Popular Bible Verses from Awaragasia 3

Share

Komunoki Lokapolon ketau kon kere, mam amunokiite nu iitunene ijo ijeni ijo. Korotin kon kere kocamu nesi, kosodi nesi arwaari irotin kon.

Mam akitere ebe ico ijo ilope noi, koyong' Lokapolon, kinyek asoma aronus.

Koyong' Lokapolon ka abara kon, nepepe ka araito nusodit nuka iboro kon. Ilelebunosi idulai kon adepar, bobo amotio koni nuka ebino ilelebunosi puc.

Mam akinyekin ayong'ara nepepe ka amuno; koyenik kesi omorising' kon; kigiraki kesi toma otau kon.

Okoku kang', mam anwang'ite akitisilaro ka Lokapolon, mam aking'ere akiretakino keng'. Erwaanari Lokapolon ng'ulu lu emina nesi, kwape itisilara ikaurian ikoku keng' ni emina.

Ikoku kang', mam akimuruokin nu esisianaki eong' ijo, konye kinyek etau kon koricaki ikisila kang'. Kiinakinete ijo nu esisianaki eong' ijo akijar apaarasia nu ipu.

Erereng' itwan ni edumuni acoa, nepepe ka itwan ni edumuni akijen. Naarai epolo adumunete keng' akilanya ebele loka epuesa; epolo adumunete keng' akilanya esawabu. Epolo acoa akilanya aejoi; emam ibore ikote ijo ni eputosi ka acoa.

Ng'in kere na ibeikina ijo, Kisomak nukajokak ng'ulu lu ekotosi.

Kosubuni Lokapolon akwap ka acoa keng'; ka akijen keng' kosubuni nesi kuju.