Awaragasia 27
27
1Mam epogi kanuka imoi, naarai mam ijo kijeni nu isomakinos kokiding' ka imoi kalolo.
2Kinyeki itung'a ice kitamaete ijo,
akilanya akituk kon ka ilope.
3Alang'iru naka amoru ka asing'e mam kerait ibore ipede kitiirian
ka icani lu ebeikini abang'anutu eyauni.
4Ededeng' anyunyura bobo emunauni,
Konye mam kerait ibore ipede kitiiriani ka abilakina ka etau.
5Ejokuna arwar nice kama ejaasi luce,
akilanya aisikini nesi iitunene mam ijo kipodo kuju keng'.
6Ejoka ipoupatin, atikere kitipipilete ijo etau.
Konye kimanak lokasurupi akan okoper kon, kocoikina!
7Imono ijo, ing'eri ijo esik, konye ariti ijo eteng'e,
inyamata lu edwarak de, ejijim.
8Itwan ni elwanikina ka ere,
eputosi ka ikweny kani elwana kailit keng'.
9Akinyete ka isaeta lu ekukunyu italakarito ijo,
konye ican isiarakinete aipuc ka adama kon.
10Mam akimuruokin ipoupatin kon,
kere ipoupatin ka papa kon. Ijii ijo ocan,
mam akilip ipajan kon aking'arasit;
ipaduk kon ebeikin aking'arakin adepar ipajanitin lu elwaka.
11Kojaasi ka acoa okoku kang', ka ajaikinos eong' ka alakara;
tetere abeikini eong' abong'okini ng'in kere ni egwogwat eong'.
12Itung'a lu ecoak anyunete ican ebuuto ka aking'op, konye ni mam kiitunene elosi akiderikin toma ocan kosial kosodi akimonyo kere ka ajeni eong'.
13Kolemasi enaga ka itwan kisumunikit nesi ilong'ait, koinakisi kotaca kecamuti nesi akisumunikin ilong'au.
14Ng'ini ni itonyouni ipaduko keng' ka acala taparacu sek, ijenuno ebe ekotore nesi ilami.
15Aberu na eng'olopana eputosi ka akipi nu eisiete kapaarasia nuka akiru.
16Ikokin ijo itatauni nesi tii ai? Itamakit ijo akitogwo ekuwam kere de itamakit ijo abunakite akinyeete ka akan?
17Ecumat ipieni ecumat loce, bobo itwan isisianakini itwan nice.
18Kidara ekaereret, ibuni ijo adumun akinyam araito keng'. Lukejaanakinak lu idarete ijakaa kes eyong'io.
19Erait akonyen kon kilope nesi ianyuni ijo ipareuni ka akip, bobo erait ijo ilope nesi itee ijo ko otau kon.
20Aminanari ka etung'anan eputosi ka akwap naka lukatwak ejii apaki ng'ini pak.
21Akim etami esawabu ka epuesa; ajokunu ka itwan de etamio ka iponosio keng'.
22Atikere kibung'a ijo ibang'aisik akibucu akiyara, mam ijo kinomari abang'anut kes kotoma kes.
23Kijokie ibaren kon ka akijen kesi kotenan noi.
24Naarai abara edaununi. Akwapin de mam kiboyete ikaru kere.
25Ing'eri ijo inya ka akituk, ka aking'ere anya kowae kemoru, itolosito inya akilom kowae kaloce.
26Ibeikini ijo akitenun inagai alomuni kajulo ka amerekekin kon, ka agweluni emanikor ka ikabel kalu kidumuni ijo, kakitegwel akinei kon.
27Akinei nuce kiinakinete ijo akile kanu kon ka ekale kon, nepepe ka aberu nukejaanakinak kon.
Currently Selected:
Awaragasia 27: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
