TSINGANU 24
24
1Uvuli khushendeshiela vandu vatamanu,
inoho khwikomba khuva navo;
2shichila vali ninganakani yu khukhola vindu viu khusalilitsa;
khandi vavula shindu shilahi shia valomolomakhu.
-20-
3Inzu yumbakhwangwa khurulana khu vusitsa,
khandi isinjilitswangwa khuvirila khu limanya.
4Khuvirila khu vucheli, viiko vitsulitswa
vindu viu vukuuli vululu nende vuhinda vu khuyaanzitsa.
-21-
5Nu vulahi khuva nu vusitsa khuvira khuva ni tsingulu;
ni kilikali, nu vulahi khuva nu vucheli khuvira khuva ni tsingulu.
6Khali ndio, vwimilili vu vusitsa vuchilanga liihe liraanjitswa,
khandi inganakani indahi ya vanyishi vakhukhonyanga ileranga likuura.
7Vusitsa vwatinyila mundu muyiingwa khumanya;
avulakhu shianyala khuvoola mu shikhaalo shia vandu.
-23-
8Mundu uloshitsanga khukhola vindu vitamanu,
aliitsa khulaangwa mundu ulerelanga vandi vutiinyu.
9Vikholwa viu mundu muyiingwa vileranga vwoni;
Mundu uchayanga vandi wasinya shia mundu wosi.
-24-
10Niiva uli muteteshele mumatukhu kuli mu matiinyu,
ni kilikali, wacheha tsingulu.
-25-
11Uhonyinyi mundu uhilwangwa khwiirwa vuchila shivune;
uvuli khuvalekha khwiirwa.
12Unyala khuvoola ndi kavula vukhonyi khu yivi;
navutswa Nyasaye wamanya khandi neye ukhalachilanga kali mu mwoyo kwokwo.
Neye ulindanga yivi; wakhumanya yivi.
Aliitsa khukhurunga khulondokhana khu vikholwa viovio.
-26-
13Yivi Mwana wanje, ukhombe vushi vwi tsinzushi
shichila nu vulahi;
vushi vurulanga mu mulinga nu vunuuli khukhombwa.
14Nindio khandi khuli vusitsa vuli khu yivi;
Nuvunyola, uliitsa khuva ni limenya lilahi mumatukhu kitsanga,
khandi ulatsililila khuva ni lisuuvilitswa.
-27-
15Uvuli khuva khuli mundu mutamanu
uli ninganakani yu khwinjilila mundu wi likhola liu vulunji,
inoho khumunuula inzu yeye.
16Khali niiva mundu wi likhola liu vulunji aliitsa khukwa hasi hali khanyishi, alasinjila;
navutswa vandu vatamanu valiitsa khutivitswa khuvirila khu matiinyu.
-28-
17Uvuli khusangala lwa mutsiku wowo akwitsanga mu matiinyu;
khandi uvuli khuva nu vuyaanzi mu mwoyo kwokwo namali khwisikarila;
18shichila Mwami Nyasaye aliitsa khulola kenako,
nu khuvula khuyaanzitswa nako;
khandi avuli khumusalilitsa khuvirila mu vurima vwevwe.
-29-
19Uvuli khuheendakhu mwoyo shichila vandu vakholanga vindu vitamanu,
inoho khushendeshela vandu vatamanu;
20shichila avulakhu shilahi shia nanyole mumatukhu kali imbeli;
avula shia alindililanga khulola.
-30-
21Yivi mwana wanje, uhe Mwami Nyasaye nende mwami luyali.
Lekhana na vandu va vahinjitsanga;
22shichila valiitsa khutivitswa vwangu muno;
Ni viina wamanya vutiinyu vwa vo vavili valiitsa khuruma?
Tsinganu Tsindi Tsinyishi
23Khali vandu vu vusitsa vavoola khale kenako.
Khwihonela vandi mulikhalachilwa nu vutamanu.
24Mundu uvoolelanga mundu mutamanu,
“Uvula vutamanu vwosi vwa wakhola,”
alanyola shilaamo khurula khu vandu
nu khuhimwa na vandu vi tsimbia tsindi;
25navutswa vandu vasalilitsanga vandu vatamanu
valiitsa khuva nu vuyaanzi,
khandi tsikhaavi tsindahi tsiliitsa khuvakwila.
26Mundu uhaananga lichipu liu vulunji
lili khuli shimanyilu shiu vulina vwatoto.
27Uranje khukhola muhinzilu kwokwo.
Urecheshitsi shia shindu shioshio shiosi mu mulimi;
numali khukhola ndio, unyala khumbakha inzu yoyo.
28Uvuli khuhaanakhu vushiahidi vwi shikhaywa shichila mureende wowo,
inoho khuvoolakhu shindu shiu vuvehi khulondokhana khuye.
29Uvuli khuvoola, “Namukhola malala mele ka yakholela!
Navanzila ka yakhola!”
30Nachenda nimbirila himbi khu mulimi ku mundu mukaara,
himbi ha mulimi kwi misabibu ku mundu muyiingwa.
31Nali ni lichenya lwa nalola kwameela mavwa;
mavaanze kali kalandamu shia havundu hosi,
khandi lisisi liakwo lia machina liali liasambulwa.
32Nalwo lwa naheenza, ninganakanakhu,
nalola ninyola mivaalo.
33Konakhu hati; renjetsakhu hati!
Linga halala makhono koko uhulushi!
34Navutswa umanye ndi nukona tsindolo,
vumanani vuliitsa khukhwinjilila khuli munuuli,
khandi vutakha khuli mundu wiyavaale viuchi viu khukwanila.
Currently Selected:
TSINGANU 24: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013