TSINGANU 6
6
Khuchelihitswa Khundi Khunyishi
1Yivi mwana wanje, nu wirulitsa khusinjilila likoovi liu mureende wowo,
nu walaaka uliitsa khurunjila mundu wundi wa yivi mwene wakorwa,
2yivi mwene wayikumilwa na makhuva koko ka walomoloma,
wareekwa ni lilaaka lia wahaana.
3Mwana wanje, uve numanyi ndi uli hasi wu weshie;
nu wenyi khwihonyinya khurulamu, ukhole likhuva yili,
Khola vwangu utsi khuye, umusaye nayaanza akhukhole khuva muvoholole.
4Uvuli khukonakhu khali hati hene tsindolo tsiosi,
inoho khurenjetsakhu nushili khukhola kenako.
5Wihonyinyi khuli impongo yihonyinyanga khu muhiitsi,
khuli linyonyi lihonyinyanga khurula mu makhono ku mureechi.
6Munyi vandu vakara!
Yeechikhu shindu khurula khu mavalu,
kanakanikhu shindu khuli kamenyanga munyole vusitsa.
7Mavalu kavula mwimilili ukimililanga,
inoho musinjilili inoho mwamihi ukamihanga;
8navutswa kavikhanga shiukhulia shiako mumatukhu ki shimiyu,
khandi kavunjitsanga shiakalia mumatukhu ki lichesa.
9Yivi mundu mukaara, uliitsa khukona yaho khutukha lina?
Ni litukhu shina lia uliitsa khuvukha khurula mu tsindolo tsiotsio?
10Uvoolanga, “Lekha ngonekhu,
narenjetsakhu hati vutswa;
Nilinga makhono kaanje nimbulukhakhu hati vutswa.”
11Navutswa lwa uliitsa khuva nushikonanga,
nonoho lwa vumanani vu khwinjilila khuli mundu munuuli,
vutakha vuliitsa khukhuseera khuli mundu wiyavaale viuchi.
12Mundu uvula vukhala vwosi, mundu mutamanu,
ahuya huyanga shia havundu hosi ni yilomolominya vindu viu vuvehi.
13Atemula temula tsimoni tsietsie,
nu khuchela chela na makhono keke,
khutsililila khukaata vandi,
14nakanakananga khuli anyala khukhola vindu vitamanu,
khurulana khu tsinganakani tsietsie tsingoyanu tsiu khuraanjitsa vutiinyu.
15Khulwa yako, nonoho lwa matiinyu kaliitsa khumunyolishitsa
vuchila khumanyakhu shindu shiosi;
aliitsa khutivitswa vwangu, vuchila lisuuvilitswa liu khuhonyinywa.
16Khuliho ni vindu sita viu Mwami Nyasaye yaleka;
ni kilikali, vindu saba viamusiinya:
17Mundu khulolekha khuva nu vwiloli,
khulomoloma makhuva ku vuvehi,
vulumindi vu khwiira vandu vavula vutamanu vwosi,
18tsinganakani tsiu khuloshitsa khukhola vindu vitamanu,
mundu wilukhachilanga khukhola vindu vitamanu,
19mushiahidi uhaananga vushiahidi vu vuvehi,
khandi mundu uraanjitsanga tsimbemba mu vamwavo.
Lichelihitswa khu Vuheeyi
20Mwana wanje, ulonde malako ka tata wowo,
uvuli khwivilila mechitso ka mama wowo yakhwechitsa.
21Utsililile khulonda makhuva kavo shia khase khosi,
nu kavikha mu mwoyo kwokwo.
22Mechitso kavo kaliitsa khukhwimilila nuli khu luchendo,
lwa uliitsa khuva nuli mu tsindolo,
kaliitsa khukhuchelihitsa mbasu mu mavwevwe, numali khuvukha.
23Malako kenako kali khuli itaaha yakhanga vulavu;
mechitso kali khuli vulavu,
lichelihitswa lienelo lili khuli injila yu khukhukhola khutsililila khuva mwoyo.
24Kaliitsa khukhwikalila khuva ihale wene khurula khu mukhali mutamanu,
khuvula khuvoolitswa na vakhali vandi.
25Uvuli khwikombakhu mu mwoyo kwokwo khuli yakaasa likoondo;
inoho khukorela khu liheenza lielie.
26Mundu anyala khukuula mukhali mulaaya khu mukati kwonyene,
navutswa vuheeyi vulamala shia shindu shiosi shiu mundu ali nashio.
27Mundu anyala khuchingakhu mulilu khu shiliru shieshie
vuchila tsinguvu tsietsie khuyia?
28Mundu anyala khuchendakhu khu mandaa ku mulilu,
vuchila khuyia vilenje vievie?
29Nako kakholekhanga khu mundu utsitsanga khu mukhali wu mureende wewe;
shia mundu wosi utiilanga khuye aliitsa khusalilitswa.
30Vandu vambakhananga khuchaya shihuuvi,
niiva alahuuva shiukhulia lwa inzala ivetsanga nimali khumuleka.
31Navutswa khali ndio, niiva alakumilwa, alarunga hali saba,
khali niiva alakoritsa miandu chiosi chiali nachio munzu mwemwe.
32Navutswa mundu wu kholanga vuheeyi avula vucheli vwosi.
Ye mwene yitivitsanga vutswa.
33Aliitsa khurumulwa tsinguma nu khuchaywa;
aliitsa khuheelwa tsisoni khumatukhu koosi.
34Musatsa witsula imbotokha ali nu vurima mu vunyishi;
khuvanzila vuchila khuvela tsimbavasi.
35Yambakhananga khuhuchililakhu murungu kwosi;
inoho khuheelwa asoya, khali nikava iliitsa khuva inyishi.
Currently Selected:
TSINGANU 6: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013