Awaragasia 3
3
Acorasia namaka lukatumunak
1Ikoku kang', mam akimuruokin nu esisianaki eong' ijo,
konye kinyek etau kon koricaki ikisila kang'.
2Kiinakinete ijo nu esisianaki eong' ijo akijar apaarasia nu ipu.
3Mam akinyekin ayong'ara nepepe ka amuno;
koyenik kesi omorising' kon;
kigiraki kesi toma otau kon.
4Kisoma ijo nu, eminunete Akuju ka itung'a ijo.
5Komunoki Lokapolon ketau kon kere,
mam amunokiite nu iitunene ijo ijeni ijo.
6Korotin kon kere kocamu nesi,
kosodi nesi arwaari irotin kon.
7Mam akitere ebe ico ijo ilope noi,
koyong' Lokapolon, kinyek asoma aronus.
8Kikoki ijo neni, erauni bala ekeya lokajokan, itang'aleuni ajimii kon,
ka akitojon apipilu kon.
9Koyong' Lokapolon ka abara kon,
nepepe ka araito nusodit nuka iboro kon.
10Ilelebunosi idulai kon adepar,
bobo amotio koni nuka ebino ilelebunosi puc.
11Okoku kang', mam anwang'ite akitisilaro ka Lokapolon,
mam aking'ere akiretakino keng'.
12Erwaanari Lokapolon ng'ulu lu emina nesi,
kwape itisilara ikaurian ikoku keng' ni emina.
13Erereng' itwan ni edumuni acoa,
nepepe ka itwan ni edumuni akijen.
14Naarai epolo adumunete keng' akilanya ebele loka epuesa;
epolo adumunete keng' akilanya esawabu.
15Epolo acoa akilanya aejoi;
emam ibore ikote ijo ni eputosi ka acoa.
16Kiinakini acoa ijo akijar naka ikaru kere,
kiinakini nesi ijo abara ka ayong'ara.
17Irotin ka acoa eraito lu italakarito,
bobo irotin keng' kere eraito luka aipuc.
18Erait acoa ekitoi loka akijar kamaka lu edumunete nesi,
lu egeete adumun nesi enyarite lu elakara.
19Kosubuni Lokapolon akwap ka acoa keng';
ka akijen keng' kosubuni nesi kuju.
20Abu acoa keng' koinaki akawoi alel,
idowon ainakin akwap akiru.
21Ikoku kang', koricaki acoa ka akijen.
Mam akinyekin kolomasi kama kon.
22Kiinakinete ijo akijar,
akijar nakajokan kana ejaasi ka alakara.
23Ibuni ijo alosite koroto kon kotenan, mam ijo kigukini.
24Mam ijo kikurianaar na ilosia ijo apero,
kosodi ijo apero kojokan akware kere.
25Mam akurianu amudiaro na emam aikwenyaro,
na ebuni namaka lukarokok bala ekatapiro.
26Ebuni Lokapolon akidara ijo.
Mam nesi kinyekini aroti kikamu ijo.
27Ng'in kere na ibeikina ijo,
Kisomak nukajokak ng'ulu lu ekotosi.
28Mam alimokin ipaduko kon,
“Koloto, kobong'u bobo, ainakini eong' ijo moi,” ejaasi ka ijo.
29Mam akitemeteme ibore ipede ni ikang'asi ipadukotin kon;
idunyasi kesi ka ijo, emunokiito ijo.
30Mam apega kaluce emam atenikina
mam kesi kisomakiito ijo aronus apede.
31Mam aking'obel etwan lo ededeng'
bobo mam asoma nu isomaete kesi;
32naarai ereit Lokapolon itung'a lu isomaete aronus,
konye emina nesi itung'a lu edolito.
33Ejaasi ilami ka Lokapolon oreria kalukarokok,
konye isulwanyi nesi ireria kalu edolito.
34Imwari nesi lu imwarito nesi,
konye itodikini nesi lu iyapepera acamuno.
35Edumunete luka acoa akibusesu,
konye itisilikino ibang'aisik.
Currently Selected:
Awaragasia 3: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
