TSINGANU 27
27
1Uvuli khwichinjililakhu khulitukhu lia mukamba,
shichila uvula vunyali vu khumanya katsitsanga khwikholekha
litukhu lienelo nilishili khutukha.
2Lekha vandu vandi vakhwitsominyi yivi,
khali vandu vacheni khuvira mwene khwiyitsominywa.
3Lichina nende muyeeshe vivulakhu vulitoho vwosi
nusasanyinya khu vutiinyu vwa vuyiingwa vuleranga.
4Vululu nu vu khusalilitsa, khali vurima vutivitsanga;
navutswa ni viina unyala khukuura imbotokha?
5Nu vulahi khuchelihitsa mundu havulavu
khuvira khumukaata wamuyaanza.
6Mulina yitsukhananga nakholi, khali niiva alakhusalilitsa;
navutswa lwa mutsiku akhukhumbelelanga - uve mucheli!
7Mundu umali khwikura yambakhananga khali vushi vwi tsinzushi,
navutswa woyo uli ni inzala,
khali shiukhulia shilulu ni shilahi khuye.
8Mundu wahalalila khurula hango hehe
ali khuli linyonyi liahalalila khurula mu shitsu shialio.
9Makura ku khwivekha nende vubani vichilanga mundu asangala,
navutswa vutiinyu vuvelelitsanga mwoyo ku mundu.
10Uvuli khwivililakhu mulina wowo
inoho mulina wa tata wowo nende mama wowo;
uvuli khutsiakhu khuchendelela mwiikho wowo hango hehe nuli mu vutiinyu.
Mureende wa hahimbi nu mulahi khuvira mwiikho wumenyanga ihale wene.
11Yivi Mwana wanje, uve nu vusitsa, unombe sangale;
mbe ni lichipu liu khuchipa mundu wenyanga khunjaya.
12Mundu mucheli alolanga maraava nikali imbeli macheliha;
navutswa mundu muyiingwa achendanga yinjila muko asalila.
13Mundu muyiingwa ulaakanga khusinjilila likoovi liu mundu mucheni yikopanga,
utushili khunuulwa miandu chiechie khulu khurunga likoovi lia yasinjililanga.
14Unyala khali khulaama mulina wowo lwa uvukhanga mu tsindolo nu kushili mu mavwevwe
nu khumushelitsa milembe ikulu muno.
15Mukhali wamenya nalembananga
ali khuli imbula ikhuvanga ninyilila.
16Unyala khumuhonjelitsa munjila shina?
Wachelitsakhu khusinjilitsa vushindu
inoho khali khukumilakhu makura mu makhono?
17Vandu veekanga khurula khu vandi;
khuli shivia shiyakalanga shivia shindi.
18Mundu wosi usembelelanga musala kwa makhuyu alalia matunda kakwo.
Murumishi ulindanga vulahi muruchi wewe alaheelwa luyali.
19Vwoni vwovwo navwo vulolanga nu vulolekha mu matsi,
khandi liiva liolio nalio lia ulolanga mu mwoyo kwokwo.
20Mikomba ku mundu ali nako kali khuli shihatisi -
vwiyangu vushilimu khu kandi.
21Mulilu kuchelanga itsahabu nende ifetsa;
luyali lu mundu aheelwangwa lunyala khuchelitswa khandi.
22Khali niiva unyala khurumula mundu muyiingwa,
khali ave nali himbi khukhutsa,
shiuliitsa khuva nurulitsi vuyiingwa vwosi muye tawe.
23Linda vulahi makondi koko
nende tsing'ombe tsiotsio khuli unyala khunyala,
24shichila miandu shichinyala khuvaho mihika ni mihika tawe.
Khali vwamihi vwi shivala vuliitsa khuvula khuvaho khumatukhu koosi.
25Unyala khukhalaaka vunyasi khundulu khwi vikulu
nushilindilila vunyasi vundi khumeela.
26Unyala khulomba tsinguvu tsia wanyola numali khukuulitsa tsindala khu vwoya vwa makondi koko, nukuula mulimi ni tsisenti tsiuliitsa khuva nu wakuulitsilila tsimbuli tsiotsio. 27Uliitsa khushela maveele khurula mu tsimbuli tsiliitsa khuva nitsirikale, nikali koko nende ka vandu vi inzu yoyo; khandi ka varumishi vovo vi shikhana.
Currently Selected:
TSINGANU 27: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013