Awaragasia 7
7
1Okoku kang', kopup akiro kang',
koricak mam akimuruokin nu alimok eong' ijo.
2Koricak akiro kang' ijar ijo.
Koricak akisisianakino kang' bala ecopot ka akong'u kon.
3Koricak akiro kang' ng'in pak; kigiri otau kon.
4Kolimok acoa ebe, “Irait ijo kinac kang',”
konyarau akijen aupasia kon.
5Ebunete acoa ka ikisila akidara ijo kamaka aberu kikiliok ice,
kamaka aberu kanu ejenete akisiner ikiliok.
Amaidang'
6Apak ape etee eong' king'a ka apedot ka etogo kang',
7ka anyun eong' isapa lu ipu lu mam kejenete,
konye kejei epe lo kebang'ana cut kokiding' kes.
8Kelosi nesi koroto idirarit akudiete,
akidunya nama kiboya aberu mutan.
Kirum nesi eroto apiarit otogo ka aberu kang'in,
9erait kware iriono akwap.
10Nedio along'u kiriamakinos esapat ka aberu kang'in;
anapit aberu bala nadote ejaasi ka akiro keng'.
11Arait aberu na acelana noi ejeni nukarokok nu ipu noi, elosi koroto;
12kere de egwogwot ka akudiete,
apak ace egwogwot korotin,
apak ace egwogwot ka agwelanaret.
13Eporokini nesi etwan, ka anuikin etwan,
ka ang'olekini etwan akonyen keng' ebala,
14“Ajii eong' alemun isuban kang';
lolo na esomaki eong' kwape esumunikiitere eong'.
15Kanuka ng'unu, abu eong' akiriamakin ka ijo.
Akoo eong' ijo noi, konye adumu eong' ijo.
16Adau eong' apetat kang' ka apetan kanukajokak noi,
apetan nu elomuto ko Misiri.
17Etukukunyit eong' apetat kang' ka, akinyete ka emira, ecicikwa,
ka ekitoi lo ekukunyu noi.
18Kobuni! Kaperoto akware kere.
Ibunete oni alakara ka akanin ka nice.
19Mam okilen kang' kejei ore.
Elosit nesi nama elwana.
20Adaka nesi ikabel lu ipu noi,
ebong'uni ore kedaunosi isabitin iare.”
21Kanuka ng'unu kisinere aberu etwan ka akiro keng' kanu ejim;
kocamun etwan akiro keng' nuka ajimak.
22Atipet kigwapi etwan aberu,
bala emong' lo elosio akitub,
bala amori na eporokini toma amutego.
23Mam nesi ajeni ebe ng'unu eyarete akijar keng',
akitodol na aanyuna nesi bala adai nesi kekojo otau;
araun nesi bala ikwenyi ni ekamuni koligir.
24Kanuka ng'unu isapa kang', kopuputu eong',
koricakis nu abala eong'.
25Mam acamun aberu bala ng'in ayari etau kon,
mam alosite akote nesi.
26Naarai amunau nesi ikiliok lu ipu noi,
bobo ara nesi ikilioko lu ipu lu mam kimarunosi.
27Etogo keng' erait eroto lo elosi ates,
agolot na eperi nesi erait adwi naka atwanare.
Currently Selected:
Awaragasia 7: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
