TSINGANU 26
26
1Luyali khuheelwa mundu muyiingwa ni shikhaya;
ali vutswa khuli imbula yi imparafu mumatukhu ki shimiyu,
inoho khuli imbula mu tsinyinga tsiu khuchesa.
2Shilaamo shivula shivune shiosi, shivula washikwilanga;
shili vutswa khuli liroleletsi lili khu luchendo, khuli iminyi ipulukhanga,
3Ifarasi irumulwa nu mushaliti, ipunda isukumwa,
navutswa khutukha mundu muyiingwa ashiutwi ni shivoko.
4Uvuli khuchipakhu mundu muyiingwa shichila vuyiingwa vwevwe,
nukhola ndio, munyala khusasana naye.
5Chipa mundu muyiingwa khulondokhana khu vuyiingwa vwevwe,
avuli khwivukula ndi neye uli nu vusitsa khukhuvira.
6Mundu urumanga mundu muyiingwa khuhila havundu likhuva,
ali khuli mundu wireemanga vilenje vievie inoho wilerelanga vutiinyu.
7Mundu muyiingwa anyala khurumishila tsinganu khuli lwa yenyanga,
khuli mundu wafwokoya arumishilanga vilenje vievie.
8Khuha mundu muyiingwa luyali,
kali vutswa khuli uvikhanga lichina mu ifandili.
9Mundu muyiingwa uchelitsanga khurumishila tsinganu,
ali vutswa khuli mutandi yihanga livwa mu mukhono kwekwe.
10Muruchi usamuliitsanga mundu muyiingwa inoho mutandi,
ali khuli mundu ulesanga vura wu salilitsanga shia mundu wosi.
11Mundu muyiingwa ukalushilanga mu vuyiingwa vwevwe;
ali khuli isiimbwa ikalukhananga ilia masali kayo.
12Unyala khuva walolakhu mundu wivukulanga ali nu vusitsa?
Mundu muyiingwa ali ni lisuuvilitswa khumuvira ye.
13Mundu mukaara avoolanga, “Isimba ili ilwanyi;
shinyala khutsiayo tawe.”
14Khuli muliango kukalukhanilanga mu vwichapi,
nindio khandi mundu mukaara yikalukhanilanga mu shitali shieshie.
15Mundu mukaara atuumbanga mu shiukhulia mukhono kwekwe,
navutswa avula tsingulu tsiu khulia.
16Mundu mukaara yivukulanga khuva nu vusitsa
khuvira vandu saba vahaananga vivune vilahi khu ka vavooli vene.
17Mundu winjililanga mulilembana likhali lielie
ali vutswa khuli mundu ukumilanga maroyi ki isiimbwa iviranga khu muhaanda.
18Khuli mulalu avayanga ni tsimemo tsiu mulilu,
inoho mivanu chi likhutsa,
19nindio khandi ali mundu ukaatanga mureende wewe,
navoola, “Kholikhu vutswa!”
20Vuchila khuva ni tsikhuyi, mulilu kutsimanga;
vuchila khumoonyana, khulembana khuvulaho.
21Khuli mandaa inoho tsikhuyi vichilanga mulilu nu kwakha,
nindio khandi khuli mundu wayaanza khulembana raanjitsanga khulembana.
22Makhuva ku mumoonyi kali khuli shiukhulia shilahi;
shikholomokhanga nishitsia munda.
23Khuli ilaanji yavekhwa khu inyungu yang'ang'anga,
nindio khandi khuli makhuva malahi ki likhola litamanu kali.
24Mundu wu vuhimwa, alomolomanga makhuva malahi,
navutswa avisanga vutamanu vwali navwo mu mwoyo kwekwe.
25Nalomolome vulahi, uvuli khumusuuvila,
navutswa wayitsula vuhimwa mu mwoyo kwekwe.
26Anyala khuvula khumanyinya vuhimwa vwevwe,
navutswa likhola lielie litamanu lilamanyikhana khu vandu voosi.
27Mundu uyeevanga vwina aliitsa khukwamu mwene,
khandi woyo ukolongominyanga lichina liliitsa khumukalukha.
28Mundu uvoolanga vuvehi avulakhu mundu wa yayaanza khu vavoolelanga;
khandi woyo ukaatanga vandi na makhuva malahi aleranga litivitswa.
Currently Selected:
TSINGANU 26: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013