Aroma 8
8
Ali Muna Yezu Nkhabe Kutongwabve
1Na tenepo, cincino ale ali muna Kirixtu Yezu,#8:1 Matsamba anango akutoma akale a Mafala a Mulungu asalonga: Yezu, anakhonda kukhala mu nyama, mbwenye mu Nzimu. nkhabebve thangwi yakukoneswa nayo. 2Thangwi muna Kirixtu Yezu, mwambo wa Nzimu wa upulumuki, wakusudzula#8:2 Matsamba anango akutoma akale a Mafala a Mulungu asalonga: wandisudzula. pa mwambo wa kudawa na pa kufa. 3Thangwi pire pidacimwana kucita Mwambo na thangwi ya kusowa mphambvu kwa nyama yathu, Mulungu apicita pa kutuma Mwana wace mbamulandanisa na munthu wa kudawa, ninga ntsembe ya kukunda kudawa. Na tenepo, akonesa kudawa pa nyama, 4toera pinthu pyakulungama pinaphembwa na Mwambo, pikwanise kucitika muna ife anakhonda kutoweza makhaliro a nyama, mbwenye mbatitoweza makhaliro a Nzimu Wakucena.
5Ale anakhala mu nyama, ndzeru zawo zisanyerezera kucita pinafuna nyama, mbwenye ale anakhala mu Nzimu Wakucena, ndzeru zawo zisanyerezera kucita pinafuna Nzimu Wakucena. 6Thangwi manyerezero a nyama ndi kufa, mbwenye manyerezero a Nzimu Wakucena ndi upulumuki na ntendere. 7Na thangwi eneyo, manyerezero a nyama asaidana na Mulungu, thangwi nkhabe kubvera Mwambo wa Mulungu pontho nkhabe kwanisa kuubvera. 8Anabvera pinafuna nyama nkhabe kwanisa tsandzaisa Mulungu.
9Imwe nkhabe kundiwabve na nyama tayu, mbwenye musakundiwa na Nzimu, ngakhaladi Nzimu wa Mulungu uli muna imwe. Pontho, ngakhala munthu nkhabe Nzimu wa Kirixtu, munthu unowu si wa Kirixtu tayu. 10Mbwenye ngakhala Kirixtu ali muna imwe, manungo anu akhala ninga afa na thangwi ya kudawa, mbwenye nzimu wanu uli m'maso#8:10 Peno: Nzimu ndi upulumuki. na thangwi ya kulungama. 11Na tenepo, ngakhala Nzimu wa Ule udalamusa Yezu pa kufa uli muna imwe, Unowu ubodzi-bodzi udalamusa Kirixtu pa kufa, unalamusambo manungo anu akufa, na Nzimu wace ubodzi-bodzi uli muna imwe.
12Na tenepo, abale anga ife tina mangawa, mbwenye si na nyama tayu, kuti tikhale mbatitoweza pontho pya nyama. 13Thangwi mungakhala mu nyama munafa, mbwenye na mphambvu za Nzimu mungapha mabasa a nyama, munapulumuka. 14Thangwi onsene anatsogolerwa na Nzimu wa Mulungu ndi ana a Mulungu. 15Thangwi imwe mudatambira nzimu wa udzakazi toera mugope pontho tayu, mbwenye mwatambira Nzimu Wakucena udakucitani kuti mukhale ana a Mulungu. Nzimu unowu ndiwo unacemera na ife “Aba,” ndiko kubveka, “Baba.” 16Nzimu unowu wa Mulungu ndiwo unaticitira umboni kuna nzimu wathu, kuti ife ndife ana a Mulungu. 17Ngakhala ndife ana a Mulungu, na tenepo ndifembo ana a unthaka. A unthaka a Mulungu, pontho ana a unthaka pabodzi na Kirixtu. Ngakhala taona nyatwa pabodzi na Iye, tinapaswambo mbiri pabodzi na Iye.
Mbiri Inafuna Kudza
18Thangwi ine ndisadziwa kuti nyatwa zinaona ife cincino, nkhabe kudza kakhala sawa-sawa na mbiri inafuna kudza kapangizika mwa ife tayu. 19Pyonsene pidalengwa na Mulungu, pisadikhira na kufuna kukulu ntsiku eneyi inafuna kudza kapangisa Mulungu ana ace. 20Thangwi pidalengwa pyacitwa kuti pikhale pyakusowa basa, si kufuna kwa ipyo tayu, mbwenye ndi thangwi ya kufuna kwa Mulungu adapicita na cidikhiro, 21ca kuti ipyo pidalengwa pinati pibuluke mu udzakazi wakufubza uli na iwo, mbapitambira ufulu wa mbiri ya ana a Mulungu.
