Akuju kosi, kinyaku siong' kakwapin,
tetere ibeikinete siong' akiyalamikin ka akiturite ekiror kon lokalaunan.
48Kiturwoi Lokapolon, Akuju loko Israel;
kiturwoto nesi kipokona ka ikaru kere! Kinyek kotema ng'in itwan ebe,
“Ikote nepeneni!” Kiturwoi Lokapolon!
Currently Selected:
Isabulin 106: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
