Awaragasia 29
29
1Itwan ni ikwenyanaro ng'ini pak kong'erite apupun,
emudiaro atipet komam ang'aleun bobo.
2Kitodikisi eong' lokapugan lo edolit,
kasodi eong' akitodikin osi itung'a lu elakara.
Kitokisi eong' lokapugan lokaronon,
kasodi eong' akitodikin osi itung'a lu icanasi.
3Kiricak ijo acoa, elakara papa kon ka ijo noi.
Erait abang'anut acakar ikabel akitosoma kamaka nadote.
4Kepodo ejakait akiro nuka abeite, icasi akwap,
konye kepodo akiro ka ikabel bon,
emunar nesi akwap keng'.
5Kimolee ijo kama kipaupatin kon,
idau ijo alokokin ereg kon kilope.
6Itung'a lukarokusio, ikamunete arokusio kes ka ikulopek,
itung'a lu emunokina elakara ka alakakina.
7Itwan nikajokan ejeni abeite ka lukapalapalak,
konye itung'a lukarokok mam kejenete ibore.
8Itung'a lu mam kepodosi luce,
ebeikinete akitabulakin ireria lukapolok.
Ng'ulu lu ecoaka itataunete iboro tii.
9Kiwosa nikacoa itwan ni ebang'ana,
ibang'ai ekwena along'u, ka ageuni acaliara ka araton.
10Itung'a lukaarak, mam keminasi itwan ni emunokina,
konye itung'a lu edolito idarete akijar kalu emunokina.
11Itung'a lu ebang'aka itodunete anyunyura kes,
konye itung'a luka acoa idarakinete nedio ka atauni tii.
12Kepupok lokapugan akiro nuka aliokonu,
lukapolok kere lu isomaete ka nesi eraunete lukaliokok.
13Itwan nikapalapalan kani iimakit nesi,
einakit Lokapolon kesi kere akonyen.
14Kigang' ejakait abeite ka lukapalapalak,
ipugae nesi apak na ewuja noi.
15Acorasia ka arwaarite ejooka kamaka idwe.
Ketupata eroto kes bon,
ebunete akitisilikin toto kes.
16Na ejaatatar itung'a lukarokok apugan, epolo aronus.
Konye ebunete lu edolito akijar ka anyun ebe adaunosi lukarokok.
17Korwaa idwe kon, ibuni ijo alakara kanu kes.
Mam kesi kebunete akitisilikin ijo.
18Akwap na emam Akuju keyait, erait akwap na ijulara.
Erereng' ng'ulu lu iricakito ekisil ka Akuju.
19Mam ijo kibeikin akitisilar lukejaanakinak ka akiro bon.
Ebeikinete iiratete ijo, konye mam kepupokinete ka asoma ekipone lo itemokina.
20Ejokuna amunokin itwan ni ebang'ana,
akilanya itwan ni inera emam kiitunene.
21Kiinanakin ijo lukejaanakinak kon iboro kere lu ekotosi ape ka akiditeu,
apaaran ace ebunete alemar ng'in ibore kon.
22Itung'a lu epipilak itau eminas ayauni ang'olopa ka ican.
23Atumanut kibirokin ijo kwap,
konye kiyapepera ijo, kiyong'io ijo.
24Aupasia ka ekokolan erait epading'a keng' noi.
Itisilaro nesi kelimo nesi abeite kokooti,
konye ilami Akuju nesi kemam kelimori abeite.
25Erono noi akiitununi kuju kepone lo iitununanata itung'a ice kuju kon,
konye kimunokit ijo Lokapolon, ijara ijo.
26Ng'in itwan ekote amina kaloka apugan,
konye nama ka Lokapolon bon nesi idumuna ijo abeite.
27Lu edolito mam keminas lukarokok,
lukarokok de mam keminas lu edolito.
Currently Selected:
Awaragasia 29: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
