Awaragasia 31
31
Acorasit na elimokino ejakait
1Nu kes akiro nuka ejakait Lemuel loko Masa, nu esisianakit toto keng' nesi:
2Irait ijo okoku kang' lo ominat, anyakakinet ka alipasia kang'.
Inyena alimokini eong' ijo?
3Mam adakin agogong' kon kere aberu,
bobo mam akinyekin irotin kon kojaasi nama kalu emunauto ijakaa.
4Lemuel, kopup.
Mam kitemokina ijakaa amata ebino kere ajon.
5Kematata kesi imuruorete kesi ikisila,
ka aking'ere aking'arakin lukapalapalak.
6Koinakis lu apiarito atwanare ajon,
lu ewomowomoete nama karonon koinakis ebino.
7Kinyek kesi komatata kimuruosi apalupalut kes,
ka akimuruori icani kes.
8“Kong'a akituk kon kiner kanuka itung'a kalu bang'aisik.
Kogwoiki ng'ul lu emam apedor.
9Kong'a akituk kon kiner kanu kes,
kotubonoki idolit.
Kigang'a lukapalapalak.”
Aberu na ejokuna
10Ing'ai ebeikini adumuni aberu na ejokuna?
Naarai ejokuna nesi noi adepar etyae kiboro kalu ilimite.
11Emunokini okilen keng' nesi noi,
bobo mam kekadi adumuni adumunete.
12Isomanakin nesi okilen keng' nama ejokuna,
emam nukarokok, ka akijar keng' kere.
13Esei nesi ajul nuka amerekekin,
ka akidonyo inagai ka akanini keng'.
14Eyaunene nesi inyamata ore kama elwan noi,
kwape kameli kana isomae ebele.
15Enyounene nesi ering'a akwap kiwalara ka akitenakin luko otogo keng' inyamata,
ka akitodikin nukejaanakinak keng' nu itemokina kesi asoma.
16Keng'olek emanikor kogweluni.
Ka ikabel kanuka akinyinyir keng', irae emusabibu.
17Euta nesi bobo egogong' ka asoma keng',
mam kekalanyana.
18Iboro keng' kere ejaasi ka adumunete.
Isomae kware itumoro emam akiyara atara.
19Ijeri alope aunoi keng',
ka akidonyo inagai keng'.
20Ing'aranakin nesi lukapalapalak.
21Mam nesi kepodo akateroto ko otogo keng',
naarai luko otogo keng' kere ejaasi kinagai luka amwanus.
22Edonyi nesi alope inagai luka apetat.
Elaete inagai lu pus.
23Ejenuna okilen keng' noi korutei,
iboete nenipe kimojong' luka akwap.
24Edonyi inagai ka akitegwel.
Itegwelanakin luka ebele arokoban.
25Ejaasi nesi ka agogong'u,
bobo eyong'ara nesi mam kiyalolong'i nu ebuto.
26Eng'aari nesi akituk keng' ejori ka acoa.
27Ejeni akitere ekipone ka itung'a keng' ko otogo,
mam kenyemi inyamata luka akalanyanut.
28Enyounete idwe keng' enyarito nesi alakara.
Itamae okilen keng' nesi ebala ebe:
29“Esomata aberu nu ipu ajokun noi,
konye idepa ijo kesi kere.”
30Ikee luka amina ing'alaete,
ajokunu naka akwan edauni ka atubor,
konye aberu na eyong'it Lokapolon itamao.
31Akinyinyira keng' etaco,
akitaaritoi keng' tar koyong'o ng'in itwan.
Currently Selected:
Awaragasia 31: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
