Awaragasia 8
8
Akitama acoa
1Mam acoa kiworoe,
Mam akijen kikiarit eporoto keng' kuju?
2Egwoi nesi kokuju omoru akidunya ka eroto,
ka asicarin kirotin.
3Kama elomere ore lokapolon,
ka akidunya kirutei,
iworoe nesi ebala:
4“Kemaimait eong' osi kere;
anyarit eong' ng'in itwan ka akwap.
5Osi ibang'aisik, kisisiautu ajausu ka acoa;
kopuputu kojokan osi ibang'aisik.
6Kopupokisi akiro kang' nu ejoka cut;
nu alimokini osi kere ideerete.
7Nu enera eong' erait abeite;
kakadakiit eong' aliokonu.
8Ng'in ibore ni atemari eong' erait abeite;
emam akirot naka aliokonu kere na epait.
9Ideerete akiro kere kamaka ng'in kani ejeni;
kamaka ni ejaasi ka acoa, ejenuna.
10Koseu acorasia kang' akilanya epuesa,
bobo koseu akijen akilanya esawabu.
11Naarai ejokuna acoa akilanya aejoi,
bobo ng'in ibore ni ibeikini ijo akote mam kitiriano ka nesi.
12Arait eong' acoa, bobo ajaasi eong' ka akijen;
ajaasi eong' ka akijen ka apirianut naka atyakunun nukajokak.
13Ayong'ite Lokapolon erait ang'erite aronus;
Mam eong' kamina epogi, ka akitopoloro,
ka irotin luka arokusio ka akiro nuka aliokonu.
14Ajaasi eong' ka apedor naka akicor, bobo ajaasi eong' ka acoa.
Ajeni eong', bobo ajaasi eong' ka agogong'u.
15Eng'arakit eong' ijakaa akipuga akwap,
bobo eng'arakit eong' lu ipugaete akiten ikisila lu ejoka.
16Ng'in kere ni ipugae ka akwap, ipugae ka aking'arasit kang',
ijakaa nepepe ka lukapolok.
17Amina eong' ng'ulu lu eminasi eong',
ng'ini kere ni ekote eong' edumuni eong'.
18Abara ka ayong'ara ejaasi ka eong',
abara na mam kedauni ka akitolosite kojokan.
19Ejooka araito kang' akilany esawabu, lo ejokuna noi,
adumunete kang' ilanyit epuesa.
20Alosi eong' koroto kaloka adolite,
egwapit eong' irotini luka abeite,
21ainanakini abara ng'ulu lu eminasi eong', ka akileleb idulai kes.
22Abu Lokapolon kogee asubun eong' egeuni asoma keng',
ni sodit kamaka asoma keng' nu sek.
23Kokolong' sek abuni kogai asubun eong',
ering'a akwap kegeuna.
24Abuni kogai asubun eong' ering'a kesubuna akareni,
apak na amamar icorin luka akipi.
25Abuni kogai akidouni eong' ering'a kesubuna imoru,
ering'a kesubuna imukuran,
26ering'a Akuju kesubuna akwap nepepe ka alarosinei,
kere de alipu nusodit nuka akwap.
27Ajii eong' esubuni nesi kuju,
na ecoruna nesi alukunet kokuju ka akare,
28na epiakina nesi idowon kuju,
na ang'ara nesi icorin luka akare,
29na epiakina nesi eukoru loka akare,
tetere mam akipi kilamete ekisil keng',
na epiakina nesi apetatait naka akwap.
30Ajii eong' awae keng', bala lokadukon lo epolo;
arait eong' lo etalakarit nesi ng'in paaran,
alakara eong' ng'in apaaran koking'aren keng',
31alakara eong' kanuka akwap nepepe ka etung'anan.
32Kanuka ng'unu, isapa kang', kopupokisi eong':
Elakara ng'ulu lu ericakito irotini kang'.
33Kiirasi acorasia, kocoyarosi,
bobo mam anwang'ite acoa.
34Erereng' itwan ni epupi eong',
ni iboye ng'in paaran korute kang', idarit kawai kikekia kang'.
35Naarai ng'in ni edumuni eong', edumuni akijar,
bobo ecamuni Lokapolon nesi.
36Ng'ulu lu mam kedumunete eong', ikang'asi ikulopek;
ng'in ni eng'erit eong' emina atwanare.”
Currently Selected:
Awaragasia 8: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
