Yoshua 9
9
1Hayyooti galaana Yordanitini ila adu, ta lafa golbo ta gaareeni: teetufi ta afaani baariini gudda haga lafa Lebanoni teetuleeni. Hayyooti Hititifi ta Amoritifi ta Perezitifi ta Hivitifi ta Yebusileeni waan kana d'ageete, 2jennaani wolti baate, aka Yoshuafi worra isaa ka Israeli had'ani woli galte.
3Ammo worri Gibeoni waan Yoshuani worra Yerikotifi worra Ai tolche d'ageennaani, 4iti malate d'aqani sagale woreega tolfatani. Kintaala dullachaafi gorjo daad'i dullati ta ch'ich'ite erbani, harre ira naqani. 5Woya ch'ich'iteefi kobe hobaate ta erbani naqatani sagale gogodde damansoofte fud'atani, 6fulla Yoshuani tau, ta Gilgali jed'ani, d'aqani waan Yoshuafi worra Israelitini jed'ani, nu lafa fagooti d'ufne, wold'ageeti isaniini woltolfachu feena, nuu tolcha.
7 #
Bah 23.32; 34.12; Qab-Ser 7.2 Ammo worri Israeli waan worra Hivitini jed'e, Ka isani hegeri lafa teenna keesa teetani, nu akami wold'ageeti isani woliini tolfanna? 8Worri waan Yoshuani jed'e, Nu hojattu teeti. Yoshuani waan jed'eeni, Isani eenu kana? Eesaa d'uftani? 9Tana gula worri odu tana isati odeese: Aabbo, nu AABBO Waaqa kanke waan isaa d'ageenne lafa fagooti d'ufne. Nu ya waan inni lafa Misiri keesati tolche ch'ufa d'ageenne. 10#Hen 21.21-35 Ammalle waan inni hayyoota lamaani Amori, ta Yordanini ila boru, tolche; hayyicha Sioni jed'ani ka Heshbonitifi hayyicha Ogu jed'ani ka Bashani, ta lafa Ashtarothi teetu ya d'ageenne. 11Jaaroleeni teennafi nami lafa teenna ch'ufti woreega fud'ad'a worra Israeli fuula keesa yaa nuuni jed'e. Duuba waan jettanini, Nu hojattu teesani koota, nagaya dubbanne wold'anna. 12Me qit'a keenna kana laala; gaafa woreega tolfanne mana keenna baaneeni owa, amma ya goge damansae. 13Gaafa nu gorjo tana daad'i iti nand'e guunne isiini hareeti, ammo amma laala ya ch'ich'ite. Woyaafi kobeeni ya deemma d'eertu tanaani hobaate.
14Duuba worri Israeli, ka AABBO Waaqaani ingahatini, sagale worra iraa fud'ate nyaate. 15Duuba Yoshuani nagaya worraani wolti buufate, ammalle wold'aqisa tolfatani worra boojie. Jaaroleeni aka wold'aqisa worra suni jabeesitu iti kakhate. 16Eeguma wold'aqisa nagaya kaani buufatani guyya sadi bulani, worri Israeli aka worri suni d'aatu worra tau hubate.
17Jennaani worri Israeli kae guyya sadeeso dira worra sunitini bahe: diri sunini Gibeoni, Kefira, Beerothifi ammalle Kiriath-Yearimu. 18Ammo worri Israeli worra suni imfinne, waan jaaroleeni worraa maqa AABBO Waaqa Israelitini worra kaaniti kakhateefi. Jennaani gumiini Israeli ch'ufti jecha jaarole suni quufa d'abde iti gungumte. 19Ammo jaaroleeni waan gumiini jette, Nu yayu maqa AABBO, Waaqa Israelitini kakhanne amma dandeenne worra woma intolchinu. 20Amma waan taanu, maro kakhu teennatifi worra imboojina, aka nu abaarsa inarganne. 21Duuba jaaroleeni waan jette worra boojine worri qoraani nuu ch'abse bisaani nuu d'aqa.
22Yoshuani worra wolti yaame waan jed'eeni, Isani maafi ka d'io d'uftani fagoo d'ufne jettani nu sobdani? 23Waan isani akasi taatanifi Waaqi ya isani abaare, worri keesani haguma jiru tisse nuu tahe qoraani nuu ch'abse, bisaani Mana Waaqa kiyyati woraaba. 24Worri waan Yoshuani jed'e, Aabbo, woni nu akasi taanefi, waan nu d'ageenne AABBO Waaqi keesani d'uguma waan hojattu isaa Musani jed'e, Anini lafa tana ch'ufa isaanii kenna yo iti d'uftanile nama keesa jiru ch'ufa fit'a. Duuba woni nu akasi taanefi, guddo isani sodaanne, waan lubbu teennale d'amnu seene. 25Nu amma harka kanke keesa jirra, ya ufi jibbaanne waan feetu nu tolchi. 26Duuba Yoshuani worra duu d'owe, harka Israeli keesaa baase. 27Ammo hataatu, inni tisse worra tolche, qoraani ch'absise, bisaani worra Israelitiifi huji sorioti woraabsise. Haga arrale worri hujuma fulla AABBO Waaqi fohate hojata.
Aka worra Amori dabsatani
Borana Bible © Bible Society of Kenya, 2019.