Awaragasia 30
30
Akiro ka Agur
1Nu kes akiro ka Agur okoku ka Yake.
Elimokini etwan Itiel nepepe ka Ukal:
2Abang'ana eong' noi kwape ka etyang'a.
Mam eong' keitunene bala etwan.
3Mam eong' kesisiaut acoa,
mam eong' kajen ibore ipede kuju ka Lokalaunan.
4Ing'ai edolit kuju kojenun acoa nakokuju?
Ing'ai ikamuti ekuwam ka akanin keng'?
Ing'ai ikamuti akipi ka abunakin kenaga?
Ing'ai idari iukoruon kere luka akwap?
Ing'ai ekiror keng' ka ekiror ka okoku keng' kijeni ijo?
5Akirot kere naka Akuju erait abeite;
erait nesi ebuku kamaka ng'ulu lu eng'opete kama keng'.
6Mam akiyatakin akirot kuju ka akiro keng',
kitisilari ijo, korauni ijo ing'alae.
Awaragasia ace
7Elipit eong' ijo Akuju iboro iare;
mam akimik eong' ering' eong' katwana:
8Kolema ekayed ka aliokonu kama kang'.
Mam ainakin eong' apalupalutu kere de abara;
Kitanae eong' kinyamata kalu itemokina eong'.
9Kemonikin eong' adepar noi,
abeikini eong' aking'er ijo.
Konye karau eong' ekapalpalan,
abeikin eong' ageuni akoko,
kainaki eong' ekiror ka Akuju ileeci.
10Mam akicukeikin ekejaanakinan kamaka ejakait keng'.
Ilamio ijo, kosilikin ijo.
11Ejaasi itung'a lu ilamete kes ka papa kes,
bobo mam kisirereng'ete kes ka toto kes.
12Ejaasi itung'a lu emunokito ebe eliara kesi kotaon kes,
konye mam kilotarito elosi kes.
13Ejaasi itung'a lu emunito ebe ejoka kesi,
inyena ajokus emunito kesi ejoka kesi!
14Ejaasi itung'a lu eboliatatar lukapalapalak kalu ekadito;
ng'ol nes ekipone lo ejariata kesi.
15Ejaasi ediket ka apesur, aare kere enyarite, “Koinakine eong'!”
Ejaasi iboro iwong'on lu mam kimonikinosi:
16Akwap ka lukatwak, aberu nakolip,
akwap na ewonit na ekote akiru,
ka akimi na emam kebala ebe elesikin.
17Ebuni ataruko alemar akong'o ka itwan kani ekwenare papa keng'
bobo konwang'ite toto keng' mam keyong'it,
kosodete imiyoi ketori akinyam.
18Ejaasi iboro iuni lu eraito luka aumosit kama kang';
Mam, eraito iwong'on lu mam eong' kajeni:
19Ekipone lo eporitore ekokom kokuju,
ekipone lo eliatore emun ka ataaba,
ekipone lo elosia ataker ka akare,
ka ekipone lo eminakinatare etwan ka aberu.
20Lo nes ekipone isomaa aberu na mam kemunokina:
Isomakin adoteu, ka akilong'ar ka atemar ebe,
“Konye mam eong' kesomakit ibore nikaronon!”
21Ejaasi iboro iwong'on lu mam akwap kebeikin akikany:
22Ebulesut lo erauni ejakait,
ka ebang'ai lo edumuni inyamata;
23aberu na emam amina kedumu ekiliokit,
ka najaanakinan na elemari alaro ka aberu kana ijaanakini nesi.
24Ejaasi iboro iwong'on lu edisiak ka akwap,
konye ejaasi ka acoa na epolo noi.
25Imukunyu, emam agogong'u,
konye ing'adakinete inyamata kes apakio nu akamu.
26Lu iboyete ka amoru; mam kejaasi ka agogong'u,
konye edukete itogoi kes atatabai.
27Emase, emam ejakait,
konye elosete atupa ka aturi.
28Ibeikin ijo akiting' akileliang' ka akan kon,
konye ibeikin ijo adumun kesi kotoma ore ka ejakait.
29Ejaasi iboro iuni lu eminanarito elotote kes,
iwong'on ipudaete elosete kojokan eraito:
30Eng'atuny, lo ejaasi ka agogong' akilanya ityeng' kere,
mam kekurriana etyang' epede;
31ekokor lo ipoga, ka ekoroi, ka ejakait lo elosi koking'aren ka itung'a keng'.
32Kijeni ijo ebe ibang'ani ijo, kipoga ijo,
kere de iwomowomoe ijo nukarokok,
korapak akituk kon kopalik.
33Naarai kibuk ijo akile elemuni akinyet,
kicikak ijo ekume elomunete aokoto,
kicikak ijo anyunyura elemuni ang'olopa.
Currently Selected:
Awaragasia 30: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
