TSINGANU 7
7
1Yivi mwana wanje, tsililila khulonda makhuva kaanje;
uvuli khwivilila malako kaanje.
2Ulonde malako kaanje, uve mwoyo;
utsililile khulonda mechitso kaanje khuli ulindanga indolelo yi imoni yoyo.
3Ukavohe khu makhono koko;
ukare mu mwoyo kwokwo.
4Uvukule vusitsa khuli ni mbotso wowo,
khandi vucheli khuli nu mulina wowo wa hahimbi.
5Viliitsa khukhukhola khuva ihale wene khurula khu vakhali va vasatsa vandi,
khurula khu vakhali vamanya khuvoolitsa vasatsa.
Mukhali Ukholanga Vulaaya
6Litukhu lindi, lwa nali nimbenzelanga ilwanyi
khurulila mu litirisha li inzu yanje,
7nalola vasatsa vavukha vanyishi nivavula vucheli,
navutswa naheenza nindolamu muvukha mulala wonyene uli muyiingwa.
8Yali nachendanga khu muhaanda kwenoko,
himbi mumbeka havundu ha mukhali wundi yamenyanga,
natsitsanga hango wu mukhali mwenoyo;
9mu tsisaa tsiu khulukolovo,
shisuundi nende vutukhu nuvuli himbi khutukha.
10Nalwo lwa mukhali wundi yitsa khumwakanila,
niyifwali khuli mukhali wu kholanga vulaaya,
naloshitsanga kanyala khukhola.
11Yali mukhali wi liyooko lilahi khandi winjinia;
yali wamenya nachendanga khu muhaanda kwenoko,
12tsisaa tsindala khu muhaanda, tsindi mu tsisokoni,
nasinjile nalindililanga mu shia mumbeka mwosi.
13Mukhali mwenoyo yakumila musatsa muvukha, khumutsunzuna,
yamuheenza vulunji mu tsimoni, navoola,
14“Mbani vihanwa vianje nunundi,
khandi nyoli inyama khurula mu misango,
15nakhitsa hanu khukhukhava yivi,
mbele ni lienya liu khunyola yivi, makhunyoli!
16Mali khwala vulahi shitali shianje,
ni tsimbala tsi tsilaanji lukanu khurula mu shivala shia Misri.
17Mali khuvekha shitali shianje makura kahuunyanga vulahi
ka manemane, udi, nende Kinamoni.
18Hamba khukone nivi khutukha mu mavwevwe;
khwihulile vulahi nu khukumilane.
19Musatsa wanje avula ingo;
watsia ihale wene khu luchendo.
20Watsiayo ni shisiko shi tsisenti tsinyishi;
aliitsa khuvula khukalukha masitsa kavili nikashili khuvwa.”
21Yamukoyanyinya na makhuva keke ku khukaatilitsa;
yamuvoolitsa khurulana khu lilomoloma lielie lilahi.
22Nonoho lwa yasimukha natsia naye khuli ihili ihilwangwa khusinzwa,
khuli impongo ikwitsanga mu mureeko;
23ha muvanu kulivirilanga mwoyo kwayo.
Yali khuli linyonyi lipulukhanga nilikwa mu ineti,
vuchila khumanya ndi atsitsanga khukhutsa.
24Khulwa yako, vaana vaanje, mumbulishitsi.
Muhulile vulahi vwene makhuva kaanje kambolanga.
25Muvuli khulekhakhu mukhali khuli mwenoyo amwimilili;
muvuli khuhuya huyakhu shia havundu hosi nu mwenyanga khumulola.
26Neye wachila vasatsa vanyishi nivakhutsa,
vandu vayiira khale ni vanyishi.
27Inzu yeye ili khuli injila ikhwinjilitsanga mu shihatisi,
ni havundu hakholomokhanga nakhuhila mu likhutsa.
Currently Selected:
TSINGANU 7: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013