Yoshua 10
10
1Hayyuuni Yerusalemu, ka Adon-Zedeki jed'ani, aka Yoshuani dira Ai dabsate, akuma inni Yerikofi hayyu isaa tolche, hayyu Ai ijeese dira sunile balleese d'agaye. Ammalle aka worri Gibeoni nagaya worra Israeli woliini tolfatani woliini taani d'agaye. 2Worri Yerusalemu akasi d'ageennaani guddo sodaate; wonti akanatiifi diri Gibeoni haga dira hayyu qabu ka taatefu gudda. Inni dira Ai ira jira, ammalle worri isaaleeni worra jajaba, waan lola guddo beekhu. 3Jennaani Adon-Zedekini hayyuuni Yerusalemu d'aamsa kana Hohamu hayyu Hebronitifi Piramu, hayyu Yarmuthifiti Yafia, hayyu Lakishitifi Debiri, hayyu Egloniti erge waan jed'e, 4Koota na qarqaara, Gibeoni haana, waan worri Gibeoni Yoshuafi worra Israeli nagaya woliini tolfatanifi. 5Hayyooti shanani Amori tunini — hayyooti ta Yerusalemu, Hebroni, Yarmuthi, Laishifi Egloni — askarti worraa woltini d'ufte goli woli taate, Gibeoni marsite haate.
6Worri Gibeoni qonqo Yoshua, ka Gilgali jiruti erge waan jed'eeni, Aabbo nu illakisini, kooti hurrisi nu qarqaari, nu baasi! Hayyooti Amori ch'ufti ta lafa gaareeni, yayu goli wolii baate nu haate.
7Jennaani Yoshuafi askartini isaa ch'ufti, ta jajannilleeni ch'ufti sunuma Gilgali kaate. 8AABBO Waaqi waan Yoshuani jed'e, Worra diqole insodaatiina. Anini worra yayu harka keetiti kenne worri tokoleeni ka si dura eju injiru. 9Halkani suni Yoshuafi askartini isaa Gilgali kaate, yaa bulte, worra Amori d'ufte tassa haate. 10AABBO Waaqi worra Amori worra Israeli durati mudamsiise lubbu naqe. Duuba worri Israeli lafa Gibeoniti worra hobaase, haga kaarra gaara, worra gusse haga Azekafi Makedatini baase. 11Ato worri Amori kaarra gaara suni askarti Israeli baqatu, AABBO Waaqi bokaya d'akhaa gugurdaani roobu iti roobe. Ato bokeeni sunini inch'aamini worri Azekani bahe. Bokai d'akhaa suni nama worri Israeli ijeese ira ijeese.
12Guyya AABBO Waaqi worra Israeli worra Amori dabsachise, Yoshuani AABBO Waaqaani dubbate, worra Israeli ch'ufa durati waan jed'eeni, Adu Gibeoniti ejad'u: Jia atileeni bale Iyaloniti ejad'u. 13#2 Sam 1.18 Aduuni ejate, jiileeni chochou dide haga gochiti Israeli nyaapa ufi dabsatu, Dubbi tana kitaaba Yashari keesati int'aamne? Aduuni haga guyya toko ka ind'iini qajeelte gubba ejite. 14Taka guyyaani akasi artini duubaafi artini duraleeti intaane, ka AABBO Waaqi jecha nama ch'aqase. Gaafasi AABBO Waaqi worra Israeliti kalche!
15Eegi waan suni Yoshuafi askartini isaa Gilgaliti dachaate.
Aka Yoshuani hayyoota shanani Amori qabe
16Ammo hayyooti Amori shanani taani baqatte, goda toko ka makeda jed'ani d'okhachuti jirti. 17Duuba waan Yoshuani jed'ani, Hayyooti shanani taani ya mullate goda toko ka makeda keesati d'okhachuti jirti. 18Jennaani Yoshuani waan jed'e, D'akhaye gugurdo afaani goda suniti gangalcha. Nama eegule iti tolcha; 19ammo isani artiti inhafina, nyaapa keesani dudda duubani reeba had'a; dira isaani seenu d'owa. AABBO Waaqi keesani yayu worra harka keesaniti kenne. 20Duuba Yoshuafi worri Israeli nyaapa suni ituma kaani hobaasani daara baasani ammo hataatuti, worri ka gari baqate dira seene achiti lubbu bahe. 21Jennaani askartini ch'ufti nagayaani Makedati Yoshuati deebite. Nami lafa suni keesa jiru ka waan worra Israeli dubbatu tokoleeni injiru.
