Awaragasia 20
20
1Ajono kikwenatatare ijo, ajono nukadwarak eyauto ang'olopa;
Ng'ini kere ni eyaito nesi ajono emam acoa.
2Kokuriana ejakait lo ejaasi ka anyunyura kwape ikurianare ijo eng'atuny lo egiro;
akitakadikin nesi erait amiedakin.
3Ejokuna ikunyarit itwan ka ang'olopa;
konye ibang'ai kere eng'olopa.
4Nikakorwon ni ekalanyana cut akoru amaata keng' ka apak kana itemokina,
mam kedumuni ibore ipede ni dwenyuna.
5Awomowomisio ka itwan eputosi ka akipi nu ejaasi ocor lo iduloro,
konye ewokuni itwan ni ejaasi ka akijen.
6Itung'a lu ipu itamaete ayong'ara kes,
konye ng'ai edumuni itwan ni emunokina?
7Kiboi itwan nikajokan kokipone kalo itemokina;
ebunete idwe keng' lu inyekini nesi adumun asulwany.
8Ejakait lo iboye kokicolong' kalo etubonokinere,
epiesi arokusio kere ka akonyen keng'.
9Ebeikiit itwan kere cut atemar ebe ejooka awomowomisio keng',
ebe kelema nesi arokusio keng'?
10Ereit Lokapolon itung'a lu itosomaeta alatirin nuka aliokonu,
ka akitemeteme naka aliokonu.
11Idwe de itodunete ejautene kes akitor nu isomaete kesi;
ijenuni ijo kemunokina kesi kere de kejooka.
12Ainaki Lokapolon oni akonyen nu iteere;
ka akii nuka akipup.
13Kitosoma ijo akolong' kon ajoo, irauni ijo nikapalapalan.
Kitolosite asoma, ibuni ijo ajaikin ka inyamat lu ipu.
14Emonyi nikagwelan ng'in pak ebe ikiara etyae noi,
konye eikari nesi ipoga adumu nesi kotyae kaloko kwap.
15Ejii esawabu, bobo ipu noi amoru nuka etyae kaloko kuju;
konye akituk kakijene eraito aejoi nuka etyae kaloko kuju.
16Kisumunik itwan agwoikin elong'ait koking'aren kon koyaa enaga keng',
koric akisumunikini ilong'au.
17Inyamen lu edumuno korotin kaluka aliokonu ejijim,
konye kokau eraunete bala asing'e ka akituk.
18Akitemetemiso itemuno ka acorasia;
koloto ojie ka acorasia kanuka acoa.
19Ng'in nika esomit elimonori akiro nuka akiyeya;
kanuka ng'unu mam aupa kang'in kani inera ka abang'anuut.
20Kilama ijo ikauriak kon,
edaun akijar kon bala atara na etwaani kware.
21Kidumu ijo abara kon kabenenu,
mam kejaikinosi ka ajokun kama kon.
22Mam atemar, “Abuni eong' akinyang' nukarokok”;
kidaraki Lokapolon, ebuni nesi aking'arakin ijo.
23Ereit Lokapolon itung'a lu itosomaete alatarin
nuka aliokonu kanu mam kitemokina.
24Kedauti Lokapolon atyakun nama itori itwan;
ikoni konye itwan kere ejenuni nama idirarit akijar keng' ka ilope ai?
25Kiitunun kojokan ering'a ijo kisumunikina Akuju idutat.
Ibeikini ijo akimonyo koking'aren.
26Ejakait loka acoa ejenuni ni isomae nukarokok,
kosodi akitisilar nesi emam akisoni.
27Emoyo ka etwan erait atara ka Lokapolon,
anyanari ng'in ibore ni ejii toma keng'.
28Ideuni ejakait ipugae kerait apugan keng' na emunokina,
na edolit kana isomanakini itung'a kere kakirianut.
29Akibusesu ka isapa ejii toma agogong'u kes,
konye ajokusu ka imojong' ejii toma akoruo kes.
30Icani lu epipili ilotanarete aronusu kanuka akibelokin irotin wok.
Currently Selected:
Awaragasia 20: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
