Awaragasia 19
19
1Ejokuna araus nikapalapalan, ni emunokina,
akilanya araus eliokoi ebang'.
2Mam kejokuna itwan ajausu emam akijene;
amamus ka atitinyu kipiakini ijo ocani.
3Itung'a ice emunarosi ikulopek, ka asomisio kes nuka abang'anut,
kosodete amonya Lokapolon.
4Itung'a lu ebarito ng'in pak edumunenete ipoupatin lukitetiak,
konye lukapalapalak mam kebeikinete aricakin idis lu ejatatar.
5Kiner ijo aliokonu kama etubonokinere, itisilaro ijo, emam akikuu.
6Ng'in itwan etamakiit ajokun kotung'a kaluka ang'osibib;
ng'in itwan ebala erait nesi ipoupa kalu ejoka itawon.
7Atikere ipajanitin ka itwan kani epalipalit, mam kejaasi ka adumunete kama keng';
na nes atenikina na emamatatar nesi ipoupatin.
Atikere ketamak nesi ekipone ali, mam nesi kebeikini adumun ipoupa.
8Ng'ini ni edumuni acoa emina ilope;
ng'in ni itolosit akijene ebari.
9Mam itwan ipede ni ing'alakini
kama etubonokinere itung'a ekui akitisilaro; adaun nesi.
10Mam kitemokina ibang'aisik akijar kotoma abara,
bobo mam kitemokina ibulesun akipuga ijakaa.
11Kijaasi ijo ka acoa, ibuni ijo ayaite anyunyura kon kojokan.
Kisomak itwan ijo nukarokok, ejokuna akideun bala mam
ijo kipupuut kere de kaanyut akiro keng'.
12Anyunyura ka ejakait eputosi ka agiro ka eng'atunyi,
konye ajokun keng' eputosi ka akopio kokuju ka iraana.
13Idwe lu ebang'aka ebeikinete amunar ikauriaka kes.
Aberu na isiali eputosi ka akiit ka akiru na mam kedaun.
14Ebeikin etwan adumun etogo ka ikabel kamaka ikauriaka keng',
konye Lokapolon bon nes ebeikini ainakini nesi aberu na ejokuna.
15Kitolosite akalanyanut; kitolosite ajoo, konye kiyari ijo eteng'e.
16Koricak ikisila ka Akuju, ibuni ijo akijar ikaru lu ipu;
king'ere ijo akitup ikisila, itwani ijo.
17Na iinakina ijo lukapalapalak, eputosi ka akikopakin Lokapolon,
bobo ebuni Lokapolon akitac ijo.
18Korwa idwe kon ering'a edisiaka na ebeikinata kesi akisisia.
Kemam, ing'arakit ijo kesi amunar ikolopek.
19Itwan ni ejaasi ka etau loka anyunyura, kolokokina akitisilaro.
Kilemu ijo nesi kocan katipe, ejii ijo asoma kong'in bobo.
20Kipup ijo acorasia, bobo kolokokina ijo akisisia,
apaaran ape ibuni ijo acoyar.
21Ebeikinete itung'a akitemetem iboro kere lu egelegela,
konye nu ekote Lokapolon nes isomakinosi.
22Erait asilut ajaus ka emwane;
ejoka itung'a lu epalipalito akilanya ikaliokok.
23Koyong' Lokapolon ibuni ijo akijar ikaru lu ipu,
ibuni ijo akiboi kotenan mam nukarokok kidolokinete ijo.
24Ekalanyaka itung'a ice noi, akipiakin inyamata akituke kes.
25Itemokina akitisilar akitopoloro,
tetere isisiaunete itung'a lu mam kejenete akirot.
Kicoo ijo, isisiauni ijo kirwar ijo.
26Itwan nika asilut bon nesi ebeikini akisican papa keng',
kere de akireng'iar toto keng' kore keng'.
27Ikoku kang', kipaliki ijo akisisia,
ibuni ijo akinyekin atipet nu kijeni ijo.
28Emam abeite kama kanikajenan kani ekwenar abeite.
Itung'a lukarokok eminasi aronus.
29Itwan ni ibang', ejeni ebe ebunio akibung'a nesi.
Currently Selected:
Awaragasia 19: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