22Jennaani Yoshuani waan jed'e goda suni d'akha afaani iraa gangalcha, hayyoota shanani suni natiini koota. 23Duuba goda suni banani, hayyoota Yerusalemu, Hebroni, Yarmuthi, Lakishifi Egloni. 24Yoshuatini gad'ufani. Jennaani Yoshuani askarti Israeli ch'ufa wolti yaame, waan worra gugurda askarti ka lola isa woliini yaeni jed'e, Koota miila keesanini qaach'era hayyoota tana ira ejaanjad'a. Jennaani worri d'ufe hayyoota suni qaach'era ira ejaanjate. 25Duuba waan jara isaatini jed'e, Insodaatiina, garaa ilaafina: ammo garaa jabaad'a, wonti akanatiifi AABBO Waaqi akanuma nyaapa keesani ch'ufa tolcha. 26Duuba Yoshuani hayyoota taani fit'e, mukha shani irati fafannise reefi worra haga galgala achi tae. 27Aduuni d'iinaani Yoshuani biyyaani reefa worra guura jed'e, duuba reefa suni gadi buusani, goda worri qara keesati d'okhate kaani keesa jissani d'akhaye gugurdo afaani goda suniti gagalchani; d'akhayeeni sunini haga arrale achuma jirti.
Aka Yoshuani lafa Amori d'ibile qabe
28Guyya suni Yoshuani dira Makedatifi hayyu isaale had'e, qabe, nama dira suni keesa jiru ch'ufa, haguma inni gahuni, fit'e hobaase. Ammalle akuma qara hayyu Yeriko tolche, hayyu Makedale tolche. 29Eegi suni Yoshuafi askartini Israeli ch'ufti Makeda kaani Libna had'u d'aqani. 30AABBO Waaqi dira kanafi hayyu isaale akuma kaani harka worra Israeliti kenne, worri nama tokole illakimne, ch'ufa fit'e. Akuma hayyu Yeriko tolchani kanale tolchani.
31Eegi suni Yoshuafi askartini isaa ch'ufti Libna kaate Lakishi d'at'e, marsite haate, 32AABBO Waaqi Lakishi guyya lameeso harka worra Israeliti kenne. Akuma Libna tolche nama tokole illakimne, nama dira keesa jiru ch'ufa fit'ani. 33Jennaani hayyuuni Gezeri, ka Haramu jed'ani dira Lakishi qarqaaru d'ufe, ammo Yoshuani isaafi worra isaa tokole inhambimne, ch'ufa fit'e.
34Duuba Yoshuafi askartini isaa ch'ufti Lakishi kaate, Egloni d'at'e, marsite haate. 35Worri guyyuma suni worra dabsate, nama ch'ufa fit'e, akuma qara worra Lakishi tolchani. 36Eegi suni Yoshuafi askartini isaa ch'ufti Egloni kaate, dira Hebroni, ka kubile ira jiru iti korte haate 37dabsate. Hayyufi nama dira suni keesa jiruufi ka d'aatu jirule ch'ufa fit'ani. Yoshuani dira suni, akuma qara dira Egloni tolche nama tokole bau d'owe fit'e, dirale balleese. 38Jennaani Yoshuafi askartini isaa ch'ufti dira Debriti deebite haate. 39Inni dira sunifi hayyu isaatiifi dira d'aatu suni jiru ch'ufa qabe, nama keesa jiru ch'ufa fit'e. Akuma inni Hebronifi Libnafi hayyu isaa tolche, akasuma Debrifi hayyu isaale tolche.
40Akanaani Yoshuani lafa suni ch'ufa dabsate. Inni lafa gaareenitifi ta Negebutifi ta lafa golbootifi ta lafa gamoojile dabsate; inni tokole illakimne, ch'ufa fit'e, akuma AABBO Waaqi Israeli isaani jed'e kaani. 41Lafti Yoshuani dabsate haga lafa Kadesh-Barnea ejite Gazafi lafa Gosheni ch'ufa haga Gibeonileeti ejite. 42Yoshuani hayyoota tana ch'ufafi lafa isaanile baruma toko dabsate, waan AABBO Waaqi Israeli, worra Israeliti kalcheefi. 43Eegi suni Yoshuafi askartini isaa ch'ufti Gilgaliti dachaate.
Aka Yoshuani Yabinifi goli isaa dabsate
Borana Bible © Bible Society of Kenya, 2019.