Awaragasia 24
24
Alimoret nakitomonet kiwong'on
1Mam alilit kanuka itung'a kalukarokok,
bobo mam atamakin aupa ka kesi.
2Ayaute ican nes bon ewomowomoete kesi;
ng'in pak eng'arete kesi akituke kes, tar kitipipili itwan etau.
Alimoret naka akaisare
3Ireria edukio akitor apetatait naka acoa,
ka akitor akijen nes edumuna akicata.
4Nama ejii akijen, ejaasi iboro lukajokak otogoi kere.
Alimoret naka akaisare ka ape
5Egogong' itwan ni eco akilanya ni ejaasi ka agogong'u;
eebo, akijen ejokuna akilanya agogong'u.
6Naarai akitoro ayaite nakajokan nes ibeikina ijo ejie,
bobo akitoro namaka lukecorak kalu ipu nes edumuner apedor naka akilanya.
Alimoret naka akaisare
7Akiro nuka acoa icasit noi ibang'aisik akijen.
Emam ibore inerasi kesi inaminamio akiro nukajokak.
Alimoret naka akaisare kauni
8Kitemitemi ijo ng'in pak asoma arokusio,
ebunio akitama ijo kanuka araus etwan lo emina ican.
9Ng'in awomowomosit naka ibang'ai, erait arokusio.
Ereito itung'a itwan ni emam kejaasi ka ibore ipede adepar akimwarite luce.
Alimoret naka akaisare ka aung'on
10Kibenen ijo apak naka atiokusio, teni ibenen ijo.
Alimoret naka akaisare ka aung'on
11Mam akitumori ayuuni itwan ni apu ario along'u.
12Ibeikini ijo atemar ebe mam ng'unu kikamuto ijo,
konye ejeni Akuju bobo etubonokini awomomosio kon.
Itee nesi ijo; ejeni nesi.
Ebuni nesi akirop ijo atupa ka asomisio kon.
Alimoret naka akaisare ka akanykaape
13Ikoku kang', konyama esik; naarai ejokuna.
Kwape ejijimar esik na elomuni ka alaket kawoo kang'ajep kon.
14Kojeni ebe ejokuna acoa kanuka emoyo.
Kodumu acoa, ijaikinosi ijo ka apaarasia nukajokak koking'aren.
Alimoret naka akaisare ka akanykaare
15Mam araus bala itung'a lukarokok lu itemetemete akideme itung'a lu emunokina,
kere de akideme kesi ireria kes.
16Mam apodo erwan ekosai ibirorototor itung'a lu emunokina, ng'in pak enyounenete kesi bobo;
konye emudiarete ican itung'a lukarokok.
Alimoret naka akaisare ka akanykauni
17Mam alakara edumunete ipading'atin kon ican,
mam ajaus ka ailel edumunete kesi akang'as.
18Ejenuni Lokapolon kilakara ijo, kokadakini nesi;
bobo kong'eri nesi akitisilaari kesi.
Alimoret naka akaisare ka akany kaung'on
19Mam apodo kanuka itung'a lukarokok; mam alilit kanu kes.
20Itwan nikaronon mam kejaasi ka ibore ipede nikajokan apaarasia nuko king'aren. Mam akidarite ibore ipede nikajokan.
Alimoret naka akaisauni
21Okoku kang' koyong'ite Lokapolon ka ejakait,
bobo mam akimen ipede kama kes;
kere de akimoro kang'ulu kalu itepegete kesi.
22Itung'a bala ng'ulu edauno atipet.
Ijeni ijo ican lu ebeikiit Akuju kere ejakait akisomakin?
Alimoreta ace bobo nuka acoa
23Atemasi luka acoa de nu: Erono lukatubonokinak akigang'ite ewai epe bon.
24Ketiakutu kesi emam itwan ni isomate arokusio kisomate arokusio,
ilamio kesi bobo erei ng'in itwan kesi.
25Lukatubonokinak lu itisilanarete itung'a lu isomato arokusio,
ebunete akitolot kojokan ka ayong'ite itung'a kesi.
26Abong'okinet naka abeite erait bala anuikino naka ipoupa.
27Mam akiduk etogo kon ka akiten ere ering'a imanikoria kon kelokokina,
kong'in ijaikinosi ijo ka abeite ebe ibuni ijo adumun ibore niking'arakini ijo ka akijar.
28Mam akigama akiro kuju ka epaduko kon emam atenikina,
kere de ejori aliokonu kuju keng'.
29Mam atemar, “Esomakini eong' kesi nu esomakinete kesi de eong'!
Tar kenyang' eong' kesi!”
30Abu eong' ketoro kiding' ka imanikoria ka itwan kani ekalanyana,
emanikor ka itwan kani ebang'ana.
31Utukui, eleleba ikitwo luka ikokwa, ka eduan lo adepara.
Kibirokina arwatat naka amoru na emanakit kesi kwap.
32Abu eong' kang'oleki nu, ka awomowomo kuju kes,
kesisiauni eong' nu.
33Kopere nedio; kiluranar nedio.
Kobilaki akanin kon kiyeng'u nedio.
34Konye kiitu ebe ijotoe ijo, kilomikini ijo apalupalut bala lokademan lo ejaasi ka ijisio.
Currently Selected:
Awaragasia 24: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
