Awaragasia 26
26
1Emam adumunet, ayong'ite ibang'ai, eputosi bala akako apaarasia nuka akolong',
kere akiru apaarasia nuka akidweny.
2Mam ilami kikamunete ijo kimam ijo kirono.
Eputosi ka ikweny lu eporotosi mam kiyeng'unete.
3Acarit naka afarasit, asigiria iyeni ijo akituku keng',
ibang'ai ibung'ao.
4Kibong'oki ijo aking'itasait na ebang'ana,
ibang'anar ijo de bala nesi elope.
5Kobong'oki ka abang'anut aking'itasait na ebang'ana,
kosodi niking'isi ajenun ebe mam nesi kecoo kwape kemunokitere nesi.
6Ng'in ni ijukiari ibang'ai koya akiro,
ibera ijo elope akejen kon ka akimata ican.
7Ebeikini ibang'ai akitosoma awaragan bala ebeikinata itung'a lu ing'walaisik akitosoma akejen kes.
8Akitama itwan ni ebang'ana,
eputosi bala ayenikin amoru toma afirimo.
9Ibang'ai ni inera awaragasia,
kisitokin ijo ekipone lo etamakitere itwan ni emera adotuni ekukwai ka akan keng'.
10Itwani ni igiri asoma ibang'ai kere lokameran eputosi ka ekaguman lo ikang'asi ng'in itwan.
11Ibang'ai ni inyogonokini asoma akiro nuka abang'anut,
eputosi ka eking'ok lo ebong'onokin akinyama alekan keng'.
12Ejokuna itwan ni ebang'ana, akilanya itwan ni iitunene ebe ecoo nesi,
konye komam nesi acoa apede.
13Inyo mam itung'a lu ekalanyak kelomunata king'a kotogoi kes?
Inyena ekuriaka kesi? Ing'atunyo?
14Itung'a lu ekalanyaka ibelobelosi ka apetat.
Mam kikunyarete nama elwana bala ekek lo ikunyi ka ipetai keng'.
15Ekalanyaka itung'a ice adolore nama ikaria akipiakin inyamata akituke kes.
16Itwan ni ekalanyan emunokit ecoo nesi noi akilanya itung'a ikanykaare,
lu ebeikinete alemuni akiro nukajokak kuju ka apolou ka akiro kes.
17Alomite ang'olopa na mam kikamuto ijo,
eputosi bala alosite oroto ka akikamun eking'ok koroto ka akii keng'.
18Itwan ni ing'alakini itwan nice,
ka atemar ebe kebolia nesi along'u,
eputosi ka itwan nika ibiler ni ebuliasi ka ijiito lukaarak.
19Ekipone ng'oli nesi ing'ala nesi ipaduk keng' ka atemar,
“Abulia eong' along'u!”
20Emam akito, etwani akimi;
emam elodilodi, emam ang'olopa.
21Kwape itonokiata amaka kere akito akimi,
nesi icukeya ekang'olopan ang'olopa.
22Ejijim eloodo!
Iminas oni akilikonor noi!
23Ejori loka aliokonu lo igwait akiro nu iwomowomoe ijo,
eputosi ka amilimili na elelet kokuju ka amoti.
24Nika esoswai igwait aronus ka akiro keng' kanu ejoka.
25Ebeikinete akiro keng' ejoka, konye mam amunokin nesi,
naarai epolo eding' ko otau keng'.
26Ebeikin nesi akigwa eding' keng',
konye ebuni ng'in itwan anyun akiro nukarokok nu isomae nesi.
27Itung'a lu elokete luce ikamunosi ka aloketa kes kikulopek.
Itung'a lu eremito amoru ipiricarosi ikulopek.
28Ni inera aliokonu eng'erit ng'ulu lu ikang'asaenene nesi,
bobo ni imaimai nesi ayaunene akang'asi.
Currently Selected:
Awaragasia 26: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
