TSINGANU 3
3
Vaana Vavukha Vakhonywa Inganakani
1Yivi Mwana wanje, uvuli khwivililakhu ka khwechitsanga.
Shia khase khosi witsushitse ka khuvoolelanga ukhole.
2Mechitso kaanje kaliitsa khukhukhola uhindile,
kaliitsa khukhukhola khuhindahala.
3Utsililile khuva musuuvilwa khandi mulahi mu likhola,
uvivohe vivotokhane mwing'ori mwomwo;
nu khuvitsushitsa mu mwoyo kwokwo.
4Niiva uliitsa khukhola ndio, uliitsa khuhuchililwa khandi,
uliitsa khwitsominywa na Nyasaye nende vandu.
5Vikha lisuuvilitsa liolio nu mwoyo kwokwo kwosi mu Mwami Nyasaye;
nu khulekha khulondelela tsinganakani tsiotsio.
6Witsushitse Mwami Nyasaye mu shia shindu shiosi shia wu kholanga,
neye aliitsa khukhumanyinya injila inunji.
7Uvuli khwilola uli nu vusitsa khuvira khuli luvetsanga;
londa vutswa malako ku Mwami Nyasaye, ulekhane nu vutamanu.
8Niiva uliitsa khukhola ndio, kaliitsa khuva khuli lunyasi lulahi,
luhonyinyanga makuule koko nulusositsa isalila yoyo.
9Uhe Mwami Nyasaye luyali lwa umuheetsanga shihanwa khurula khu miandu chiochio,
khandi khurula mu viraakwa vilahi viosi via uvetsanga nu wakhachesa mu mulimi kwokwo.
10Niiva uliitsa khukhola ndio, viachi viovio viliitsa khwitsula imu inyishi,
khandi uliitsa khuva ni idivai inyishi ya uliitsa khukhaywa khuvikha.
11Mwana wanje, uvuli khuchaya Mwami Nyasaye lwa akhuheetsanga macheli,
uvuli khulechelitsa lia akhukondeshelanga.
12Mwami Nyasaye achelihitsanga yavo vayayaanza,
khuli tata achelihitsanga mwana wayaanzitswangwa naye.
13Vali ni ikhaavi yavo vanyolanga vusitsa,
khandi yavo vaheelwangwa limanya.
14Khuli nu vukhala vunyishi muvwo khuvira khuli vuli mu ifetsa;
khali utushili khuvunyola khuvira itsahabu.
15Vusitsa vuli nu vukhonyi vunyishi khuvira machina ku vukuuli vululu muno;
shindu shivulakhuho shia wikombanga shinyala khusasanyinywa khuvwo.
16Vusitsa vuchilanga umenya khumatukhu manyishi,
khandi vuchilanga uva ni miandu nu khuheelwa luyali.
17Vusitsa vunyala khuchila vulamu vwovwo vukase
nu khukhwimilila mu milembe mu limenya liolio.
18Yavo vanyola vusitsa vali ni ikhaavi;
vusitsa vuliitsa khuvaha vulamu.
19Mwami Nyasaye yalomba lilova khurulana khu vusitsa vwevwe;
yavikha malesi mu makono kakwo khulondokhana khu vucheli vwevwe.
20Vusitsa vwevwe vwachila michela nichirundukha,
khandi imbula nikhuva khulilova khurula mu malesi.
21Yivi mwana wanje, utsililile khuva nu vusitsa vwovwo nende limanya.
Vikharula mu yivi tawe.
22Viliitsa khukhuha vulamu --
limenya lilahi liu khukhuyaanzitsa.
23Nalwo lwa uliitsa khuchenda munjila yoyo mu milembe,
vuchila khwisikarila shilenje shioshio.
24Uliitsa khuvula khuria khali niiva uliitsa khukona tsindolo;
lwa uliitsa khukona, tsindolo tsiliitsa khuva tsinyishi mu vutukhu.
25Uliitsa khuvula khuheendakhu mwoyo khulondokhana khu matiinyu kaliho,
khuli litiva likwililanga vandu vatamanu khuli shihungutsi.
26Mwami Nyasaye aliitsa khukhulinda vulahi vwene.
Shialiitsa khukhulekha yivi khukwa mu mureeko tawe.
27Ukholele malahi yavo venyekhanga khukholelwa malahi,
isaa yosi ya uli ni lienya liu khukhola kenako.
28Lekha khuvoolelakhu mureende wowo,
“Tsia, navutswa ukalushi isaa yindi;
nakhuha mukamba” - lwa yivi mwene uvetsanga nuli nashio.
29Uvuli khuloshitsakhu khukholela mureende wowo shikhola shitamanu,
nali wowo wamenya nivi mu lisuuvilitsa.
30Uvuli khuhangaliitsana nu mundu vuchila shivune shiosi,
nashili khukhukholela shindu shitamanu.
31Uvuli khushendeshela vandu valulu
inoho khukanakana khukhola ka vakholanga,
32shichila Mwami Nyasaye wayambakhana vandu vakholanga vindu vitamanu,
navutswa alindanga vulahi vwene vandu vi likhola liu vulunji.
33Mwami Nyasaye wavikha shilaamo khu tsinzu tsia vandu vatamanu,
navutswa akasitsanga tsinzu tsia vandu vi likhola liu vulunji.
34Akholelanga shihenye henye vandu vilola vakholelanga vandi shihenye henye;
navutswa ayaanzitswangwa na yavo vichehitsanga.
35Vandu vali nu vusitsa valiitsa khuheelwa luyali khuli ni miandu chiavo,
navutswa vandu vayiingwa valiitsa khutsililila khuva ni tsisoni.
Currently Selected:
TSINGANU 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013