Isabulin 105
105
Akuju ka Itung'a keng'
(1 Akis 16:8-22)
1Kiyalamikisi Lokapolon,
kolimonosi apolou keng';
kolimokisi akwapin nu esoma nesi.
2Kirukokisi Lokapolon;
kolimonosi ajokus na esoma nesi.
3Kolakara kanu iraitetere oni itung'a keng';
kinyekisi ng'ulu kere lu imaete nesi kolakarosi.
4Kolototo namaka Lokapolon king'araki osi;
bobo kimaata nesi ng'ini pak.
5Kiitutete aumosia nu abu nesi kisoma,
aumosia keng' ka atubonokino na abu nesi kolemu,
6osi auri ka Aburaam lokejaanakinan keng',
osi auri ka Yakobo, lu aseu nesi;
7Lokapolon nes Akuju wok;
acorasia keng' ejaasi ka agogong' kakwap kere.
8Ebuni nesi akidara akitutuket keng' ikaru kere,
isomae nesi asoma asumuneta keng' kauri aritat ape.
9Ericakini nesi akitutuket na abu nesi kipiakisi ka Aburaam,
ka asumunet na abu nesi kiyapoki Isaka.
10Abu Akuju kigwaaki akitutuket ka Yakobo,
akitutuket na ebuni akitoloto ikaru kere.
11Kotemari nesi ebe, “Abuni eong' ainakin osi akwap nako Kanan. Erauni nakus.”
12Adisiaka itung'a ka Akuju,
araito ilong'au kakwap kanako Kanan.
13Abutu kesi kirimoto alomun akwap ka akwap nace,
alomun ka ajakaanut ajakaanut nace.
14Konye amam Akuju abu kojalaki itwan ipede kisicana kesi;
erait ekipone loka akigang'ite kesi,
abu nesi kikwenya ijakaa ebala ebe,
15“Mam akikang'asa lukejaanakinak kang' lu aseuti eong';
mam ajoror lukadwarak kang'.”
16Abu Akuju kijukia eteng'e akwap kes
kosodi alemar inyamen kes kere.
17Konye abu nesi kijukia etwan kogee koking'aren kes,
Yosef lokegwelarite bala ejolot.
18Keyenite akejen keng' kinyororon,
bobo ayenikiite omorising' keng' enyoror loka icumai,
19akitodol nakisomakinototor ng'un nukedwaruut nesi.
Kebu akirot ka Lokapolon kitodia ebe ideere nesi.
20Kosodi ejakait loko Misiri ajalakini kolakakine nesi;
kolakakini lokepugan akwapin nesi.
21Kipiakini nesi apolokiite apugan keng'
ka ainakin nesi apolokiite akwap kere,
22ka apolokiite ofisan ka ejakait
ka apolou naka ayaite ng'ulu lukecorak nesi.
23Kosodi Yakobo alosite Misiri kogeuni akiboi kakwap kang'ini.
24Abu Lokapolon koinaki itung'a idwe ipu
koinakini kesi agogong'u adepar ipading'atin kes.
25Abu nesi koinaki itung'a luko Misiri aking'ere itung'a keng'
ka aking'ala lukejaanakinak keng'.
26Kosodi nesi akijukiar lokejaanakinan keng',
Musa ka Aron lokedaut nesi aseun.
27Abutu kesi kisomata asoma ka Akuju nukapolok noi
bobo kisomaete aumosia ko Misiri.
28Abu Akuju kijukia akirionus akwap,
konye mam itung'a luko Misiri akigwap acorasia keng'.
29Kibelokini nesi ang'ololon kes korautu awokot ka akiyara ikole kes kere.
30Abutu igereco korapakisi akwap kes,
kakilelebun igereco ore ka lokapolon de.
31Kelimu Akuju, kosodete icucu ka ikadepidep akilelebun akwap kere.
32Kijukuni nesi akako ka ekipie atiare akijukakin kesi akiru;
33komunaari nesi ikito kes luka emusabibu kiton ikaereren
kosodi nesi apusanar ikito kere luka akwap kes.
34Kelimu nesi, kobuni emase de, akwap kemase;
35abutu kesi konyamata ikito kere kakwap;
abutu emase konyama iraana kere.
36Abu nesi kwaara isapa lusodit luka itogoi kere luko Misiri.
37Kosodi nesi ayaari itung'a luko Israel king'a;
koyarete kesi epuesa ka esawabu,
kesi kere ang'aleete kicasitete.
38Akuriaka itung'a luko Misiri kesi
bobo alakara kesi na alomarata kesi.
39Abu Akuju kigwaaki idowon kuju ka itung'a keng'
ka akimi kware kanuka ainakin kesi acaus.
40Abutu kesi kilipata, kijukakini Akuju kesi ikweny;
abu Akuju koinaki kesi inyamen alomun kokuju kanuka akisimonikin kesi.
41Abu nesi kobwang'a amoru, kosodete akipi abukun,
eleleete itorito moding' bala ang'olol.
42Abu nesi kiitu asumunet keng'
nakisumunikiit nesi Aburaam lokejaanakinan keng'.
43Kanuka ng'un koyaari nesi king'a itung'a keng' luseuna,
kosodete kesi ekiruke kalakara.
44Abu nesi koinaki kesi amaata nuka itung'a kaluce
ka akinyekin kesi koyaasi amaata kes,
45tetere eyong'ete itung'a keng' ikisila keng'
ka aricakin acorasia keng' kere.
Kiturwoi Lokapolon!
Currently Selected:
Isabulin 105: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
