TSINGANU 4
4
Vukhonyi vu Vusitsa
1Munyi vaana vaanje, muhulishitsi mivaalo ka tata wenyu,
Mumuhulili, munyole limanya;
2shichila muheetsanga vindu vilahi viu khulonda,
muvuli khwambakhana mechitso kaanje.
3Lwa nali nishili vutswa mwana wi shiyayi muti,
mwana mutelwa khu mama wanje,
4tata wanje yanzechitsanga, nambolela,
“Ulonde makhuva kaanje nu mwoyo kwosi,
uvuli khwivilila malako kaanje, utsililile khuva mwoyo.
5Unyole vusitsa nende limanya!
Uvuli khwivilila inoho khwambakhana makhuva kaanje.
6Uvuli khulekhakhu vusitsa; navwo vulakhulinda;
Uvuyaanze, navwo vulakhushinga.
7Shindu shiu vukhonyi muno nu khunyola vusitsa;
khandi shia shindu shiosi shiunyoli, nu vulahi nunyoli vucheli.
8Uyaanze vusitsa, navwo vulakhuha tsingulu;
uhande khuvwo, navwo vulakhukhola khuheelwa luyali.
9Vuliitsa khuchila wifwale shilemba shilahi khu murwi kwokwo,
vuliitsa khukhuha itaachi indahi yene yu vukhumi.”
10Mwana wanje, uhulile khandi uhuchilile makhuva kaanje,
uhindile uve ni mihika minyishi.
11Mali khukhwechitsa khuli unyola vusitsa
khandi mali khukhwivaalila khuli umenya limenya lilahi.
12Shindu shivulakhuho shinyala khukhwikalila munjila yoyo,
niiva ulamenya khulondokhana khu vusitsa;
shiunyala khwisikarila, khali niiva unyala khwilukhaka tawe.
13Utsililile khulonda mivaalo kaanje, uvuli khukalekha;
uhande khuko shichila nako katsitsanga khukhulinda lwa ushili mwoyo.
14Uvuli khutsiakhu ha vandu vatamanu vatsitsanga;
Uvuli khulonda mwiima kwa vandu vakholanga vindu vitamanu.
15Uleshe khukhola ndio! Ulekhane nu vutamanu!
Uvwambakhane ma utsililile khuva khu vwovwo.
16Vandu vatamanu vavulakhu khuli vanyala khukona nivashili khukhola vindu vitamanu;
vavula tsindolo tsia vanyolanga nivashili khwisikaritsa mundu.
17Vutamanu nende vululu vili khuli shiukhulia
nende shiu khung'wa shiavo.
18Muhaanda kwa vandu vi likhola liu vulunji vachendelakhu kuli khuli vulavu vwi liuva,
liang'ang'anga vulavu vunyishi muno mu mbasu.
19Ka vandu vatamanu vakholanga kali khuli shisuundi tititi,
vakorwa khumanya shindu shia visikarilakhu.
20Mwana wanje, ureeche maroyi koko khu kambolanga;
uhulishitsi livoola lianje.
21Uvuli khukivilila;
khutukha ukare mu mwoyo kwokwo.
22Nako kaleranga vulamu khu mundu uli navwo,
nuvuli khuli lunyasi khu mmbili kwekwe.
23Uve mucheli khuli ukanakananga;
vulamu vwovwo vurulananga khu tsinganakani tsiotsio tsia uli natsio.
24Ulekhane ni lilomoloma liu khukoyanyinya vandi,
uvuli khukaatakhu mundu.
25Uheenze vulunji khu kali imbeli wowo nu mwoyo kwatoto;
Uheenzelele kali imbeli wowo.
26Uloshitsi mu vucheli ka wu kholanga,
khandi shia shindu shiosi shia wu kholanga shiliitsa khuva shilahi.
27Ulekhane ni likhola li vindu vitamanu
utsililile khumenya munjila indahi.
Currently Selected:
TSINGANU 4: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013