Yoshua 11
11
1Yabini, hayyu Hazori, dubbi tana d'ageennaani qonqo gara hayyoota Shimronitifi Akashafu, 2gara hayyoota lafa mirga ta gaareeni teetu, gara bale Yordani ta galaana Galilayaatini bitaa, ammalle gara lafa golbootifi lafa afaani galaana ta Dori jed'aniti erge. 3Inni qonqo gara worra Kanaanile, ka galaana Yordani gama lachu tau, gara worra Amori, worra Hiti, worra Perezi, worra Yebusi, ka lafa gaareeni taule, ammalle worra Hivi, ka gaara Hermoni jala, lafa Mispa keesa taule, erge. 4Worri suni askarti ufi ch'ufa woliini lola gabahe, askarti heddu muumme inqamne, ta aka maansa afaani baariini jirtu ta fardooleefi gaarille qabdu.
5Hayyooti tunini ch'ufti askarti isii woltuni d'ufte, fulla bisaani Meromuti wolti baate qubatte, aka worra Israeli haatu.
6AABBO Waaqi waan Yoshuani jed'e, Worra kana insodaatini, bori hojja tana anini ya worra harka Israelitini hobaase. Fardoole worra mogolcha gaari worrale guba. 7Duuba Yoshuafi askartini isaa ch'ufti bisaani Meromuti tassa worrati d'ufte haate. 8AABBO Waaqi harka worra Israeliti worra kenne; worri Israeli worra reebe haga mirga Mersefoth-Maimufi Sidoni had'e, ammalle haga bale Mispa ilaboru, gusse ch'ufa hobaase, 9Yoshuani akuma AABBO Waaqi isaani jed'e tolche: Fardoole worra mogolche gaari worrale gube.
10Jennaani Yoshuani keesa deebie, dira Haziri qabe hayyu isaale ijeese. (Gaafasi hayyuuni dira Hazori hayyoota ch'ufa ira jira.) 11Worri nama arti keesa jiru tokole illakimne, ch'ufa fit'e dirale gube.
12Yoshuani dira kana ch'ufafi hayyoota isaanile qaqabe fit'e, akuma hojattuuni AABBO Waaqa Musani isaani jed'e kaani. 13Ammo hataatu, worri Israeli dira kubile irati jaarani tokole ingumne, Hazori ka Yoshuani gube male. 14Duuba worri Israeli miha dadansafi hori dira suni keesa jiru ch'ufa boojie. Ammo nama tokole inhambimne, ch'ufa hobaasani. 15Akuma AABBO Waaqi hojattu isaa Musani jed'e, akasuma Musani Yoshuani jed'e, Yoshualeeni tolche guute. Inni woma inhambimne, waan AABBO Waaqi Musani jed'e ch'ufa guute.
Lafa Yoshuani fud'ate
16Yoshuani lafa tana ch'ufa fud'ate — lafa gaareenitifi lafa golbo mirgaafi bitale, lafa Goshenile lafa gamooji ta bitaatifi bale Yordani ch'ufa woliini fud'ate. 17-18Lafti inni fud'ate sunini haga gama Halaki ka bitaa d'aatu Edomuti ejite, haga Baal-Gadi ta mirga bale Lebanoni ta gaara Hermonitini bitaati ejiti. Yoshuani haga guyya heddu hayyoota lafa sunitini wolhad'ani, ammo inni worra ch'ufa dabsate hobaase. 19Diri nagaya worra Israelitini woliini tolfate tokoleeni injiru, dira Gibeoni, ka worra Hivi, male. Ka iraa hafe kaani ch'ufa Yoshuani had'e dabsate. 20#Qab-Ser 7.16 Woni kunini ch'ufti waan AABBO Waaqi tolche, ka inni garaa worraa jabeese, aka worri worra Israeli had'e, akanaani worri Israeli worra ch'ufa naasu male fit'e hobaase. Akuma AABBO Waaqi Musani jed'e kaani.
21Duuba gaafasi Yoshuani kae worra gugurda d'ed'eera gosa Anaki, ka lafa gaareeni keesa tau fit'e: Worri suni dira Hebroni, ka Deberifi Anabu, ammalle lafa gaareeni ta Yudatifi ta Israeli keesa taa. Yoshuani worraafi dira isaani ch'ufa balleese. 22Nami gosa Anaki ka lafa Israeli keesati hafe injiru. Ammo hataatuti, nami diqaani toko dira Gazafi Gathifi Ashdoditi hafe. 23Akanaani Yoshuani lafa ch'ufa fud'ate. Akuma AABBO Waaqi Musani jed'e. Duuba Yoshuani lafa suni d'aala worra Israeliti kenne, gosa gosani gargari qoodeefi. Akanaani lafti nagaya argatte.
Hayyoota Musani dabsate
Borana Bible © Bible Society of Kenya, 2019.