22Thangwi tisadziwa kuti pyonsene pidalengwa, mpaka lero pisabulira ninga nkazi wakubva kupha pakufuna kubala. 23Si penepi basi tayu, mbwenye na ife ene ana Nzimu Wakucena ninga misapu yakutoma, tisabulira n'kati mwathu mbitidikhira kucitwa kwathu ana a Mulungu, ndiko kuombolwa kwa manungo athu. 24Thangwi mu cidikhiro ceneci, ife tapulumuswa. Mbwenye kudikhira cinthu cinaoneka, si kudikhira tayu. Mbani munthu anadikhira cinthu cinaona iye? 25Mbwenye ngakhala tiri kudikhira cinthu kuti tidzati kuciona, tisacidikhira na kunyindira.
26Sawa-sawambo na Nzimu Wakucena, usatiphedza pa kupolola kwathu, thangwi ife nkhabe dziwa kuphembera ninga munafunika, mbwenye Nzimu ubodzi-bodzi usatiphemberera mbubulira na mafala akukhonda kulongeka. 27Mphapo ule anasaka kudziwa piri m'mitima mwathu, asadziwa ndi ninji pinafuna Nzimu, thangwi Nzimu Wakucena usaphemberera mbumba yace ninga munafunira Mulungu.
Mbani Anafuna Kutimwazanisa
28Tisadziwa kuti pinthu pyonsene pisaphedzera udidi kuna ale anafuna Mulungu, ale adacemerwa kuti picitike ninga mudafunira Mulungu. 29Thangwi ale adadziwiwa kale na Mulungu, akhadasankhulwa kale kuti akhale akulandana na Mwana wace, toera Mwana unowu akhale wa utombo pakati pa abale ace azinji. 30Ale akhadasankhulwa kale, Iye aacemerambo. Ale adacemera Iye, aalungamisambo. Ale adalungamisa Iye, aapasambo mbiri.
31Tinalonganji mphapo pa pinthu penepi? Ngakhala Mulungu ali na ife, mbani anafuna kutikunda? 32Ule adaleka kukhondesa Mwana wace ene kuti atifere, mbwenye mbampereka na thangwi yathu tonsene, anakhonda tani kutipasa pezi pabodzi pene na Iye, pinthu pyonsene? 33Mbani anafuna kuapasa thangwi anyakusankhulwa a Mulungu? Ndi Mulungu anaalungamisa. 34Mbani anafuna kuakonesa? Nkhabe m'bodzi anafuna kuakonesa. Thangwi Kirixtu Yezu afa mbalamuka pa kufa, mbakhala ku nkono wa madyo wa Mulungu, pontho asatiphembererambo. 35Mbani anakwanisa kutimwazanisa pakufunana na Kirixtu? Ndi nyatwa, ndi kutsukwala, ndi kuchingwa, ndi njala, ndi usiwa, ndi kugopsa, peno ndi tarasada? 36#Lang'anambo: Mas. 44:22.Ninga pidalembwa m'Bukhu ya Mulungu kuti:
“Na thangwi ya kukufunani
tiri kufa ntsiku zonsene,
mbaticitwa
ninga mabira
anaenda kaphiwa.”
37Mbwenye pa penepi pyonsene, ndife anyakukunda kupiringana anango, na thangwi ya ule adatifuna. 38Thangwi ndisatawira kuti kufa, peno kukhala m'maso, peno maanju, peno mizimu ya kuipa, peno pyacincino, peno pinafuna kudza, peno mphambvu zinango, 39peno pyakudzulu, peno pyapantsi pa mataka, peno pinthu pinango pyakulengwa, nkhabe cibodzi cinakwanisa kutimwazanisa pa kufuna kunaticita Mulungu, muna Kirixtu Yezu Mbuya wathu.
Currently Selected:
Aroma 8: CCHNT13
Highlight
Copy
Compare
Share
Want to have your highlights saved across all your devices? Sign up or sign in
Cibverano Cipsa Cisena © Bible Society of Mozambique, 2013.
