Awaragasia 6
6
Akwenyanareta ace
1Ikoku kang', kirau ijo ni igwoikini ipaduko kon na ikarikina nesi akitaca ikabel lu ilipuut nesi,
kisumunikiit ijo ilong'ait;
2Kikamutu ijo ka akiro ka akituk kon kilope,
ikamun ijo ka asumunikineta kon?
3Kanuka ng'unu kikok ne okoku kang', koyuun ijo ilope
naarai ijii ijo akanin ka epaduko kon:
Kiwonyaki nama ka epaduko kon kimaima nesi kojalaki ijo.
4Mam akinyekin akonyen kon ajotor, kere de akiluranar.
5Koburucikin bala akaal ka akan kaloka mejan,
bala ikweny ni elokite.
6Itung'a lu kalany, itemokina
akisisiaun kokipone kalo ejariata imukunyu.
7Mam kesi kejaasi kalo ing'arenikit kesi,
emam kesi ejakait, kere lo ipugae kesi,
8konye ing'adanakinete kesi inyamata kes apak naka akamu;
elokonokinosi kesi abunore ka apak ka akiru.
9Ijo ikalany, idauni ijo apak na etia ai itolosit ijo ajoo?
Iwori inyouna ijo ka ajoo kon?
10Ibala ijo: “Kinyeki kapero eong' nediosi, kinyeki kajotoor eong' nediosi!
Kinyeki kabilaki eong' akanin kang' keyeng'u eong' nediosi!”
11Apak ng'ini kilomikini ijo apalupalut kwape ka lokademan,
kitupi ijo akadadu bala ekokolan.
12Itwan ni emam adumunete, itwan nikaronon,
elosi irimi inera aliokonu.
13Eyedanakini itung'a akonyen keng',
irite akejen keng', edodanari kebokorit keng',
14Itawon kes lukarokok ewomowomoete asoma arokusio,
bobo itolosito kesi akicokun ang'olopa.
15Kanuka ng'unu, edolokinete kesi atiokusio atipet,
eriapunosi along'u, ikang'asikinosi kesi komam ang'aleun.
16Ejaasi iboro ikanykape ereit Lokapolon,
ikanykaare lu eraito iboro lukarokok kama keng':
17akonyen nu idelasi, ang'ajep na ing'alae,
akanin nu arete itung'a lu emam akiro,
18etaulo itemitemi nukarokok,
akejen nu ekerete asoma nukarokok,
19ikajenan ni inera aliokonu,
nepepe ka etwan loka elodo lo enang'anakini ipoupatin akwesi.
Akikwenyario kuju ka Adoteu
20Okoku kang', koricak ikisila ka papa kon,
mam akinyekin akisisianakino ka toto kon.
21Korucok akiro ng'unu otau kon;
koyenik omorising' kon.
22Ilosi ijo, ebunete ayaite ijo;
iperi ijo, ebunete akidara ijo kware;
na inyouna ijo, inerakinete ka ijo.
23Naarai ekisil erait atara,
akisisianakino erait acaus,
bobo arior erait ekipone loka akijar.
24Ebunete akidar ijo kamaka aberu kanukarokok,
ka akitukuu ijo kamaka ang'ajep kana imaimai.
25Mam aminanari atemelel keng' ko otau kon,
bobo mam acamuni nesi ka abuko ka akonyen keng'.
26Naarai nadote ibeikin ijo agwela kemugatit,
konye nadote ecedari akijar ka etwan.
27Ibeikin etwan adakite akimi ka aturub keng' komam inagai keng' kinepunete?
28Kere de, ebeikini itwan alosit kokuju ka atotol komam akejen kinepunete?
29Erono noi bala apero ka aberu ka etwan kece.
Ng'in ni siomae kong'in icanakin.
30Mam itung'a akitabwalari ekokolan ekokoe inyamata edauti eteng'e.
31Kikamun nesi, tar kotac nesi erwan akanykaare;
elemuni nesi iboro keng' kere luko otogo keng'.
32Konye etwan lo isomae adoteu emam adam.
Emudiar nesi elope.
33Mam keyong'io nesi, ibung'ao nesi;
edumuni nesi asilut na mam kedauni.
34Einakin alilite ka etau etwan anyunyura,
bobo mam kisonie na inyang'ia nesi.
35Mam nesi kecamuni etacit kere;
emam etie kidutat kere ni isimonikin anyunyura keng'.
Currently Selected:
Awaragasia 6: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
