TSINGANU 25
25
Tsinganu Tsindi tsia Solomoni
1Yitsi natsio tsinganu tsindi tsinyishi tsia Solomoni, tsiali ni tsiahandikwa na varumishi vu Mwami Hezekia wa Yuda.
2Khuhaane vukhumi khu Nyasaye shichila neye uvisanga vindu;
navutswa khuhaane luyali khu vami lwa vakhavanga vindu.
3Shiunyala khumanya ka mwami akanakananga tawe;
tsinganakani tsietsie tsiakhuvira, khuli likulu lili ihale wene
inoho vuraambi vwi lilova khutsia hasi.
4Rulitsa ikhulio mu ifetsa,
mwiraanyi akhulombele shindu shilahi.
5Rulitsa vandu vatamanu imbeli wu mwami,
khandi vwamihi vwevwe vulava ni tsingulu khuvirila mu likhola liu vulunji.
6Uvuli khwilavushitsa khu mwami,
inoho khwikhola khuva mundu wi tsingulu;
7shichila nu vulahi khuvoolelwa, “Hamba imbeli yinu,”
khuvira khuheelwa shisoko shivula luyali lwosi.
8Uvuli khukholakhu vwangu khuhila shiyaalo mushiina;
shichila ni shina shia uliitsa khukhola lwinyuma,
mushiahidi wundi nakalukhanyinya makhuva ka uvoolanga?
9Yivi nu mureende wowo muviritsi vene makhuva kenyu,
muvuli khuvoolelakhu mundu kamuvoolelane munyi vavili;
10vandu vavuli khumanya ka mwavoolelana muvwivisi,
khwiyononyila lira liolio khumatukhu koosi.
11Likhuva lilahi livoolelwi mu tsinyinga tsienyekhanga,
lili khuli shimanyilu shi itsahabu ikulu wi shindu shialombwa khu ifetsa.
12Lichelihitswa liu mundu uli nu vusitsa khu mundu muhulishitsi,
ni lilahi khuvira ipete inoho machina ku vukuuli vululu
kalombwa khu itsahabu indahi.
13Murumwa musuuvilwa ayaanzitsanga vandu vamuruma,
khuli matsi kashindi mumatukhu ku khuchesa ku luya.
14Mundu wichinjililanga khu shihanwa shia yambakhana khuhaana,
ali khuli malesi nende imbuutsa vilolekhanga
vuchila khukhuvitsa imbula yosi.
15Khuvirila mu likhutsila mwamihi anyala khukaatilitswa na makhuva;
lilomoloma lilahi litivitsanga mahingani.
16Nunyola vushi vwi tsinzushi, khomba vunyala khukhutukha,
uvuli khuva ni shilungulilu nu khusala masali.
17Uvuli khuchendelela shia khase khosi mureende wowo;
avuli khuvwa tsingulu shichila yivi ma khwambakhane.
18Mundu uhaananga vushiahidi vu vuvehi shichila mureende wewe,
ali khuli shivavi, shikong'o, inoho muvanu virumishilwangwa khwiira.
19Khusuuvilila mu mundu uvula vusuuvilwa mumatukhu ku vutiinyu,
kali khuli liino litamanu inoho shilenje shitivanila.
20Khwimbila tsinyimbo mundu unyakhananga mu mwoyo,
nu khuli khufwalula tsinguvu mumatukhu ku vushindu vululu,
inoho khura ichumbi mu lukuule.
21Mutsiku wowo nali ni inzala, umuhe shiukhulia;
nali nu vuluhu, umuhe matsi ku khung'wa.
22Nalwo lwa umukhola khuva ni tsisoni tsinyishi,
khandi Mwami Nyasaye alakhurunga.
23Khumoonya khuchilanga vurima vuvaho,
khuli vushindu khuluveka luli ivuluka vuleranga imbula.
24Nu vulahi khumenya mumbeka indala ikulu khushisechese shi inzu
khuvira khusanga inzu nu mukhali wamenya nalembananga.
25Khuhulila makhuva malahi khurula mu shivala shili ihale wene,
kali vutswa khuli mundu uli nu vuluhu ang'wetsanga matsi kashindi.
26Mundu mulahi uhuchililanga khulonda vikholwa viu mundu mutamanu,
ali khuli shirula shia matsi shiononyinywa inoho shisima shiatuuvulwa.
27Nu vutamanu khukhomba vushi vwi tsinzushi khuvira shichelo;
nu vutamanu khutsililila khwitsominywa khuvirana.
28Mundu wakhaywa khwilinda mwene munjila indahi,
ali khuli litaala livula valindi, linyala khuseerwa.
Currently Selected:
TSINGANU 25: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013