Awaragasia 9
9
Acoa ka abang'anut
1Aduk acoa etogo keng',
ka akitenakin ipirin ikanykaare.
2Aara nesi ityeng' keng', enyalaki nesi ebinu keng',
bobo etenaki nesi acele keng'.
3Ejuka nesi nukejaanakinak keng',
kodokata alaro kere na icele kiworoutu itung'a.
4“Kobuutu toma ng'in ni mam kijeni ibore!”
Kolimokini lu bang'aisik ebe,
5“Kobuutu konyamata emugati kang',
komatata ebino lo enyalit eong'.
6Kinyek abang'anut,
kigwapa eroto loka acoa.”
7Kikwenya ijo itwan ni enwang'it itung'a, idumuni ijo araton.
Itwan ni ikwenyari nikaronon, idumuni ijo aroma.
8Mam akikwenyar ni enwang'it itung'a,
eding'akinosi nesi ka ijo noi.
Konye kikwenya ijo nika acoa,
ebuni nesi akiyong' ijo noi.
9Kisisiak nika acoa iyatakini nesi acoa,
kisisiak nika acoa iyatakin akijen keng'.
Ibore ni isisiakini ijo nika acoa,
iyatakini akijen keng'.
10Ayong'ite Lokapolon nesi ageuni ka acoa.
Bobo akijen akiro ka Lokalaunan erait acoa.
11Iyatakin ijo acoa ikaru kon.
12Idumuni ijo adumunete kijaasi ijo ka acoa,
king'ere ijo, idumun ijo ican.
13Aberu na ebang'ana ecala;
mam kejeni ibore mam kesilikit.
14Iboye koking'aren ka ekek keng',
kere de iboye kokicolong' kalo icele kotauni,
15kiworoe itung'a lu etubonorosi,
lu isomaete asoma kes nuka ebele ebala:
16“Kobuutu toma, itung'a lu mam kijenete!”
Kolimokin lu ebang'aka ebe,
17“Ejijimak akip nu ekokoute,
kojijim emugati lo enyemio ka akiyeya.”
18Konye mam nesi kejeni ebe ejaasi lukatwak neni,
ebe ipejok keng' ejaasi okatwak.
Currently Selected:
Awaragasia 9: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
